Read Sangtam Naga LUK 8 Bible Online

LUK 8 - Sangtam Naga bible

LUK 8

¹Azachah lipü yangditi ko yangdongti bongnü Tsingrangba Yanglih Yuse Atsa thsingyu wücho. Mono dhüre-anyüh tsü abi yola wücho,

²hütsü roh-i khingkurü khürü amünyi nbü ko adhsa-ara lanü kyangjücho: Mary (süte Magdalin pü dsicho) sü chahnü amünyi nbü dhünyeh iipehjücho;

³Joana, Chuza nitpü, sü Herod kuhla khehthsithsarü licho; ko Susana ko aparü khingkurü adrong sürünü arüh kuthsi Jisu ko amonoti nengdang jücho arühsü abi yola wücho.

⁴Jisu yanglang nyitsarü yangdi khüdu khanglang khüdu lanü mütozah rocho; ko khode sühdi amülah shibülungcho, abinü yukitaba hi yocho:

⁵“Mashurü khüdu mashunung wücho. Abinü mashude, khürü langthsilang longcho, ko ajingnü dhrümnahcho, ko uzatinü hütsü tsupehcho.

⁶Khürü lungsüh la longcho, ko khode fürü tsü surocho, alih kungrachonü mükupehcho.

⁷Majüh khürü zengtrung la longcho, ko hütsü zide khüpsehcho.

⁸Ko majüh khürü alih asu la longcho; ko anu tsü chinü thsihpinü asih sihcho.” Ko Jisunü yocho, “Hütsüeko nührü nangku kehkhang nyieng!”

⁹Abi monotinü Jisu te hiba yukitaba adüzü tuopü tsingdhengcho,

¹⁰ko abinü lalingcho, “Nührü khyanglü rangliba Ninglang yanglih lümlong müdhenung jüko, ta aparü nengdanglü yukitaba khu dunü hütsü rore, hütsünü arühnü ngunung ta müdhengchehnung, ko yuchinung, ta münyichehnung.

¹¹“Yukitaba adüzü tsü hi: Majüh tsü Tsingrangba yu.

¹²Langthsilang longba majüh adüzü tsü sürünü yuchirü; ta arüh müyudsisohnung ko mükhümchosohnung motsingnü ro arüh lasih lanü yusi tsü hitsire.

¹³Lungsüh yola longba majüh adüzü tsü sürünü yusi tsü yuchiro ko hütsü künyangseh khyüchore. Ta hütsü arüh chah soh mürare; arühnü azachah du yudsire ta khode athsatsü ronang, arüh shohjore.

¹⁴Zengtrung yola longba majüh adüzü tsü sürünü yuchiro; ta hiba akang nengdang lümtpahnah, kuthsi ko künyangküshi lümlong tsü zürorü ko arüh khüpsehre, ko arüh asih khodesü müzire.

¹⁵Alih asu la longba majüh adüzü tsü sürünü yusi tsü yuchiro ko lasih la yochonyi atsanü yohpüro ko asih müsih tashi arühnü rangchore.

¹⁶“Sünüsü dsi tahkehpü lohnü mühaptipüre mahkhang chongnong pohki müyohpüre. Ta kuhla zürorünü atsingse tsü ngunungthsa abinü hütsü avihpüsing chah vipüre.

¹⁷“Tuturü rang liro hütsü mishanung ko tuturü hapti liro hütsü ngunung ko müdhenung.”

¹⁸“Hütsüeko, nührünü khüta yuchiro müzahng; tunüo sü lango liro, abi khyang alaa jükehnung, ta sü müliro abi chahnü azikyah licho tsü mii hitsinung.”

¹⁹Jisu atpa ko anirüti abi yang rocho, ta sühdirachonü abi müshirüchehcho.

²⁰Khürünü Jisu te yocho, “Nü tpa e nü nirüti nüh shirünyo kuh bete yale.”

²¹Jisunü arüh atümung te yocho, “Sürünü Tsingrangba yu yuchiro ko bichiro arüh Itpa ko Inirütie.”

²²Nyümong khüdu Jisunü amonoti yola kihtang khüdu la züducho ko arüh te yocho, “Ihsanü kihdi khüulang tsü wünung.” Hütsüpü arühnü shemüsucho.

²³Arüh woyade, Jisu yüpsehpecho. Dhrongyengnü tsingxinyübong ro kihtang chah nyümkehcho, ko kihtang tsü kihnü jeng kangchonü arüh atümung dhsürü la licho.

²⁴Monotinü wünü Jisu khamüsu yocho, “Athsingyurü, Athsingyurü! Ihsa achangrüdue!” Jisunü shemüsu nyübong ko kiloh khyang yuzeng jücho; ko arühnü zahpehcho, ko longlüm kangcho.

²⁵Hütsüpü abinü monoti te yocho, “Nührü yudsi khüde liro?” Ta arüh nyemüyang drücho, ko khüdunü khüdu te yocho, “Nyitsarü hi süo? Abinü nyübong ko kiloh khyangsü yuzeng jüre ko arühnü ayu nyire!”

²⁶Jisu ko amonoti Galil kihdi khüulang Gerasa lih tsü chihcho.

²⁷Jisu kihdi lanü chüroyeng, amünyi nbünü rangcho nyüh khüdu yangdi langnü ro abi mütohcho. Bekhyah asheng hiba nyitsarü hi kuhla mülipü, tbhüdeng kongyo la du li rachicho.

