Read Sangtam Naga LUK 9 Bible Online

LUK 9 - Sangtam Naga bible

LUK 9

¹Jisunü mono dhüre-anyüh tsü dsibülungcho ko arüh khyang amünyi nbü iipehnung ko adhsa-ara kyangjünung zii ko tase jücho.

²Hütsüpü Tsingrangba Yanglih thsingyunung ko füthsarü kyangjünung hiroh-i yopü arüh müthehcho,

³“Lang la nengdang ja thsa nye, shibha thsa nye, tsangdhi thsa nye, ko fükhümsü anyüh tühi.

⁴Khüdederü nührü khyüchonang, hütsüba yangdi lanü mütside hütsü la du lieng;

⁵khüdederü nührü mükhyüchonang, arüh nengdang amüzahnung khüdu roh-i nührü jing chah asongsong tiipehpü hütsüba yangdi lanü tsieng.”

⁶Monoti tsü shemüsu yangdongti atümung bongnü Yuse atsa thsingyu ko nyitsarüti kyangjo wücho.

⁷Galil la Yangthsaba Herodnü atikehcho atümung yuchide, abi lümdhamacho, tunüo khürünü Baptijüba Johan kangchehli ro lilepü yocho.

⁸Khürünü Elija ronü lile, ko adesü khürünü papade azikehrüti yola khüdu kangli ro lilepü yocho.

⁹Herodnü yocho, “Ihnü Johan ku dengko; ta Ihnü hiri yuchiba hi sü nengdango?” Ko abinü Jisu shirünung müküpcho.

¹⁰Riwürüti tsü thali rocho ko arühnü nguchicho atümung abi te yocho. Abi yola arüh nücho, ko Bethsaida dsiba yangdi lang arüh wücho.

¹¹Khode sühdinü hütsü yuchicho, arühnü abi iiwücho. Abinü arüh khyüchocho, ko arüh te Tsingrangba Yanglih nengdang yocho, ko füthsarüti kyangjücho.

¹²Nyüzeh rode, mono dhüre-anyüh tsünü abi te ro yocho, “Nyitsarüti tsü wünü yangdi ko yangdongti la tsuyongnung ko anyehkeh chah yangchinung tsisohng, tunüo hi anaying müdüm-e.”

¹³Ta Jisunü arüh te yocho, “Nührünü uthring arüh khyang lango atsunung jüng.” Arühnü lalingcho, “Ihrü licho apümnü hümthse münga ko ngu anyüh due. Hidoi nengdang wü tsuyongnung lisohnyürü mah-o?”

¹⁴(Hütsüla adhrerü dunü nyüh hajar münga-o licho.) Jisunü amonoti te yocho, “Nyitsarü tsü dhünyang-nyangnü pümsohng.”

¹⁵Monotinü hütsü roh-i nguchipü khanglang,

¹⁶Jisunü hümthse münga ko ngu anyüh tsü bipü, ninglang dhengnü Tsingrangba khyang anengse jüpü chenahcho, ko nyitsarüti khyang chahlanung monoti khyang jücho.

¹⁷Arüh atümung kükyo tsucho, ko monotinü nyingchonyingda loh dhüre-anyüh throbülungcho.

¹⁸Nyümong khüdu Jisu amüleng dangkhidangnang lide, monoti tsü abi yang rocho. Hütsüde abinü arüh te tsingdhengcho, “Nyitsarütinü Ih tsü süepü yoro?”

¹⁹Arühnü lalingcho, “Khürünü Baptijüba Johan, khürünü Elija, khang khürünü papade azikehrüti yola khüdu kangli rochobaepü yore.”

²⁰Abinü arüh te tsingdhengcho, “Nührünü Ih süero?” Peternü lalingcho, “Nüh Tsingrangbarü Mesia.”

²¹Hütsüpü Jisunü arüh te hi nengdang sütesü tüyo pü yuzeng jücho.

²²Abinü arüh te hisü yocho, “Nyitsarü Tsurü tsü chongchabae ko azibarüti, bebü ayingti ko Yuzeng adorütinü mükhyüchonung. Abi süsohnung, ta nyümong asang khanglang abi kangli ronung.”

²³Ko abinü arüh atümung te yocho, “Khürünü I khanglang ronyükhang, abinü abürü nbüchünungbae, ko nyümong mükhu palu khala dhipü I khanglang iirung.

²⁴Tunüo sünü palu akang khümchonyüro hütsü changnung, ta sünü I khyanglangnü palu akang changnang hütsü khümchonung.

²⁵Nyüh khüdunü limih apüm jingchopü apu akang changkhang abi lango jingchorü mah-o?

²⁶Sünü I nengdang ko I yu nengdang mih müxüpnang, Nyitsarü Tsurünüsü abi ahechi la, Au ahechi la ko Amüsa riwürüti ahechi la rode abi nengdang mih müxüpnung.

²⁷Ihnü nührü te yutsatsa yore: hila nührü yola Tsingrangba Yanglih müngu delü müsünung khürü zehle.”

²⁸Abinü hiri chopü nyümong keh-o lipü khanglang, Jisunü abi yola Peter, Johan ko Jakob nüpü akhang khüdu lang dangkhidangnangnung tuwücho.

²⁹Abi dangkhidangnang yade, aromih adhengnung mülichipehcho, ko abi shü dee riri thru kangcho.

³⁰Dhrongyengnü nyüh anyünü abi te chota ya ngucho. Anyüh tsü Mosa e Elija,

³¹arüh ahechi la chüronü khüta abi tunyah mülipü Tsingrangba lümcho tikehsohnü Jerusalem la sünung hütsü nengdang Jisu te chotacho.

