Read Sangtam Naga LUK 6 Bible Online

LUK 6 - Sangtam Naga bible

LUK 6

¹Sabath nyümong khüdu Jisunü luh lahkhu tsiyacho. Amonotinü mamüphung müchahsahnü arüh müyo lanü münohpü tsucho.

²Farisirü khürünü tsingdhengcho, “Yuzengnü mümülacho tuepü nührünü Sabath nyümong nguchiro?”

³Jisunü arüh te yocho, “David ko anyitsarüti yangseh lide abinü tu nguchicho hütsü nührünü mükhidhengcho do?

⁴Abinü Tsingrangba kuhla züducho ko Tsingrangba khyang mübücho hümthse tsü khyo tsucho, ko anyitsarüti khyangsü jücho. Hitari hümthse tsü bebürü chah khu aparünü tsunung tsü Yuzeng nyüm lile.”

⁵Ko Jisunü yocho, “Nyitsarü Tsurü tsü Sabath michah Abüdongba.”

⁶Sabath nyümong apa khüdu Jisunü Sinagog apa khüdu la züdupü docho. Hütsüla akheh tsalang sücho nyüh khüdu licho.

⁷Farisirü ko yuzeng adorü khürünü Jisunü Sabath nyümong kyangjü a mükyangjünang pü abi mülangjünung chehdhengyacho.

⁸Ta Jisunü arüh lümcho richeh ngu nyitsarüba te tsü yocho, “Yamüsung ko belang hila rung.” Ko abinü shemüsu hütsüla yacho.

⁹Hütsüpü Jisunü arüh te yocho, “Ihnü nührü te tsingdhengre: Ihsa yuzengnü Sabath nyümong tu nguchinung müla liro? Tronung a thsakehjünung? Nyüh khüdu khümchonung a mahkhang hütsü changjünung?”

¹⁰Ko Jisunü arüh atümung chah dhengcho ko abi te yocho, “Nü kheh müyungchüng.” Abinü müyungchücho ko abi kheh tsapehcho.

¹¹Arüh zichüronü Jisu chah tu nguchinung pü arühbürü yola yu kitacho.

¹²Hütsü shikhe la Jisunü akhang khüdu lang dangkhidangnangnung tuwücho ko hütsüla müyüp Tsingrangba te dangkhidangnangcho.

¹³Nyangnyü khüu, abinü amonoti abi yanglang dsicho ko arüh dhüre-anyüh throchehcho, ko arüh te abinü Riwürü pü dsicho:

¹⁴Simon (süte Peter dsicho) ko ani Andreu; Jakob ko Johan, Filip ko Bartholomeu,

¹⁵Mathi ko Thomas, Alfaeus tsurü Jakob, ko Simon (süte yanglih müirü dsicho)

¹⁶Jakob tsurü Judas, ko Judas Iskariot, sü kihyochüjürü kangcho.

¹⁷Khode Jisu akhang lang tsünü riwürüti yola jürocho, abinü amonoti khütango yola angah khüdu la yacho. Hütsüla nyitsarü khütango Judea lanü, Jerusalem lanü ko kihbekhüm yangditi Tyre ko Sidon lanü ro licho;

¹⁸arühnü abi yu nyinung ko arüh adhsa-ara kyangjüsohnung rocho. Amünyi nbünü dhsümthserütisü ro kyangcho.

¹⁹Atümungnü abi chah thahpünyücho, tunüo abi chahnü azi ronü arüh atümung kyangjücho.

²⁰Jisunü amonoti chah dhengcho ko yocho, “Nührü ailümrü akünyangnung; tunüo Tsingrangba yanglih nührü yo!

²¹Nührü ade yangrü akünyangnung; tunüo nührü kükyüsohnung! Nührü ade trarü akünyangnung; tunüo nührü münyünung!

²²“Nyitsarü Tsurü thsacholanü khode nyitsarünü nührü thrünyinang, mükhyüchonang, müchümükehnang ko nührü amünyiepü yonang, nührü akünyangnung!

²³Hütsü roh-i tikehde künyang, ko alongphinü tsohching, tunüo nührü khyang ninglang jiyü amülah yohpüjüle. Tunüo arüh jümürütinü hütsü kyokyo azikehrü te nguchicho.

²⁴“Ta ade nührü alirü khüta adrünung; tunüo akünyang akang tsü libehko.

²⁵Ade kükyo lirü khüta adrünung; tunüo nührü yangkongnung! Ade münyürü khüta adrünung; tunüo meshünung ko tranung!

²⁶“Khode atümungnü nührü tsacho senang khüta adrünung; arüh jümürütinü hütsü kyokyo azikehrüti nengdang arahkheh chocho.

