Read Sangtam Naga LUK 22 Bible Online

LUK 22 - Sangtam Naga bible

LUK 22

¹Phungkhu Thsüti pü dsiba Bhüpza müyohba Hümthse thsüti shikhe tsü chii rocho.

²Bebü ayingti ko yuzeng dorütinü nyitsarüti drücho, achotsü arühnü Jisu aranglangnü süsohnung lang yangchicho.

³Hütsüde mono dhüre-anyüh yola khüdu Iskariot pü dsiba Judas chah Satan züducho.

⁴Achotsü Judasnü wü bebü ayingti ko amübükuh nyahrü anüchirü te arüh khyang abinü Jisu khüta khakhuchüjünung hütsü nengdang chotacho.

⁵Arüh künyangcho ko abi khyang thsi jünung nyengchocho.

⁶Judasnü hütsü nyengchocho ko nyitsarüti khyang mümüdhesohpü arüh khyang Jisu khakhuchüjünung thsatsa tsa yangchimüsucho.

⁷Bhüpza müyohba Hümthse thsüti nengdang phungkhu sanza mapsehba nyümong chihcho.

⁸Ko Jisunü Peter ko Johan nyüh müthehnü yocho: “Wüng ko Ihsa nengdang Phungkhu Thsüti tsunung rungnüm.”

⁹Arühnü tsingdhengcho, “Nühnü hütsü khüde rungnümsohnyüro?”

¹⁰Abinü lalingcho, “Nührünü yangdi la tsü züdude, nyüh khüdu kih shinga dhipü nührü shirünung. Abi züduba kuhla tsü züdung,

¹¹ko kuh abüdongba te tsü young: ‘Athsingyubanü nü te yore, Ih ko I monoti nengdang Phungkhu Thsüti tsunung kuh tsü khüdeo?’

¹²Abinü nührü te amungthriba arungnümcho kuhchongsah amülah khüdu tho ngunung, hütsüla rungnüm.”

¹³Arühnü wücho ko adhangpi Jisunü yocho roh-i tsü ngucho, ko arühnü Phungkhu Thsüti tsü rungnümcho.

¹⁴Khode becho chihcho, Jisunü riwürüti yola tsingthsang te pümcho.

¹⁵Abinü arüh te yocho, “Ih müchongchaede Ihnü nührü yola Phungkhu Thsüti hi khütang tsunyüre!

¹⁶Tunüo Ihnü nührü te yore, Tsingrangba Yanglih la hi mütikehde Ihnü hi khodesü mütsunung.”

¹⁷Hütsüpü Jisunü shing khüdu khyücho, ko Tsingrangba khyang anengse jüpü yocho, “Hi khyüng ko nührü yola changtaang.

¹⁸Ihnü nührü te yore, Ade tinü Tsingrangba Yanglih mürode, Ihnü hiba cikih hi müyongnung.”

¹⁹Hütsüpü abinü hümthse khyücho, ko Tsingrangba khyang anengse jüpü hütsü chenahcho ko arüh khyang jonü yocho, “Hi Ifü lile, khüiba nührü nengdang jücho. Ih lümchehnung nengdang hi bichieng.”

²⁰Hütsü roh-i, thsüti tsupü abinü shing tsü jonü yocho, “Shing hi nührü nengdang khatohcho I shüh la asi azengtacho lile.

²¹“Ta dheng! Ih kihyochüjünung tsü hila I te tsingthsang chah lile!

²²Nyitsarü Tsurü tsü Tsingrangbanü lümcho roh-i sünung, ta sünü kihyochüro, abi nengdang khütoh-i adrünung thsanung!”

²³Achotsü arüh yola hütsü nguchinung tsü sü thsanungpü tsingdhengtamüsucho.

²⁴Monoti yola sü adiuba khichinungpü yujitacho.

²⁵Jisunü arüh te yocho, “Müyudsirü yangthsarüti arüh müyurü michah tase lile, ko athsarütinü, ‘Müyurü shangrü’ pü dsisohnyüre.

²⁶Ta nührülü hütsüta mah; hütsü mahpü, nührü yola adiuba tsü achangba roh-i, ko langnüba tsü kulirü roh-i kang.

²⁷Tsunung pümbae achahlaba nyüh tsü sü adiuo? Tsunung pümba tsü mahrü do? Ta Ih nührü yola achahlaba tsü lile.

²⁸“Ih chongcha ayung nührü I te licho;

²⁹I Unü I khyang thsanung tase jücho roh-i, Ihnü nührü khyang hütsüba tase jüre.

³⁰Nührünü I yanglih la I tsingthsang chah tsuyongnung, ko nührünü Yangthsaba pümji la pümpü Israel hung dhüre-anyüh michah yangthsathsanung.

³¹“Simon, Simon! Nyieng! Luthsarünü mayü lanü fürü müthrachehcho roh-i, atsa ko amütsa changshonung ko nührü atümung thsatsünung nengdang satan amülaba nguko.

³²Ta Simon, nü yudsi amükoh müngunung nengdang Ihnü nü nengdang dangkhidangnangjüko. Ko khode nü lasih thsamüla I yanglang thali ronang, nühnü nü jünirüti rezehsohng.”

³³Peternü lalingcho, “Abüdongba, Ih nü yola rangyohnung ko sünung mii rungnüm lile!”

³⁴Jisunü yocho, “Peter, Ihnü nü te yore, nühnü Ih mümüdhepü asangpili müyode shomülang hünanü mükhongnung.”

³⁵Hütsüpü Jisunü amonoti te tsingdhengcho, “Ihnü nührü thsiyohbong, shibha mahkhang jingkhüm tu mühipü mütheh desü, nührü lango dunüsü müdsicho mah-o?” Arühnü lalingcho, “Tunüsü mümüdsi.”

