Read Sangtam Naga LUK 24 Bible Online

LUK 24 - Sangtam Naga bible

LUK 24

¹Bari nyangnyü nyajang khingkurüti tsünü rungnümcho axümlichi tsü bipü kong lang wücho.

²Arühnü kong trahtri la lung tsü dhipehpü ngucho,

³achotsü arühnü züducho; ta Abüdongba Jisu me tsü müngucho.

⁴Arüh hütsüla lümkücha yade, dhrongyengnü nyüh anyüh shü ariri müpipü arüh müshüm yacho.

⁵Adrüchonü khingkurüti tsü alih la hümkeh lide, riwürü tsünü arüh te yocho, “Tuepü nührünü asürü yola akang lirü yangchiro?

⁶Abi hila müle; abi kangli roko. Abi Galil la lide abinü nührü te tu yocho hütsü lümchehng:

⁷‘Nyitsarü Tsurü tsü münyirü khehla khakhuchüjünung, ko hamkehsohnung, ko nyümong asang lipü kangli ronung.’ ”

⁸Hütsüde khingkurüti tsünü abi yu lümchehcho,

⁹ko kong lanü thali wü hiri apüm tsü dhüre-kheh ko aparü atümung te yocho.

¹⁰Khingkurüti tsü Mary Magdalin, Joana, Jakob atpa Mary; arüh ko arüh te liba aparü khingkurütinü riwürüti te hiri nengdang yocho.

¹¹Ta riwürüti tsünü khingkurütinü yoba tsü arahkehepü lüm arüh chah yumüdsicho.

¹²Ta Peternü tsohmüsu kong yang shangcho; ko abinü mükhurang dhengcho ta me müshücho shünana chah khu apa tusü müngucho. Achotsü abinü atikehcho nengdang nyemüyang kuh lang thalicho.

¹³Hütsü nyümong tsü Jisu yola mono nyüh anyüh, Jerusalem lanü lutri dhüre-kheh-o wüpü liba yang khüdu Emaus lang,

¹⁴atikehcho apüm nengdang chotanü wüchi yacho.

¹⁵Arüh chota woyade, Jisu ro arüh yola tsehcho;

¹⁶arühnü abi ngucho, ta abi müdhengchehcho.

¹⁷Jisunü arüh te yocho, “Nühjü langtseh chah tu nengdang chotaro?” Anyünü romih mükhümpü tohli yacho.

¹⁸Anyüh yola khüdu anengnü Kleopasnü abi te tsingdhengcho, “Jerusalem la mungpü hütsüla atüzitü kahla tu tikehcho nüh dunü mümüdhere ang?”

¹⁹Abinü tsingdhengcho, “Tu tikehcho?” Anyünü lalingcho, “Nazaret-rü Jisu chah tikehbasü ha” “Nyitsarü hi azikehrü khüdu thsacho tunüo abi chocho nguchicho lüpcho la tase zeh khüduepü Tsingrangba ko nyitsarü atümungnü khichicho.

²⁰Ihsa bebü ayingti ko yangthsarütinü abi süsohnung khakhuchüjücho, ko abi khala chah hamkehcho.

²¹Israel khümchonung tsü abi thsanungepü ihrü alongdi thsacho. Hiri apüm tikehpü chünyenü nyümong asangu rore.

²²Ko ihrü mülung la khingkurü khürünü ihrü nyemüyangsohcho; arühnü kong lang tsü nyajang wodhengcho,

²³ta arühnü me tsü müngucho. Arühnü ninglang riwürü mii nguko ko arühnü arüh te abi akang lilepü yochoepü ro yocho.

²⁴Ihrü yola khürünü kong lang tsü wüdhengko ko khingkurütinü yocho roh-i ngucho, ta arühnü apu müngu.”

²⁵Hütsüde Jisunü arüh te yocho, “Nührü dohrale, azikehrünü yocho atümung yudsinung khairale!

