Read Sangtam Naga AZIKA YU 1 Bible Online

AZIKA YU 1 - Sangtam Naga bible

AZIKA YU 1

¹Hiba vakha la Israelrü Jordan Yongkhi nyüchürolang akungaselih la liyade Mosanü arüh te chotacho yu zehle. Arüh Suf shündhün Jordan ngah la khüulang Paran yangdi ko akhüulang Tofel, Laban, Hazeroth ko Dizahab kahla licho.

²(Sinai zong lanü Kadesh, Barnea chihnung tsü Edom lih khu nyümong dhüre-kheh khyo tsehcho.)

³Arühnü Ijip pehjüpü, kang yüreu choo dhüre-kheh la akhudiba nyümong, ABÜDONGBAnü müyurü te yosohnung yuzeng jücho lüpcho Mosanü arüh te yocho.

⁴Hi ABÜDONGBAnü Heshbon yangdi yangthsarü Amor-rü Yangthsaba Sihon ko Ashtarot ko Edrei yangditi la Bashanrü Yangthsaba Og hiri kohchehpü khanglang tikehcho.

⁵Hi Moab lih la müyurüti Jordan nyüchüro lahpi liyade, Mosanü Tsingrangba yuzeng ko adoba changnah yonung dikehcho. Abinü yocho,

⁶“Ihsa Sinai zong la liyade, ABÜDONGBA, Ihsa Tsingrangnü Ihsa te yocho, ‘Nührü hiba zong la lixah liko.

⁷Kuh tsü lohng ko shehmüing. Amor-rü azong lih ko mükangmüshü lih, Jordan Ngah, kihjing lahpi azong lih ko angah lih ko Mediteranean jüp chii wüng. Kanan lih ko Lebanon zong khu wü Eufrates yongkhi arangcheh tsü chii wüng.

⁸Ih ABÜDONGBAnü nührü jümürü Abraham, Isak, Jakob ko arüh chahnü trahchochoti te nyengchoba lih tsü hiri apüm lile. Wüng ko hütsü mükuu khyüng’ ”

⁹Mosanü müyurü te yocho, “Ihsa Sinai zong la liyade Ihnü nührü te yoko, ‘Nührü nünung bhamüling hi I nengdang dirale. I mülengnülü mükoh.

¹⁰ABÜDONGBA nührü Tsingrangnü ning chah chenghiti kyo nührü suhsohko.

¹¹ABÜDONGBA nührü jümürü Tsingrangnü, Abinü nyengchocho kyo, nührü hajar-pi alaa suhsohng ko müwajüng!

¹²Ta I mülengnü khüta nührü khiyu khajünung bhamüling hi hichehnung?

¹³Ahung müipi lanü lümlong ali, anyicheh ko alümjing khürü throchehng ko Ihnü arüh nührü michah xükümnung yohpüjünung’

¹⁴Ko hi tsalepü nührünü khyüchocho.

¹⁵Hütsünü nührünü hung müipi lanü throchehcho lümlong ali ko alümjingti tsü Ihnü khyücho ko nührü michah xükümnung arüh yohpüjücho. Khürü müyurü hajar khürü thsih khürü dhünyang ko khürü dhüre michah dhengyehnung yohpücho. Ihnü ahung apüm la thsazirü thsanungsü throchehcho.

¹⁶“Ihnü arüh te thülacho, ‘Nührü müyurüti yola khiyu chürocho nyidheng. Ko nührübürü nyitsarü thsanye mahkhang nührü yola lirü shuparü nengdang thsanye, khiyu apüm yuje khaang.

¹⁷Tsahdheng-kudheng yu tükha; süsü thsanye atümung akyokyo khaang. Süsü tüdrü, tunüo yukhaba tsü Tsingrangba chahnü rore. Nührü nengdang khiyu khürü dirakhang, I yanglang hirung, hütsü Ihnü khajünung.’

¹⁸Hütsü te müjang, anguchinung lüpcho nengdang Ihnü nührü khyang athülaba jüko.”

¹⁹“Ihsanü ABÜDONGBA Ihsa Tsingrangnü tu yocho hütsü nguchicho. Ihsanü Sinai zong pehjücho ko adrünung lipilih khu Amor-rü azong lih lang wücho. Khode Ihsanü ro Kadesh Barnea chihcho,

²⁰Ihnü yocho, ‘Adelü ABÜDONGBA Ihsa Tsingrang Ihsa jümürü Tsingrangnü jünungba Amor-rü azong lih tsü chihko. Dheng, hütsüta Abinü mülacho kyo, wüng ko hütsü khyüng. Tütütohnyünyeh mahkhang tüdrü.’ ”

²²“Ta nührünü I te ro yocho, ‘Lang atsauba müdhenung ko yangditi tsü tu kyoro müdhenung nengdang Ihsanü tsehleh füzathsarü khürü müthehnung’ ”

²³“Hütsüta nguchinung tsalepü thsachonü, Ihnü ahung müipi lanü khüdu-khüdu nyüh dhüre-anyüh throchehcho.