³²Peter ko amüyangrüti yüpsülahcho, ta arüh surocho, ko Jisu ahechi ko abi te yarü nyüh anyüh tsü ngucho.

³³Arüh Jisu pehjüpü tsiyade, Peternü abi te yocho, “Abüdongba, Ihsa hila libahi khütoh-i atsao! Ihsanü shü kuh asang thsanung, nü nengdang khüdu, Mosa nengdang khüdu ko Elija nengdang khüdu.” (Abinü tu choro apunüsü mütsüpcho).

³⁴Abi chotachi yade, nyükhi khüdu ronü arüh khümkicho; ko nyükhi tsünü arüh khümkide monoti tsü drücho.

³⁵Nyükhi la tsünü yuva khüdunü yocho, “Hiba hi I Tsurü, sü Ihnü throchehcho, abi yu nyieng!”

³⁶Khode yuva tsü zahcho, hütsüla Jisu nabi du licho. Monotinü hiri apüm nengdang yah-a ducho, ko arühnü tu ngucho hütsü nengdang sütesü hütsü shikhe la müyocho.

³⁷Nyümong khüu Jisu ko amono asang tsü azonglangnü jürocho, ko sühdi amülah khüdunü Jisu shirücho.

³⁸Amülung yola nyitsarü khüdunü züdecho, “Athsingyurü! I tsurü dhengjüng, tunüo I tsurü hi due!

³⁹Dhrongyengnü anbü khüdunü abi rangre ko zingseh, abe la müjümüphi chüro, mapchire ko dee khesohre.

⁴⁰Nü monoti te hütsü iipehjüng pü Ihnü kihchicho, ta arühnü mükoh.”

⁴¹Jisunü lalingcho, “Nührü yudsi müliba ko thsamehba nyitsarüti! Khüdoi chah Ih nührü te linung ko rangchonung?” Hütsüpü abinü nyitsarüba te tsü yocho, “Nü tsurü tsü hila norung.”

⁴²Azaba tsü ro yade, amünyi nbü tsünü abi alih la khülusohcho ko zingchisohcho. Jisunü amünyi nbü tsü yübücho ko azaba tsü kyangjüpü au khyang abi thali jücho.

⁴³Nyitsarü atümungnü Tsingrangba Akohba zii ngunü nyemüyangcho. Nyitsarüti tsü Jisunü nguchicho apüm nengdang nyemüyang lide, abinü amonoti te yocho,

⁴⁴“Ihnü nührü te tu yonung liro hi tünbüchü! Nyitsarü Tsurü tsü nyitsarü khehla jünung thsako.”

⁴⁵Ta monotinü hütsü tu adüzünang münyichehcho. Hütsü arühnü münyichehnungthsa arüh lüm shütijücho, ko hütsü abi te tsingdhengnung arühnü drücho.

⁴⁶Monoti yola arüh sü adiubaopü yube jicho.

⁴⁷Arühnü lümba tsü Jisunü richeh ngucho, achotsü abinü azarü khüdu noro abi müshüm yasohpü,

⁴⁸abinü arüh te yocho, “Sünü azarü hitari I nengla khyüchonang abinü Ih khyüchore; ko sünü Ih khyüchonang abinü Ih müthehbongsü khyüchore. Tunüo nührü atümung yola sü azauba abi tsü adiuba lile.”

⁴⁹Johan-nü yocho, “Abüdongba, nyitsarü khüdunü nü nengla amünyi nbü iipehcho Ihrünü nguko, ko Ihrünü abi iiticho, tunüo abi Ihsa mülung yola müzeh.”

⁵⁰Jisunü abi ko aparü monoti te yocho, “Abi tüiti, tunüo sünü nüh münyümro abi nü lahpi lile.”

⁵¹Jisu ninglang nükeh tsinung shikhe chii rode, abinü Jerusalem lang shemüsunung dhrongchehcho.

⁵²Abinü Samaria la yang khüdu la lüpcho rungnüm yingnung nengdang, bekhu yusi hirü müthehcho.

⁵³Ta hütsüla nyitsarütinü abi mükhyüchocho, tunüo abi Jerusalem lang würepü müdhecho.

⁵⁴Khode Jakob e Johan nyühnü hi ngucho, anyünü yocho, “Abüdongba, arüh tahpehsohnung shulüm Ihrünü ninglangnü michang dsicho o?”

⁵⁵Jisunü ximüla arüh yübücho.

⁵⁶Hütsüpü Jisu ko amonotinü yang palang wücho.

⁵⁷Arüh lang la woyade, nyüh khüdunü Jisu te yocho, “Nüh khüdederü wonang Ih nüh iironung.”

⁵⁸Jisunü abi te yocho, “Shirungti lungkhi lile, ko uzati asüp lile, ta Nyitsarü Tsurülü ngakeh kyahshang chah khüdesü müle.”

⁵⁹Abinü aparü khüdu te yocho, “Ih iirung.” Ta hütsüba nyitsarü tsünü yocho, “Abüdongba, akhu Ih thali wü Iu me rangnung.”

⁶⁰Jisunü lalingcho, “Asürü tsü arühbürü asürü khyang dhrürangsohng. Ta nühlü wüng ko Tsingrangba yanglih sobhoung.”

⁶¹Aparü khüdunü yocho, “Ih nüh iironung, Abüdongba; ta Ih akhu wü ihrü tsutpurü te aza yu yonung.”

⁶²Jisunü abi te yocho, “Sünü akheh luh xüba la yohpüpü ximüla dhengnang abi Tsingrangba Yanglih nengdang müdekheng.”