²⁶Mesia tsü hiri achongcha ngupü du ahechi la züdunung müdhsütahcho mah-o?”

²⁷Ko Jisunü arüh te amüsa yula abi nengdang Mosa vakha chahnü dikehpü azikehrünü thrahcho apüm la tu yo liro changnah yocho.

²⁸Arüh wüba yang tsü chinyü rode, Jisunü abilü khü wünung roh-i ngusohcho;

²⁹ta arühnü abi nüli yocho, “Ihrü yola müdong; nyümong ashengu tsiko ko adelü male.” Achotsü abinü arüh te müdongnung züducho.

³⁰Khode abinü arüh yola yangtsunung pümcho, abinü hümthse khyonü müwajücho, hütsüpü chenah arüh khyang jücho.

³¹Hütsüde arüh nah khangthrucho ko arühnü abi dhengchehcho, ta abi arüh tenü mülipehcho.

³²Anyübünyünü chotacho, “Abinü Ihjü te lang la chotade ko amüsa yu changnah yodesü Ihsa lasih mütahcho ang?”

³³Hütsüde tsünü arühnü shemüsu Jerusalem lang thalicho, ko mono dhüre-kheh tsü müjang aparü yola shibülung ngu

³⁴yocho, “Yuje Abüdongba kangliko! Abinü Simon te chüro nguko.”

³⁵Hütsüpü anyünü lang la tu tikehcho ko abinü hümthse chenahde anyünü khüta abi dhengchehcho hütsü arüh te changnah yocho.

³⁶Anyünü arüh te yu hi yochi yade, dhrongyengnü Abüdongba arüh long la yacho ko arüh te yocho, “Nührü te atbachi lieng.”

³⁷Anbü khüdu ngurepü lüm arüh nehcho.

³⁸Ta abinü arüh te yocho, “Tuepü nehro? Tuepü tütohnyünyeh lümro?

³⁹I kheh ko I jing dheng, ko hi Ipue ko müdheing. I chah thahpüng ko dheng, tunüo nührünü I chah ngucho roh-i anbü khüdu chah shutsa ko arüh zeh müngunung.”

⁴⁰Abinü hütsü yopü akheh ko ajing arüh te ngusohcho.

⁴¹Arühnü hütsüpü mii müyudsicho, arüh akünyangnü jeng nyemüyang lide, abinü arüh te yocho, “Nührü hila lango atsunung mülio?”

⁴²Arühnü abi khyang ngu achongcho azikyah khüdu jücho,

⁴³ko hütsü khyo arüh betenü tsucho.

⁴⁴Hütsüpü abinü arüh te yocho, “Mosa vakha la, azikehrütinü thrahcho la ko Nengsekhi la I nengdang thrahcho lüpcho tikehnungepü Ih nührü te lide yobasü hiri nengdange.”

⁴⁵Hütsüpü abinü amüsa yu nyichehnung arüh lasih kangthrujücho,

⁴⁶ko arüh te yocho, “Hita thrah lile: Mesia tsü chongchabae ko asücho lanü asang nyümong kangchehli ronung,

⁴⁷ko Jerusalem lanü dikehpü yucho atümung te lasih thsamüla ko münyi mülang pehba yusi nengdang abi nengla thsingyubae.

⁴⁸Hiri nengdang nührü yuzi lile.

⁴⁹Ko I Unü nyengchochoba, Ihnü nührü michah Anbü Amüsa müthehnung. Ta nührü michah amilangnü zii tsü mürode, yangdi la du lieng.”

⁵⁰Hütsüpü abinü arüh Bethany chii nowücho, hütsüla abinü akheh dhimüsu arüh müwajücho.

⁵¹Abinü arüh müwajo yade, abi arüh tenü zacho ko ninglang nükeh tsicho.

⁵²Arühnü abi mübücho ko akünyangnü jeng Jerusalem lang thalicho,

⁵³ko amübükuh la arühnü mütozah Tsingrangba nengse licho.