²⁷“Ta Ihnü nührü I yu yuchirü te yore: Nührü rorüh müing, nührü thrünyirü te atsa nguching,

²⁸nührü chokehcholarü müwajüng, ko nührü mütsa bichirü nengdang dangkhidangnangjüng.

²⁹Khürünü nü müchüp khüdulang tangkhang, khüulangsü tangsohng; khürünü nü shü khyüjükhang, nü fükhümsü khyüsohng.

³⁰Nü te chingrü atümung khyang jüng, khode bürünü nüyo khyünang, hütsü thali tüching.

³¹Bürünü nührü khyang khüta nguchisohnyo nührünü lümro, nührünüsü arüh te hütsü roh-i nguching.

³²“Nührü te müirü te du nührünü müikhang, tu nengdang amüwa ngunung? Münyirü nüsü arüh te müirü lü müire!

³³Ko nührü te atsa nguchirü te du nührünü atsa nguchikhang, tu nengdang amüwa ngunung? Münyirü nüsü hütsü roh-i nguchire!

³⁴Nührünü thali ngunung alongdi lirü khyang du nührünü nyajükhang, tu nengdang amüwa ngunung? Adongdong ngunung nengdanglü münyirünüsü münyirü khyang nyajüre!

³⁵Doh! nührü rorüh müing; ko arüh te atsa nguching, ko thali ngunung mülongdipü nyajüng. Hütsütakhang nührü jiyü amülah ngunung, ko nührü Amichahba Tsingrangba tsurüti kangnung. Tunüo müsi müthri ko amükhyu nyitsarü tesü abinü müire.

³⁶Nührü Aunü yanglilümcho roh-i nührünüsü yanglilüm.

³⁷“Aparü yu tükha, ko Tsingrangbanü nührü yu mükhanung; aparü tümülangjü, ko Tsingrangbanü nührü mümülangjünung; bürü mülang pehjüng, ko Tsingrangbanü nührü mülangpehjünung.

³⁸Aparü khyang jüng, ko Tsingrangbanü nührü khyang jünung. Ajüje, nührü khyang ajeng, nyümchi, shühchi, dhradhranü jünung. Nührünü aparü nengdang khüiba akyahsing bichinang Tsingrangbanüsü nührü nengdang hütsü du bichinung.”

³⁹Ko Jisunü arüh te yukitaba hi yocho: “Nahtohrü khüdunü nahtohrü nünung mükoh; anyüding yongroh la thungyohnung.

⁴⁰Mono khüdu tsü adorü tenü adiuba mah; ta mono müipi, khode abi anyichoba thümnang, adoba kyo kangnung.

⁴¹“Tuepü nüpu nahtse la singnah zehcholü müngupü, nü jünirü nahtse la anyahlü dhengro?

⁴²Nüpu nah la singnahlü müngupü nühnü khüta nü jünirü te, ‘Ihnü nü nahtse la anyah tsü pehjünung o’ pü yochehnung? Nührü akhürahrüti! Nüpu nah lanü singnah tsü akhu pehng, hütsüpü du nü jünirü nah la anyah tsü pehjünung nühnü tsitsa ngunung.

⁴³“Singdong atsa chah singsih amütsa müsire, mahkhang singdong amütsa chah singsih atsa müsire.

⁴⁴Singdong müipi abükyü sihnü müdhere; zengdong chah ngurüsih müsire mahkhang zingshü chah shükusih müsire.

⁴⁵Nyitsarü atsa lasiking lanü atsa chürore; nyitsarü amütsa lasiking lanü amütsa chürore. Tunüo lasih la tu jeng liro hütsü du benü chore.

⁴⁶“Tuepü nührünü I te ‘Abüdongba, Abüdongba,’ pü dsiro, ta Ihnü yocholü münyiro?

⁴⁷Sünü I yanglang roro, I yu nyiro, ko hütsüri bichiro abi tu kyoro hütsü Ihnü nührü te ngunung.

⁴⁸Abi lung michah asoh jupü khyüm thsaba kuthsarü nyüh khüdu kyole. Kih dii rocho ko kuh chah tsü nyümkehcho, ta hütsü mümühachicho, tunüo hütsü drengdreng thsacho.

⁴⁹Ta sünü I yu yuchiro ko hütsü mübichiro, abi kuh thsade aying drengdreng mükhyümpü thsaba nyitsarü tsü kyole; khode kih dii ro hütsüba kuh chah tsü nyümkehcho, hütsü khüdupinü khülucho ko hütsü khüluba tsü athsangnyang khütoh-i thsacho!”