²⁸Khode abinü Jisu ngucho, abinü tasenü khong ajing te thsürang züdecho, “Amichahba Tsingrangba Tsurü Jisu! Nüh I te tu nguchinyüro? Ihnü nü te kihchire, Ih tükhingchi!”

²⁹Abinü hi yoba hi, Jisunü amünyi nbü te tsü nyitsarüba chah tsünü tsieng pü yuzeng jücho khunü licho. Adrongpi hütsünü abi rangcho, ko ixilihnü ajing akheh rahpü akhangti la yohpü nye abinü hütsü tohnahrü ko amünyi tsünü abi rangmü lang tsisohcho.

³⁰Jisunü abi te tsingdhengcho, “Nü neng süo?” Abinü lalingcho, “I neng khütango” tunüo abi chah amünyi nbü khütango züdu licho.

³¹Amünyi tsünü Jisu te arüh jongnah müliba shukuh la tüyohjüpü kihchicho.

³²Hütsü amünyeh shüka tii arangcheh khüdu, akhanglangthring thütsuthüyong rachicho. Achotsü amünyi tsünü Jisu te arüh shüka tii yola tsü züdusohng pü kihchicho, ko abinü arüh khyang mülajücho.

³³Arühnü nyitsarüba chah tsünü chüro shüka tii la tsü züducho. Atii shünü lungdhong lang tsohnah jowü kihdi la tsü thsangsehcho.

³⁴Khode shüka nyahrütinü hütsü ngucho, arühnü shang wünü yusi tsü yangdi ko yangdongti la sobhocho.

³⁵Nyitsarütinü atikehcho tsü dhengnung wücho, ko khode arüh Jisu yanglang rocho, nyitsarü sü chahnü amünyi nbüti tsicho abi tsü atsatsa kangpü shü müpipü Jisu jingte püm ngucho, ko arüh atümungnü drücho.

³⁶Angurü tsünü nyitsarüba tsü khüta kyangcho hütsü nengdang aparü te yocho.

³⁷Hütsüpü, hütsü lih la lirü atümungnü Jisu te tsipehnung kihchicho, tunüo arüh dee drücho. Achotsü Jisu kihtang la züdu pümpü tsicho.

³⁸Nyitsarü sü chahnü amünyi tsicho abinü Jisu te kihchicho, “Ih nü yola ronung.” Ta Jisunü abi te hiroh-i yo tsisohcho,

³⁹“Kuh lang thali wüng ko Tsingrangbanü nü nengdang tu nguchicho hütsü young.” Nyitsarüba tsünü yangdi bongnü abi nengdang Jisunü tu nguchicho hütsü yo wücho.

⁴⁰Khode Jisu Galil khüulang thali rocho, nyitsarütinü abi khyüchocho, tunüo arüh atümung abi yingyacho.

⁴¹Hütsüde nyüh khüdu anengnü Jairus rocho; abi Sinagog la aying thsarü khüdu licho. Abinü ajangjang Jisu jingte mükhukeh abi te arüh kuh lang ronung kihchicho,

⁴²tunüo atsulatpü khüdu du, sü kang dhüre-anyüh azirü licho, hütsü asürü du licho. Jisu wüchi yade, nyitsarüti atümunglangnü ro abi mükangticho.

⁴³Arüh yola khingkurü khüdu kang dhüre-anyüh ashüh shonü thsa licho khüdu zehcho; abükyü licho kuthsi apüm müzang akyangba yangchi nye sünüsü abükyü mükyangjüchehcho.

⁴⁴Abükyünü amülung la Jisu khanglang ronü abi fükhüm bemi chah thahpücho; ko hütsüde tsünü ashüh shozahpehcho.

⁴⁵Jisunü tsingdhengcho, “Sünü I chah thahpücho?” Atümungnü richo, ko Peternü yocho, “Athsingyurü, nyitsarü sühdinü nüh tsütire.”

⁴⁶Ta Jisunü yocho, “Khürünü I chah thahpüko, tunüo I chahnü zii tside Ihnü müdhecho.”

⁴⁷Khingkutpü tsünü abükyü rangchehko pü müdhe dhridhri ro Jisu jingte mükhukehcho. Abükyünü atümung linü tuepü abükyünü thahpücho ko khüta hütsüde tsünü kyangpehcho hütsü yocho.

⁴⁸Jisunü abükyü te yocho, “Alechü, nü yudsinü nüh kyangjüko. Mülümxüpü tsieng.”

⁴⁹Jisunü hi yo yade, yusi hirü khüdu ayingthsaba kuh lanü ro yocho, “Nü tsulatpü süko,” “Athsingyuba tsü tülongmüzi.”

⁵⁰Ta Jisunü hütsü yuchi Jairus te yocho, “Tüdrü; ta yudsing, ko abükyü kyangnung.”

⁵¹Khode abinü kuh chihcho, Peter, Johan ko Jakob ko azatpü atpa au chah khu süsü müzürosohcho.

⁵²Hütsüla lirü atümung azatpü nengdang metra pümcho. Jisunü yocho, “Tütra; azatpü tsü sücho mah ta yüpjorü due!”

⁵³Arüh atümungnü abi münyodhengcho, tunüo abükyü tsü sükopü arühnü müdhecho.

⁵⁴Ta Jisunü abükyü khehla ramehpü dsinü yocho, “Surung, asila!”

⁵⁵Hütsüde abükyü akang kangli shemüsucho, ko Jisunü abükyü khyang lango atsunung jüng pü yocho.

⁵⁶Abükyü tpurüti nyemüyangcho, ta Jisunü arüh te atikehcho nengdang tsü sütesü müyonung yuzeng jücho.