Read Sangtam Naga LUK 20 Bible Online

LUK 20 - Sangtam Naga bible

LUK 20

¹Nyümong khüdu amübükuh la Jisunü nyitsarüti te donü ko Yuse atsa thsingyu yade, bebü ayingti ko yuzeng dorüti azibarüti te müjang

²abi yanglang ronü yocho, “Hiri nguchinung nüh tu tase liro? Sünü nü khyang hiba tase jücho? Ihrü te young.”

³Jisunü arüh te lalingcho, “Ihnü nührü te lang khüdu tsingdhengnung.

⁴Johan-nü baptijüba tase tsü Tsingrangba chahnü a mahkhang nyitsarü chahnüo, I te young?”

⁵Arühnü arühbürü yola rehtamüsucho, “Ihsanü tu yonung? Ihsanü, ‘Tsingrangba chahnüe’ pü yokhang, ‘Khang tuepü nührünü Johan chah müyudsicho pü abinü yonung?’

⁶Ta Ihsanü, ‘Nyitsarü chahnüekhang,’ sühdi hi atümungnü Ihsa chah lungnü kengnung, tunüo Johan tsü azikehrüepü arühnü müdhele.”

⁷Achotsü arühnü lalingcho, “Hütsü khüdenünang Ihrünü mümüdhe.”

⁸Jisunü arüh te yocho, “Khang, Ihnüsü tu tasenü hiri nguchiro hütsü nührü te müyonung.”

⁹Hütsüpü Jisunü nyitsarüti te yukitaba hi yocho: “Shikhe khüdu nyüh khüdunü shükusiluh khüdu thsacho, ko hütsü anguchirü khyang pehjüpü anyahli nengdang kuh pehjüpü tsicho.

¹⁰Khode shükusih laanung akyang chihcho, abinü anguchirü yang abi nohlüm chingnung akulirü khüdu wüsohcho. Ta arühnü kulibong tsü lahcho ko khehshü thali müthehcho.

¹¹Achotsü abinü akulirü aparü nyüh khüdu wüsohcho; ta arühnü abisü lahcho, ko ashah khyo bichipü khehshü thali müthehcho.

¹²Hütsüpü abinü kulirü asanguba wüsohcho, ta arühnü abisü lerohpehjüpü, tphahchehchüpehcho.

¹³Hütsünü shükusiluh abüdongbanü yocho, ‘Ihnü tu nguchinung! Ihnü Ipu amüiba tsurü müthehnung; arühnü abi jengrenglü drünung!’

¹⁴Ta khode shehsherünü abi ngucho, arühbürü chotacho, ‘Hiba hi abüdongba tsurüe. Ihsanü abi mapsehnung, ko kuthsi tsü Ihsa yo kangnung!’

¹⁵Achotsü arühnü abi shükusiluh lanü tphahcheh mapsehcho. “Jisunü tsingdhengcho, Hütsütakhang, shükusiluh abüdongbanü shehsherü chah tsü tu nguchinung?

¹⁶Abinü ro shehsherü tsü mapsehnung ko shükusiluh tsü khyo aparü khyang jünung.” Arühnü hi yuchinü yocho, “Hiroh-ilü tütikehsoh!”

¹⁷Jisunü arüh chah dhengnü yocho, Khang amüsa yu hi tu adüzüo? “Kuthsarünü müdhsütahba lung tsü apüm tenü ayingba kangcho.

¹⁸“Hütsüba lung chah sü shohjonang abi lahzangzangnung; ko lung tsü khürü chah longkehkhang, abi asongsong kang kengnahnung.”

¹⁹Yuzeng dorüti ko bebü ayingti tsünü hütsü chahnü Jisu rangnyücho, tunüo yukita abinü yoba hi arüh nyümrepü arühnü nyichehcho; ta arühnü nyitsarüti drücho.

²⁰Arühnü nyitsarü khürü yuje chorü kyo ngusohnung müjühpü apu yu la xohsohpü governor khehla khakhuchüjünung nengdang arüh wüsohcho.

