Read Sangtam Naga LUK 7 Bible Online

LUK 7 - Sangtam Naga bible

LUK 7

¹Jisunü nyitsarüti te yu hiri apüm yokhangpü abi Kapernaum lang wücho.

²Hütsüla Roman adirü khüdu kulirü sü abinü dee müi licho, hütsüvi tsü asünungthsa füthsa licho.

³Adibong tsünü Jisu nengdang yuchide, abinü Jihudarü azirü khürü müthehnü ro abi kuliba kyangjüng pü tsingdhengnung wüsohcho.

⁴Arühnü Jisu yanglang ro abi te kihchi yocho, “Hiba nyitsarünü nü arüku ngunung alenge.

⁵Abinü ihrü nyitsarü dee müire ko ihrü khyang Sinagogsü thsajüko.”

⁶Achotsü Jisunü arüh yola wücho. Abi kuh chihnungthsade adibong tsünü abi shangrüti abi yang müthehnü yocho, “Adirü, nüh tülongmüzi. Nüh I kuh lang ronungthsa Ih müdekheng,

⁷mahkhang nü yanglang Ipu ronungsü I jangjang müdekheng lümre. Yah yuzeng du jüng, ko I kuliba tsü kyangpehnung.

⁸Ih miinü I pohki rothsarü yohpüpü yuzeng pohki tase bichirü nyüh khüdu. Ihnü khüdu te, ‘wüng!’ khang abinü wünung; ko khüu te ‘Rung’, khang abinü rore; ko Ihnü I yurü te, ‘Hi nguching!’ khang abinü hütsü nguchire.”

⁹Hi yuchide Jisu nyemüyangcho; ko abinü ximüla abi khanglang rorüh amülung te yocho, “Ihnü nührü te yore, Israel la Ihnü hiroh-i yudsi khodesü müngudheng!”

¹⁰Yusi hirüti tsü thali adibong kuh lang wüdelü kuliba tsü kyangpü licho.

¹¹Tunyah mülipü Jisunü yangdi khüdu anengnü Nain lang amonoti ko sühdi amülahnü müyang wücho.

¹²Abi yangdi tbükhüm chihyeng, merang würü shiro mütohcho. Asüba nyitsarü tsü chomitpü tsurü hütsü du thsacho, ko amülung arangcheh yangdi la tsünü abükyü te iiwücho.

¹³Abüdongbanü abükyü ngude, alasih la abükyü nengdang thsa lümcho, ko abinü abükyü te yocho, “Tütra.”

¹⁴Hütsüpü abinü wünü kong chah tsü thahpücho, ko me dhirü tsünü yajücho. Jisunü yocho, “Dhrezaba! Ihnü nü te yore, Shemüsung!”

¹⁵Asüba nyitsarü tsü shemüsu pümcho ko chotanung dikehcho, ko Jisunü abi atpa khyang jücho.

¹⁶Arüh atümung adrünü jeng Tsingrangba secho. “Ihsa yola azikehrü amülah khüdu chüroko! Tsingrangba amüyurü khümchonung ro lile!”

¹⁷Jisu nengdang yusi tsü Judea lih ko mükangmüshü apümlang sobhocho.

¹⁸Khode Johan te amonotinü hiri apüm nengdang yocho, abinü arüh nyüh anyüh dsicho

¹⁹ko Abüdongba te hita tsingdhengnung müthehcho, “Aronung liba tsü nüh a mahkhang aparü khürü yingnung?”

²⁰Khode arühnü Jisu yanglang rocho, arühnü yocho, “Baptijüba Johan-nü aronung liba tsü nüh a mahkhang aparü khüdu yingnung pü tsingdhengnung nüh yang ihrü müthehchoe.”

²¹Hütsü shikhe la tsü Jisunü füthsa, adhsa-ara ko amünyi nbünü rangcho nyitsarü adrong kyangjücho, ko nahtohrü adrong ngusohcho.

²²Abinü Johan yusi hirüti te lalingcho, “Thali wüng ko nührünü tu ngucho ko yuchicho hütsü Johan te young: nahtohrünü ngure, jingjahrünü tsehchehre, mübhira kehrü müsachehre, nangtbengrünü yuchire, asürü kanglisohre, ko yuse atsa tsü ailümrü te thsingyure.

²³Sürünü I nengdang tu tütohnyünyeh müliro arüh akünyangnung!”

²⁴Johan yusi hirüti tsiko khanglang, Jisunü Johan nengdang amülung te chonung dikehcho: “Nührünü lipilih lang tu dhengnung wücho? Rangva nyübongnü füchi yacho dhengnung wücho mah-o?

²⁵Asehyahcho jengki khyürü khüdu dhengnung wücho mah-o? Hütsütari jengki khyürü tsü yangthsarü kuhla lire!

