Read Sangtam Naga LUK 23 Bible Online

LUK 23 - Sangtam Naga bible

LUK 23

¹Amülung apüm shemüsu Jisu Pilat yanglang nowücho.

²Arühnü abi mülangjümüsu yocho: “Hiba nyitsarünü ihrü te Kaesar khyang alihmüthsü tüjü pü yoko ko apu jangjangthsa Mesia, ko yangthsarü khüduepü chonü müyurü nümülacho ihrünü rangko.”

³Pilatnü abi te tsingdhengcho, “Nüh Jihudarü yangthsaba tsü mah-o?” Jisunü lalingcho, “Nüpunü yore.”

⁴Achotsü Pilatnü bebü ayingti ko sühdi te yocho, “Ihnü hiba nyitsarü mülangjünung yuzi tu müngure.”

⁵Ta arühnü khüsha yocho, “Abi adoba khunü Judea lih apümlang yubejarong chürosohre. Abinü Galil la dikehcho ko ade hila ro lile.”

⁶Pilatnü hi yuchinü tsingdhengcho, “Hiba nyitsarü hi Galilrü mah-o?”

⁷Khode Pilatnü Jisu tsü Herod yanglih lanüepü müdhecho, abinü Herod yang abi müthehcho, tunüo hütsü shikhe la Herod mii Jerusalem la ro licho.

⁸Khode Herodnü Jisu ngucho, abi dee künyangcho, tunüo abinü abi nengdang yuchicho ko akhudinü abi ngunyo licho. Jisunü thsayahiya khürü nguchicho abinü ngunyücho.

⁹Achotsü Herodnü Jisu te yu adrong tsingdhengcho, ta Jisunü tusü mülalingcho.

¹⁰Bebü ayingti ko yuzeng dorütinü shemüsu Jisu dee mülangjücho.

¹¹Herod ko abi athrungrütinü Jisu müthsamünyüjo ko mülangjo bichicho; ko hütsüpü ariri shü phakehjücho ko thali Pilat yang müthehcho.

¹²Hütsü nyümong dunü Herod e Pilat nyüh shangrü thsachehcho; hütsü mah-edelü anyüh arorüh thsa licho.

¹³Pilatnü bebü ayingti, langnürüti ko müyurüti müjangnü dsicho,

¹⁴ko arüh te yocho, “Hiba nyitsarü hinü müyurü amünülang nürepü nührünü abi Ih yang noroko. Ihnü nührü betenü abi thsatsüko, ko nührünü abi mülangjüba tulasü Ihnü abi chah mülang müngure.

¹⁵Herodnüsü abi mülang müngu, hütsünü abinü Ihsa yang abi thali müthehcho. Hiba nyitsarünü asünung leng tu münguchi.

¹⁶Hütsüeko Ihnü abi xüpnah lahsohpü lehcheh müthehnung.”

¹⁷(Phungkhu Thsüti müipi Pilatnü arangyohrü khüdu arüh yang müthehchünung abi yangthsa licho.)

¹⁸Sühdi shünü züdecho, “Abi süsohng! Ihrü khyang Barabas müthehng!”

¹⁹(Barabas tsü yangdi la yubejarong chürosohcho ko mapsehcho nengdang rangyohchoba lile.)

²⁰Pilatnü Jisu müthehnyücho, achotsü abinü amülung te thali tsingdhengcho.

²¹Ta arühnü züdecho, “Abi hamkehng! Abi hamkehng!”

²²Pilatnü arüh te asangpiusü yocho, “Abinü tu thsamehcho? Abinü asünung leng nguchicho Ihnü tu müngure. Ihnü abi xüpnah lahsohpü müthehnung.”

²³Ta arühnü Jisu tsü hamkehngpü arüh linga rohcheh khongcho ko achangka la arüh yu la lahrangcho.

²⁴Achotsü arühnü chingcho roh-i nguchinung Pilatnü mülacho.

²⁵Abinü arühnü chingba, sü yubejarong ko mapsehcho ngang rangyohcho abi müthehcho, ko arühnü khyünyücho roh-i nguchinung abinü arüh khyang Jisu khakhuchüjücho.

²⁶Athrungrütinü Jisu notsicho, ko arüh woyade, arühnü Cyrenerü anengnü Simon yanglangnü yangdi lang rochi yacho mütohcho. Arühnü abi rangcho, ko khala tsü abi chah dhikehjücho, ko abi khyang dhisohpü Jisu khanglang iisohcho.

²⁷Nyitsarü sühdi amülah abi khanglang iiwücho; hütsüri yola khingkurü khürü me tranü iiwücho.

