Read Sangtam Naga AZIKA YU 12 Bible Online

AZIKA YU 12 - Sangtam Naga bible

AZIKA YU 12

¹“ABÜDONGBA, nührü jümürü Tsingrangnü nührü khyang jüba lih la tsü lide nührünü bichinung yuzeng tsü hiri lile. Hütsüri nyieng!

²Hütsü lih la mübüba tsingrangti azong athseng akhang chah ko sing adhülüm pohki libati tsü thsangnyangjüng.

³Arüh Bholu tsü mapnahjüng ko arüh amüsa lung dongditi tsü kengzangzangjüng. Ko arühnü thali khodesü hütsüri la mümübüsohnung Ashera tsingranglarü trüp-pehjüng ko arüh kyothriti thsüpnah pehjüng.

⁴“Hiri nyitsarünü arüh Tsingrang mübücho kyo, nührünü ABÜDONGBA nührü Tsingrang tümübü.

⁵Nührü lih apüm lanü Müyurünü ro Abi mübüsohnung ABÜDONGBAnü müdüm khüdu throchehnung.

⁶Hütsüla nührü trüp mübü ko apa kang mübüti amübü jünung, nührü dhüre nohlüm ko amübü, ABÜDONGBA te nyengchocho jiyü, amüküp mübü ko nührü misü ko san chahnü akhu mütrücho mübüng.

⁷Hütsüla ABÜDONGBA, nührü Tsingrang sünü nüh ko nührü kukhi müwajücho, abinü nührünü nguchiba atsa tsü tsunung ko künyangnung.

⁸“Hütsü shikhe rode, ade nguchicho kyo nührünü münguchinung. Ade yingcheh nührü thsanyücho thsa mübo roko,

⁹tunüo nührü tbachi ABÜDONGBA nührü Tsingrangnü jüba lih la tsü müzüdue.

¹⁰Khode nührünü Jordan Yongkhi kehnang, ABÜDONGBAnü nührü khyang alih tsü khyüsohnung ko hütsüla linung. Nührü rorüh apüm chahnü Abinü nührü khümcho yohpünung ko nührü tbachi linung.

¹¹ABÜDONGBAnü Abi mübüsohnung müdüm khüdu du throchehnung ko Ihnü mülacho lüpcho hütsüla nührünü hironung: atrüpba ko apa kangmübü, dhüre nohlüm ko amüküp mübü ko ABÜDONGBA te nyengchocho amüküp mübü.

¹²Hütsüla Abi jingte nührü tsuzarüti kulirü ko nührü yangdi la liba Levirü zeh künyang linung; Levirülü arüh yo alih mülepü lümkehng.

¹³Nührü jünyücho la nührü kangmübü müjünung;

¹⁴nührü hung khüdu lih la ABÜDONGBAnü throchehnung alih müdüm khüdu la du tsü mübünung. Hütsüla du trüp mübü ko apa kangmübü Ihnü mülachoti apüm mübünung.

¹⁵“Ta nührü khüde linang masü la nührü kanglungrü müpseh tsunung kohle. ABÜDONGBAnü müwajücho aichi tsunung kohle. Nührünü shümüshü mahkhang shuhu tsucho kyo, amüsa nye amümüsa nye nührü atümungnü tsunung kohle.

¹⁶Ta nührünü ashüh tütsu; kih roh-i alih la tungpehng.

¹⁷ABÜDONGBA khyang amübü jücho; dhüre nohlüm fürü, yongkha, mahkhang olive tuji, mahkhang nührünü ABÜDONGBA te nyengchocho jiyü akhu mütrücho misü ko san, nührü amüküp mübü ko apa amübü apüm nührü kuh lanü tütsu.

¹⁸ABÜDONGBA nührü Tsingrangnü throchehcho müdüm khüdu la tsü Abi jingte, nührü, nührü tsuzarü ko kulirü, nührü yangdi la lirü Levirü zeh tsubae. Ko hütsüla nührünü nguchicho la tsü nührünü künyang.

¹⁹Ko nührü akang ayung, nührünü Levirü tsü tüthrüchachüpeh.

²⁰“Khode ABÜDONGBA nührü Tsingrangnü Abinü nyengchocho kyo, nührü lih jaa kangsohnang, nührünü tsunyüde shuh tsunung kohle.

²¹Athrochehba müdüm tsü nührü nengdang shurakhang, ABÜDONGBAnü jücho misü mahkhang san masü müpsehnung kohle ko Ihnü yocho kyo, nührü lichah shuh tsü tsung.

²²Ayahnü müsa nye mümüsa nye masünü, shümüshü mahkhang shuhu kyo, nührünü tsung.

²³Ashüh du shuh la tsü zehpü tütsu, tunüo akang tsü ashüh la tsü zehle, ko akang tsü shuh te mütsubae.

²⁴Ashüh tsü tütsu; ta kih roh-i alih la tungpehng.

²⁵Nührünü yuzeng hi nyikhang, ABÜDONGBA künyangnung ko nührü ko nührü trah tsa linung.

²⁶Nührü amübü ko ABÜDONGBA te nyengchocho amüküp mübü tsü mübüji müdüm khüdu lang tsü hiwüng.

²⁷Kangmübü tsü hütsüla mübüng ko hütsü bholu chah riri trüpnung. Nührünü ashu tsuba kangmübüti tsü hütsüla mübüng ko ashüh tsü bholu chah tungkehjüng.

²⁸Ihnü mülacho lüpcho yuje cho bichieng ko lede nengdang nüh ko nü trah tsa linung, tunüo athsalang ko ABÜDONGBA nührü Tsingrang künyangnung thsa du nührünü nguchinung.

²⁹“Nührünü arüh lih mah wüde, ABÜDONGBA nührü Tsingrangnü yuchoti tsü changjünung ko nührünü hütsü khyünung ko hütsüla linung.

³⁰ABÜDONGBAnü hütsüri yuchoti changjüpü khanglang, arüh mübü yangthsa tüithsa, tunüo hütsü asüba dhsürü lile. Arüh ithsa mübünungthsa arüh Tsingrang mübüba tünyicho.

³¹Arühnü arüh tsingrang mübücho kyo nührünü ABÜDONGBA nührü Tsingrang tümübü, tunüo arüh tsingrang mübüba la ABÜDONGBAnü thrünyiba nguchi lüpcho zehle. Arühnü bholu chah michang la arüh tsuzarü mii kangmübü jüre.

³²“Ihnü mülacho du nguching; tu tülahkeh mahkhang tu tüpeh.