²⁴Arühnü azong lih lang tsü Eshkol Ngah chii wücho ko alimih tsü jüchocho.

²⁵Hütsü lih lanü arühnü Ihsa khyang singsih khürü hirojücho, ko ABÜDONGBA Ihsa Tsingrangnü Ihsa khyang jüba lih tsü dee asu lih-epü yocho.”

²⁶“Ta nührünü ABÜDONGBA nührü Tsingrang yuzeng nyümcho ko nührünü hütsüla tsü müzüducho.

²⁷Nührünü jümjüm yocho: ABÜDONGBAnü Ihsa thrünyire. Abinü hiri Amor-rü khehla Ihsa jo kyüsehsohnung du Ijip lanü Ihsa nücheh norocho lile.

²⁸Tuepü Ihsa hütsü lang wünung? Ihrü drüle. Hütsüla lirü nyitsarü tsü Ihsa tenü re azeh-u ko athsengthsengu, ko arüh tsü ning chii tbüticho yangditi la lirepü awürüti tsünü Ihsa te yocho. Arühnü hütsüla akurahrüti ngucho.”

²⁹“Ta Ihnü yocho, ‘hütsüri nyitsarüti tsü tüdrü.

³⁰ABÜDONGBA nührü Tsingrangnü nührü nünung ko Abinü Ijip la ko lipilih la nguchicho nührünü ngucho kyo, Abinü nührü nengdang khatajünung.

³¹Au khüdunü atsurü pühcho kyo Abinü Ijip lanü hi chii nührü norocho nührünü nguko’

³²Ta Ihnü nührü te yonye, lede Abinü nührü münguh wü nührü amüdongchah dheng yohpüjünye, nührünü Abi chah müyudsi.

³³Nührü langnünung, Abinü nührü aromang michang dongdi ko anyümong nyükhi dongdinü nücho.”

³⁴“ABÜDONGBAnü nührü longmüsücho tsü yuchicho, achotsü abinü zichüro yuchümcho,

³⁵‘Hiba amükhyu shang hila nührü khüdu dusü nührü jümürü khyang Ihnü jünung nyengchoba asu lih la tsü müzüduchehnung.

³⁶Jefune tsurü Kaleb du züdunung. Abinü I te yuje cho licho, hütsünü Ihnü abi ko abi trah khyang abinü jüchoba lih tsü jünung.’

³⁷Nührü thsacholanü ABÜDONGBAnü I te mii zichüro yocho, ‘Nüh mii hütsüla müzüdunung.

³⁸Ta Nun tsurü nü trorü Joshua rezehsohng. Abinü Israelrü no alimih tsü khyünung.’ ”

³⁹“Hütsü ABÜDONGBAnü Ihsa apüm te yocho, ‘Nührü tsuzarü sürü nührünü arorüh khehla züdunungepü yoba, ade atsa amütsa mümüdheba azarü liro, arühnü du züduchehnung. Ihnü alih tsü arüh khyang jünung ko arühnü hütsüla linung.

⁴⁰Ta nührü nengdanglü Amoh kihdi lang tsünü akungaselih lang thalieng.’ ”

⁴¹“Nührünü lalingcho, ‘Mosa, Ihrünü ABÜDONGBA nyüm amünyi shitpahko. Ta ade, ABÜDONGBAnü mülacho kyo ihrünü mahnung.’ Hütsüta azong lih mahnung tsü amülaepü lüm, nührünü khata wünung rungnümcho.”

⁴²“Ta ABÜDONGBAnü I te yocho, ‘Arüh te mümahnung yu jüng, tunüo Ih arüh te müzehnung, ko arorühnü arüh kohnung.’

⁴³Ihnü nührü te ABÜDONGBA yu tsü yocho, ta nührünü münyicho. Nührünü Abi nyüm yocho ko kükhing nührünü azong lih lang tsü shemüsucho.

⁴⁴Hütsüde azongti la liba Amor-rü tsü thsah atii kyo chürocho. Arühnü nührü Horma chii iirocho ko Edom zong la arühnü nührü kohchehcho.

⁴⁵Hütsüde nührünü ABÜDONGBA te züdecho, ta Abinü nührü te mülalingcho ko münyicho.”

⁴⁶“Hütsüpü Ihsa Kadesh la anyahli lipü khanglang,