²⁸Jisunü ximüla arüh te yocho, “Jerusalem khingkurüti! I nengdang tütra, ta nührübürü ko nührü tsuzarüti nengdang traang.

²⁹Nyitsarünü hiroh-i yonung nyümongti tsehle, ‘Khingkurü atungcho, azarü mühidhengrü ko nyikih mütidhengrü khüta suro atsa!’

³⁰Hütsüde nyitsarünü azongti te ‘Ihrü michah shohjoung!’ ko akhangti te ‘Ihrü haptieng; pü yonung shikhe thsanung!’

³¹Tunüo singxeng chah hiroh-i nguchikhang, sing asücho chah tu tikehnung?”

³²Yuzeng thsangnyangrü nyüh anyüh Jisu yola süsohnung no wücho.

³³Khode arühnü müdüm khüdu, “Thahrü” dsiba chii rocho, arühnü Jisu hütsüla hamkehcho, ko yuzeng thsangnyangba nyüh tsü, khüdu abi tsalangthring ko akhüu tsü abi fülilang hamkehcho.

³⁴Jisunü yocho, “Uwa, arüh khyang mülang pehjüng! Tunüo arühnü tu nguchiro hütsü arühnü mümüdhe.” Arühnü zii thsadheng abi shü arüh yola changtacho.

³⁵Hütsüla yarü nyitsarütinü dheng yade Jihudarü langnürütinü abi müthsamünyücho: “Abinü aparülü khümchoko; abi Tsingrangbanü throchehba Mesia tsü thsakhang apu jangjang khümchosohng!”

³⁶Athrungrüti nüsü abi müthsamünyücho: arühnü abi yangro acikih tihpü yocho,

³⁷“Nüh Jihudarü Yangthsaba thsakhang nüpu jangjang khümchoung!”

³⁸Akube yu hiri thrahkeh licho: “Hiba hi Jihudarü Yangthsaba.”

³⁹Yuzeng thsangnyangrü hamkehrü yola nyüh khüdunü abi müthsamünyo yocho: “Nüh Mesia tsü mahrü do? Nüpu ko ihrüsü khümchoung!”

⁴⁰Ta akhüuba tsünü abi yüpü yocho, “Tsingrangba müdrürü ang? Nühsü abi roh-i mülangjüko.

⁴¹Ihjülü athsalange, tunüo Ihjülü Ihjü nguchicho aleng ngure; ta abilü tu müthsameh.”

⁴²Ko abinü Jisu te yocho, “Jisu, nüh khode yangthsarü kangpü ronang Ih lümchehng!”

⁴³Jisunü abi te yocho, “Ihnü nü te yutsatsa yore, Chünye nüh I te Paradise la linung.”

⁴⁴Dhüre-anyüh bekhyah kohnü asang bekhyah chii limih apümlang mapehcho;

⁴⁵ko amübükuh kitising shü tsü anyüh kang rohrüpcho.

⁴⁶Hütsüde Jisunü yuva amülahnü züde yocho, “Uwa! Nü khehla I nbü khakhuchüjüre!” Hi yopü abi sücho.

⁴⁷Khode thsih michah anüchiba tsünü atikehcho tsü ngucho, abinü Tsingrangba nengse yocho, “Ajüje hiba hi achomükeh nyitsarü thsako!”

⁴⁸Ko adhengnung shibülungrünü atikehcho tsü ngude, wahnü arüh dreng hamnah thali tsicho.

⁴⁹Jisu te müdhetarüti atümung ko Galil lanü iirorü khingkurütinü ashu lanü dheng yacho.

⁵⁰Arimathiarü nyüh khüdu anengnü Josef, sü Judea yangdi lanü licho. Abi amüsarü ko nyitsarü atsa, ko abi Tsingrangba yanglih ronung ying licho.

⁵¹Abi ashimükhong la langnürü khüdu thsanye abinülü arüh adhrongcheh ko nguchi tsü mükhyüchocho.

⁵²Abinü Pilat yang wünü Jisu me chingcho.

⁵³Hütsüpü abinü me tsü dhichonü shü anana khüdunü müshüpü, lung la chiphohcho süsü mütsongpüdhengcho kong khüdu la hütsü yohpücho.

⁵⁴Hütsü hokolbar nyümong licho ko Sabath adikehrü thsacho.

⁵⁵Galil lanü Jisu khanglang iiwüba khingkurütinü Josef yola wücho ko kong la Jisu me khüta yohpücho ngucho.

⁵⁶Hütsüpü kuh lang thali wücho ko axümlichi tuji tsü rungnümcho. Ko Sabath tsü yuzengnü mülacho roh-i arühnü kyahshangcho.