Read Sangtam Naga LUK 21 Bible Online

LUK 21 - Sangtam Naga bible

LUK 21

¹Jisunü dhengmükangcho ko alirütinü amübü thsibong la arüh amübü yohcho ngucho,

²ko abinü ailümrü chomilarü khüdusü paisa anyüh yohcho ngucho,

³ko abinü yocho, “Ihnü nührü te yuje yonung, ailüm chomitpü hinü atümung tenü adrongu yohko.

⁴Tunüo aparü atümung tsünü arüh khütang licho lanü jücho; ta abükyünü, iilümsüseh, abükyü akang linung nengdang alicho apüm jüko.”

⁵Mono khürünü amübükuh lung akhachehnü thsacho adhengnung khüta atsah atsa ko Tsingrangba khyang amübü jücho nengdang chota yade, Jisunü yocho,

⁶“Nührünü nguba hi apüm hila lung khüdusü ajoji la müjonung; ko atümung trümnyangnung bekhyah tsü ronung.”

⁷Arühnü tsingdhengcho, “Athsingyurü, hi khode tikehnung? Ko hi tikehnung thsade amüdhethsa tu linung?”

⁸Jisunü yocho, “Nührü mükihyochüsohnung müzahng. Tunüo adrongnü I nengla ronü, ‘Ih abi-e!’ ko ‘Becho chihko!’ pü yonung. Ta arüh tüiwü.

⁹Khode nührünü khata ko nyümta yusi yuchinang müsi türohcho; hiri akhu tikehnung, ta hütsü achangkarü mah.”

¹⁰Abinü mütozah yocho, “Yuchonü Yucho nyüm ko Yanglihnü Yanglih nyüm shemüsunung.

¹¹Apümlang adrünung alihyo zingnung, yangkongthsükong, ko arüm ra linung, ko ninglangnü adrünung ko amüdhethsa linung.

¹²Ta hiri tikehnung thsade, nührü rangnung ko dhsümthsenung; nührü Sinagog ko arangyoh kuhla nowünung; nührü yangthsarü ko governor bete noronung.

¹³Hiba bekhyah hi yuzi thsanung nührü nengdang shikhe atsa khüdu linung.

¹⁴Nührünü khüta lalingnung tsehleh tülümxü,

¹⁵tunüo nührü rorüh sünüsü mülalingchehnung mahkhang müdongzinungthsa nührünü tu yonung Ihnü nührü khyang lümlong ko yu jünung.

¹⁶Nührü tpurünü, nührü jünirütinü, nührü tsutpurünü ko nührü shangrünü nührü khakhuchüjünung; ko nührü khürülü süsohnung.

¹⁷I thsacholanü atümungnü nührü thrünyinung.

¹⁸Ta nührü thah chah kuvapüm khüdu mii müchahnung.

¹⁹Drengdreng yang, ko nü jangjang nüh khümchonung.

²⁰“Khode nührünü athrungrünü Jerusalem thsutipü ngunang, hütsü thsangnyangnung thsakopü müdheing.

²¹Hütsüde sürü Judea la liro azonglang tsieng; sürü yangdi la liro tsieng, ko sürü yangpilang wü liro arühnü yangdi lang tsü tüzüdu.

²²Tunüo amüsa yu la thrah licho tikehnung nengdang hirihi ‘Rühyangba Nyümongti linung’.

²³Hütsüri nyümong la khingkurü sürü long la liro ko akhunga liba atpati nengdang khütoh-i adrünung thsanung! Tunüo limih la athsangthsi amülah hiri nyitsarü michah rihlong chüroba linung.

²⁴Khürü nohshengnü kyüsehnung, ko aparü yucho apümlang rang hitsinung; arüh becho müchide müyudsirünü Jerusalem dhrümchinung.

²⁵“Nyü, chonu ko chenghiti chah amüdhethsa chüronung. Limih la yuchoti apüm kiloh kihdi khongcho drüchonü lümdhama pehnung.

²⁶Nyitsarünü lihküp michah atikehnung licho yingde adrüchonü sütünung, tunüo ning chah liba taseti shühnahnung.

²⁷Hütsüde Nyitsarü Tsurü tsü nyükhi la tase amülah ko ahechi la ronung.

²⁸Khode hiri tikehmüsunang, shemüsung ko nührü ku tsungmüsung, tunüo nührü akangcheh amünyethsa lile.”

²⁹Hütsüpü Jisunü arüh te yukita khüdu yocho: “Ngurüsidong ko apa singdongti apüm lümdheng.

³⁰Khode nührünü arüh ava thümlang ngunang, müyü amünyethsa rolepü müdhere.

³¹Hütsü kyo, khode hiri tikehcho ngunang, Tsingrangba Yanglih tsü ronung thsakopü nührünü müdheing.

³²“Ihnü nührü te yutsatsa yonung: hiri apüm mütikehkhangde, hiba shang mükhutsinung.

³³Ning ko alih khukhang tsinung ta I yu khodesü mükhutsinung.

³⁴“Alaa tsu ko yongnü hiba akang shulüm lümxüba ko müdengseh linung lanü nührü jangjang müzahng, mahkhang hütsü nyümong uza thsala roh-i dhrongyengnü nührü xohnung.

³⁵Tunüo hütsü lihküp la apümlang nyitsarü atümung chah tikehnung.

³⁶Atikehnung licho apüm lanü tsichehnung ko Nyitsarü Tsurü bete yachehnungthsa lede xengxeng ko dangkhidangnang.”

³⁷Ko nyümong mükhu Jisunü amübükuh la docho, ta aromang abinü Olive zong la yüpcho.

³⁸Nyangnyü mükhu nyitsarütinü mütoh amübükuh lang abi yu nyinung wücho.