²⁶Nührünü tu dhengnung wücho? Azikehrü khüdu ang? Ho, yuje, ta nührünü azikehrü tenü awüu nguko.

²⁷Tunüo Johan nengdang amüsa yunü yore: ‘Ihnü nü bekhu nü lang rungnümsohnung I yusi hirü müthehnung.’

²⁸Jisunü yocho, Johan tsü lirocho nyitsarü yola atümung tenü adiu. Ta sü ninglang yanglih la azau liro abi tsü Johan tenü adiuba.”

²⁹Nyitsarü atümungnü abi yu nyicho; arüh ko alathsa alihmüthsü dhrirüti, arühnü Tsingrangba amüsa yu nyicho ko Johan-nü arüh baptijo licho.

³⁰Ta Farisirü ko yuzeng adorütinü arüh nengdang Tsingrangba alümcho tsü mükhyüchocho ko Johan khyang mübaptisohcho.

³¹Jisunü mütozah yocho, “Ade Ihnü tu te hiba shang nyitsarü hi müjangdhengnung? Arüh tu kyoro?

³²Arüh shithsachah pümba azarüti kyole. Mülung khüdunü khüdu te züderü, ‘Ihrünü nührü nengdang kukangba khi thsacho, ta nührünü münyiichi. Ihrünü meshü khi thsacho ta nührünü mütra!’

³³Baptijüba Johan rocho, abinü kongcho ko yongkha müyongcho ko nührünü yocho, ‘Abi chah amünyi nbü lile!’

³⁴Nyitsarü Tsurü rocho, abinü tsucho ko yongcho ko nührünü yocho, ‘Nyitsarü hi dheng! Abi amünyomüra ko amüxüprü, alihmüthsü dhrirü ko münyirü shangrü!’

³⁵Ta Tsingrangba lümlong tsü yuje-epü hütsü khyüchorü atümungnü ngusohre.”

³⁶Farisirü khüdunü Jisu yangtsunung dsiyohcho, ko Jisunü arüh kuh lang wücho ko yangtsunung nengdang pümcho.

³⁷Hütsüba yangdi la amünyilarü khüdu licho. Abükyünü Jisu tsü Farisiba kuhla yangtsu pümlepü yuchinü, axümlichi tuji alabaster füh khüdu jeng bipü ro

³⁸Jisu khangte, ajingte tranü anahshükihnü ajing kyangjücho. Hütsüpü abükyü kuvanü ajing nipehjücho ko ajing chah müthsüpnü axümlichi tuji tsünü müyühjücho.

³⁹Khode Farisiba tsünü hi ngucho, ajangjang lümcho, “Hiba nyitsarü hi yuje azikehrüe lang, abi chah thahpüba khingkurü tsü sünang müdhebae; tunüo abükyü tsü münyilarü khüdu lile!”

⁴⁰Jisunü abi te laling yocho, “Simon, Ihnü nü te lango ayonung lile.” Abinü yocho, “Youngtü, Adorü.”

⁴¹“Alirü khüdu te thsite teerü nyüh anyüh licho,” “Nyüh khüdu thsih münga ko akhüu tsü thsi dhünyang kehcho.

⁴²Anyüh sünüsü müsahchehchonü, abinü anyüding thsite pehjücho. Hütsükhang, anyüh yola sünü abi alaa müinung?”

⁴³Simon-nü lalingcho, “Ihnü lümchonü, Sü khyang alaa pehjücho, hütsüvinü alaa müinung.” Jisunü yocho, “Nühnü yuje yoko.”

⁴⁴Hütsüpü abinü khingkutpü yanglang ximülanü Simon te yocho, “Nühnü khingkurü hi münguo? Ih nü kuhla zürocho ko I jing thsüthohnung nühnü kih müjü, ta abükyü nahshükihnü I jing kyangjücho ko akuvanü nikungjücho.

⁴⁵Nühnü bemüthsüpnü Ih münüyoh, ta abinü Ih rodu I jing chah müthsüpcho müzahre.

⁴⁶Nühnü tujinü I thah nengdang mümüyühjü, ta abükyünü axümlichi tujinü I jing müyühjüko.

⁴⁷Hütsüeko Ihnü nü te yore, abükyünü ngusohba amüi amülah tsünü abükyü mülang khütango pehjükopü yuzi jüre. Ta sü khyang mülang azikyah pehjücho abinü amüi azikyah du ngusohre.”

⁴⁸Hütsüpü Jisunü khingkutpü te yocho, “Nü münyiti pehjüko.”

⁴⁹Aparü yangtsu chah pümrütinü arüh yola chotacho, “Amünyi mii pehjüba nyitsarü hi süo?”

⁵⁰Ko Jisunü khingkutpü te yocho, “Nü yudsinü nüh khümchoko; mülümxüpü tsieng.”