²¹Füzathsarü hirinü Jisu te tsingdhengcho, “Athsingyurü, nühnü yuje du chore ko dorepü Ihrünü müdhele. Nühnü sü tsah müdhengre, ta Tsingrangba lang yuje dore.

²²Kaisar khyang alihmüthsü jünung tsü yuzengnü müla lirü mah-o?”

²³Ta Jisunü arüh rah richeh ngunü arüh te yocho,

²⁴“I te thsi khüdu ngusohng. Hi chah sü tsah ko sü neng kehro?” Arühnü lalingcho, “Kaisar.”

²⁵Jisunü yocho, “Khang, tu Kaisar yo liro hütsü Kaisar khyang jüng, ko tu Tsingrangba yo liro hütsü Tsingrangba khyang jüng.”

²⁶Hütsüla nyitsarü bete arühnü tulasü abi rangnung mükohcho ko abinü lalingcho la nyemüyang arühnü sahmüthsacho.

²⁷Hütsüpü asürü kangliroba mülepü yorü Sadukirü khürünü Jisu yang ropü yocho,

²⁸“Abüdongba! ‘Nyüh khüdu atsurü mülipü anitpü pehjo sopehkhang, anithrenü chomitpü tsü khyübae ko anyüh tsurü tsü amung asuu tsurü roh-i khichibaepü Mosanü ihrü khyang thrah yohpüjüle.’

²⁹Shikhe khüdu arüh jünirü dhünyeh licho; aziba tsü kukangcho ko tsuzarü mülipü sopehcho.

³⁰Achotsü anyüubanü khingkutpü tsü khyücho,

³¹hütsüpü asangubanü khyücho. Hütsü roh-i arüh dhünyehding tsuzarü mülipü sücho.

³²Achangkathsa, khingkutpü tsüsü sücho.

³³Asürüti kangli roba nyümong la abükyü tsü sü nitpü thsanung? Tunüo arüh dhünyehdingnü abükyü tsü khyücho.”

³⁴Jisunü arüh te lalingcho, “Hi limih la khingkurü adhrerü xengyangpitare,

³⁵ta sürü kangliro ninglanglih la linung dekhengro, arüh müxengyangpitanung.

³⁶Arüh ninglang riwürüti kyo kangnung ko müsünung. Arüh tsü Tsingrangba tsurüti, tunüo asücho lanü arüh kangliko.

³⁷Ko Mosanü asürü kanglinung nengdang yuzi tsitsa lile. Singtrung la michang trude abinü Abüdongba nengdang: ‘Abraham Tsingrang, Isak Tsingrang ko Jakob Tsingrangpü dsicho.’

³⁸Abi asürü Tsingrang mah, ta akang liba Tsingrang, tunüo abi chah atümung akang lire.”

³⁹Yuzeng dorüti khürünü yocho, “Athsingyurü, tsa lalingko!”

⁴⁰Tunüo arühnü abi te apa tsingdhengnung müsi mümülahcho.

⁴¹Jisunü arüh te tsingdhengcho, “Mesia tsü David tsurüepü arühnü khüta yoro?

⁴²Tunüo Nengsekhi la David apunü yore, “Abüdongbanü I Abüdongba te yocho: Ihnü nü rorüh nü jing pohki dhrümchi müyohpüde,

⁴³I tsalangthring hila püm.

⁴⁴Davidnü abi te, Abüdongba; pü dsikhang, Mesia tsü khütapü David chahnü trahchocho thsanung?”

⁴⁵Nyitsarü atümungnü nyi yade, Jisunü amonoti te yocho,

⁴⁶“Yuzeng dorüti, sürünü shü asheng müpipü tungchinyüro ko yanglong la jengreng jo salüm jüsohnyüro; ko sürünü Sinagog ko thsüti la pümji atsauba khyünyüro;

⁴⁷sürünü chomilarü kuhla kengcho khyünyüro, ko atangnung anyahli dangkhidangnangro, arüh nengdang müzahmükieng! Arüh akhingchi atümung tenü amütsau linung!”