³⁶Jisunü arüh te yocho, “Ta adelü, sü thsiyohbong mahkhang shibha liro hütsüri tsü bieng; ko sü nohsheng müliro abinü shü ieng ko hütsü lihng.

³⁷Tunüo Ihnü nührü te yore, amüsa yu khüila, ‘Abi münyirü yola khiyohko’ pü thrah liro hütsü tikehnungbae, tunüo I nengdang tu thrah licho hütsü tikehre.”

³⁸Monotinü yocho, “Dheng! Abüdongba, Hila nohsheng anyüh lile!” Abinü yocho, “Hütsü akükyüe.”

³⁹Jisunü yangdi tsü pehjüpü apu nanathsacho roh-i Olive Zonglang wücho; ko monoti abi yola wücho.

⁴⁰Khode hütsü chihcho, abinü arüh te yocho, “Nührü athsatsü la mülongnung dangkhidangnang.”

⁴¹Hütsüpü abinü arüh tenü rüm-o wüpü mükhukeh dangkhidangnangcho.

⁴²“Uwa, nühnü lümkhang, hiba chongcha shing hi I chahnü khyükhujüng. Ta I lümcho mah, nü lümcho thsaang.”

⁴³Ko ninglangnü riwürü khüdu ro abi rezehsohcho.

⁴⁴Khütang lümtohseh abinü khüsha dangkhidangnangcho, ko ashikih ashüh roh-i alih la pohchocho.

⁴⁵Dangkhidangnang lanü shemüsu amonoti yang wüde abinü arüh awahchonü kyahseh yüpseh ngucho.

⁴⁶Abinü arüh te yocho, “Tuepü yüpjoro? Surung ko nührü athsatsü la mülongnung nengdang dangkhidangnang.”

⁴⁷Jisu yu müchozah-e, amülung khüdu mono dhüre-anyüh yola khüdu Judasnü nüpü rocho. Abinü Jisu chah müthsüpnung yang rocho.

⁴⁸Ta Jisunü yocho, “Judas, nühnü be müthsüpchonü Nyitsarü Tsurü kihyochüjünung ang?”

⁴⁹Jisu yola yarü monotinü atikehnung liba tsü ngunü yocho, “Ihrünü noh bichi o, Abüdongba?”

⁵⁰Ko arüh yola nyüh khüdunü amungthriba bebü kuliba nangku tsalang thsüp-pehjücho.

⁵¹Ta Jisunü, yocho, “Hitadung!” Abinü nyitsarüba nangku chah thahpüjo kyangjücho.

⁵²Hütsüpü Jisunü abi rangnung rorüh bebü ayingti, amübükuh nyahrü anüchirü ko azibarü te yocho, “Ih afüashi khüdu kyo nührünü Ih rangnung nohsheng ko singdümpi bipü ronungthsa kangcho ang?

⁵³Amübükuh la Ih nührü yola nyümong mükhu licho ko nührünü Ih mürang. Ta amanü yangthsade, hi nührünü nguchinung bekhyah-e.”

⁵⁴Arühnü Jisu rangcho ko bebü amungthriba kuh yang nowücho; ko Peternü ahongkoh thü-thünü iiwücho.

⁵⁵Kuh bete michang thsa licho ko hütsü mükang pümrü yola Petersü pümcho.

⁵⁶Khode kulilarü nyüh khüdunü abi michang he püm ngu, abükyünü abi chah dhenglahnü yocho, “Hivi mii Jisu yola zehchoe!”

⁵⁷Ta Peternü münyingcho yocho, “Khingkurü, Ihnü apu mii mümüdhe!”

⁵⁸Khü lipü nyüh khüdunü Peter mütsinü yocho, Nüh mii arüh yola khüdu mado! Peternü lalingcho, “Nyitsarü, Ih mah!”

⁵⁹Rehtseh khüdu-o lipü aparü nyüh khüdunü emüthsa yocho, “Hiba nyitsarü hi Jisu yola zehtsatsako, tunüo abisü Galilrüe!”

⁶⁰Ta Peternü lalingcho, “Nyitsarü, nüh tu chorünang Ihnü mümüdhe!” Hütsüde abi müchozah-e hüna khongcho.

⁶¹Abüdongbanü ximüla Peter chah dhengkehcho. Ko hütsüde “Nühnü Ih mümüdhepü asangpili müyode shomülang hünanü mükhongnung,” pü Abüdongbanü yocho abinü lümchehcho.

⁶²Ko abinü dongkhu chüdunü khah-a tracho.

⁶³Jisu nyahrütinü abi müthsamünyücho ko abi chah xüpcho.

⁶⁴Arühnü anah rümjüpü abi te tsingdhengcho, “Nü chah shingba tsü sünang ihrü te young!”

⁶⁵Ko arühnü abi nyüpmüseh yu adrong chocho.

⁶⁶Tsingsede, azibarüti, bebü ayingti ko yuzeng dorüti müjang shibülungcho ko Jisu ashimükhong bete norocho.

⁶⁷Arühnü yocho, “Nüh Mesia tsü mah-o?” Abinü lalingcho, “Ihnü nührü te yonye, nührünü müyudsinung;

⁶⁸ko Ihnü nührü te tsingdheng nye, nührünü mülengchonung.

⁶⁹Ta ade tinü Nyitsarü Tsurü tsü Akohba Tsingrangba tsalangthring pümnung.”

⁷⁰Arüh atümungnü yocho, “Akhang, nüh Tsingrangba Tsurü tsü do?” Abinü arüh te lalingcho, “Nührünü Ih-e pü yore.”

⁷¹Ko arühnü yocho, “Ihsanü yuzi alaa tu müdhsütah! Apu be lanü chocho Ihsanü yuchiko!”