Read Sangtam Naga LUK 5 Bible Online

LUK 5 - Sangtam Naga bible

LUK 5

¹Nyümong khüdu Jisu Genesaret kihdi bekhüm la yade, nyitsarütinü Tsingrangba yu nyinung nyingta wücho.

²Kihtang anyüh kihbekhüm la yohpüpü ngurangrüti arüh yojeh thsüthohchiya abinü ngucho.

³Jisunü kihtang khüdu chah küducho, hütsü Simon yo thsacho ko abi te kihbekhüm la tsünü azikyah düm-müthehnung tsingdhengcho. Jisunü kihtang la tsü pümpü amülung te docho.

⁴Ayu chozahde, abinü Simon te yocho, “Kihtang tsü ayü asoh-u lang düm-mütheing, ko ngurangnung nengdang nührü yojeh tsü phayohchüng.”

⁵Simon-nü lalingcho, “Abüdongba, ihrünü shomang müyüp phako ta tusü mürang. Ta nühnü yorü tsü, Ihnü yojeh tsü phanung.”

⁶Arühnü phayohchücho ko ngu khütango phatichonü arüh yojeh arohrüprü thsacho.

⁷Achotsü arühnü kihtang akhüula pümrü arüh shangrü te ro troung pü khehnü dsicho. Ko arüh rocho ko kihtang anyüding ngunü jengmülüm chonü kihtangti tsü amülingyohrü thsacho.

⁸Simon Peternü atikehcho tsü ngude, abinü Jisu bete mükhukeh yocho, “I tenü za tsing, Abüdongba. Ih amünyi nyitsarüe!”

⁹Arühnü ngu khütango rangcho ngu abi ko abi te aparü atümung dee nyemüyangcho.

¹⁰Simon müyangrüti Zebedi tsurü Jakobnyüsü hütsü roh-i nyemüyangcho. Jisunü Simon te yocho, “Tüdrü; ade tinü nühnü nyitsarü rangnung.”

¹¹Arühnü arüh kihtangti kihbekhüm la tphahchehpü, lüpcho pehjüko Jisu khanglang iiwücho.

¹²Nyümong khüdu Jisu yangdi khüdu la pümde, mübhira kehrü khüdu abi yang rocho. Khode abinü Jisu ngucho, apu jangjang thsütsu abi te kihchicho, “Adirü, nühnü lümkhang, Ih müsachehjünung kohle!”

¹³Jisunü akheh müyungchü abi chah thahpo yocho, “Ihnü lümre, müsachehng.” Hütsüdenü adhsa tsünü nyitsarüba tsü pehjücho.

¹⁴Jisunü abi te yuzeng jo yocho, “Sütesü tüyo, ta bebüba yanglang wüng ko abi khyang dhengsohng; ko atümung bete nüh müsachehkopü yuzi thsanung nengdang, Mosanü mülacho amübü mübüng.”

¹⁵Ta Jisu nengdang yusi tsü alaa du apümlang sobhocho, ko nyitsarü khütango abi yu nyinung ko arüh adhsa-ara kyangsohnung nengdang abi yang rocho.

¹⁶Ta abinü anaying lang dangkhidangnangnung tsipehcho.

¹⁷Nyümong khüdu Jisunü do lide, Galil, Judea ko Jerusalem yangdi müipi lanü rocho Farisirü ko yuzeng adorüti khürü hütsüla pümcho. Athsangnangrü kyangjüsohnung Abüdongba zii abi chah licho.

¹⁸Nyitsarü khürünü dsidsisonü füthsarü nyüh khüdu chongnong lanü dhi rocho, ko arühnü abi kuhla tsü dhi züdu Jisu bete yohpünung müküpcho.

¹⁹Ta sühdirachonü arühnü abi münozüduchehcho. Hütsünü arühnü abi kuh michah dhi küducho ko kuh chuphohnü abi chongnong chahnü amülung long la Jisu bete dhichahchücho.

²⁰Jisunü arüh yudsi mülahcho ngunü nyitsarüba te tsü yocho, “I müyang, nü münyi pehjüko.”

²¹Yuzeng adorüti ko Farisirütinü arühbürü chotarü, “Hiroh-i müthsamünyo choba nyitsarü hi süo! Münyi pehjünung kohba tsü Tsingrangba due!”

²²Jisunü arüh lümcho müdhe arüh te yocho, “Nührünü tuepü hütsüta lümro?

²³‘Nü münyi pehjüko pü yonung amülaba a, mahkhang, Shemüsung ko tsehng pü yonung amülabao’?

²⁴Khang, Ihnü nührü te tsitsa yonung, Nyitsarü Tsurü chah hiba limih la münyi pehjünung tase kehle.” Hütsüpü abinü dsidsisüba nyitsarü te tsü yocho, “Shemüsung, nü yüpji dhing ko kuh lang wüng!”

²⁵Hütsüdenü nyitsarüba tsü arüh atümung betenü shemüsucho, ko abi yüpji tsü dhipü Tsingrangba nengse kuh lang tsicho.

²⁶Arüh atümung khütang nyemüyang, drüsehnü Tsingrangba nengse yocho, “Chünye Ihsanü anyemüyangnung nguchi nguko!”

²⁷Hütsüpü, Jisunü dongkhu chüducho ko alihmüthsü dhrirü anengnü Levi, abi Office la püm ngucho. Jisunü abi te yocho, “Ih iirung.”

²⁸Levinü shemüsucho, ko lüpcho pehjüpü abi iiwücho.

²⁹Hütsüpü Levinü abi kuhla Jisu nengdang thsüti arangcheh külüpcho, ko shirü yola tsü alihmüthsü dhrirü ko aparü adrong zehcho.

³⁰Farisirü ko yuzeng adorü khürünü Jisu mono nyümnü abi te yocho, “Tuepü nührünü alihmüthsü dhrirü ko amünyirü yola tsuyongro?”

³¹Jisunü arüh te lalingcho, “Tsayengrü nengdang akyangjürü müdhsüdah, ta füthsarü nengdang dhsüdahre.

³²Ih amüsarü lasih thsamülasohnung müro, ta münyirü nengdang rocho.”

³³Nyitsarü khürünü Jisu te yocho, “Johan monotinü adrongpi kongnü dangkhidangnangre, ko Farisirü monotinüsü hütsü roh-i nguchire; ta nü monotilü tsure ko yongre.”

³⁴Jisunü lalingcho, “kukangbong arüh yola lipü kuh lang würü shirüti nührünü kongsohnung mah-o? Hütsüta mah.

³⁵Ta arüh yolanü kuthribong notsinung nyümong tsü ronung, hütsüde arühnü kongnung.”

³⁶Jisunü arüh te yukitaba hisü yocho: “Sünüsü shü asi chahnü rehcho athreh chah mükhümkehre. Tunüo shü asi tsü rehrüpnung, ko shü asi dsi-o tsüsü ahi chah tsü müphishunung.

³⁷Mahkhang, sünüsü cikih anu shinga ahi la müliire, tunüo cikih anu tsünü shinga tsü tsohrüpnung, ko cikih tsü tungpehnung, ko shinga tsüsü thsangnyangnung.

³⁸Hütsü müli, cikih anu tsü shinga asi la liire!

³⁹Ko sünüsü cikih azicho yongpü khanglang anu müyongre. ‘Azicho tsü atsaubaepü abinü yore.’ ”