Read Sangtam Naga AZIKA YU 18 Bible Online

AZIKA YU 18 - Sangtam Naga bible

AZIKA YU 18

¹“Israel la bebürü hung Levirünü alih nohlüm müngunung; hütsü mülih, arüh tsü ABÜDONGBA khyang jücho amübü ko apa kangmübü tsu akang linung.

²Aparü hung kyo arüh alih mülinung; ABÜDONGBAnü nyengchocho kyo, arüh nohlüm tsü ABÜDONGBA bebürü thsa linung.

³“Khodederü misü mahkhang san kangmübü jonang, apüh, akümjing ko ami tsü bebürü khyang jünung.

⁴Fürü, olive tuji ko shunbüh lasü akhudiba nohlüm arüh khyang jünung.

⁵Nührü hung apüm lanü ABÜDONGBA Levirü tsü lede bebürü kang Abi dikehsohnung throchehcho.

⁶“Israel yangdi masü lanü Levirü khürü mübüji lang tsü ro, aparü hütsüla dikeh yarü Levirü kyo dikehnyükhang,

⁷ro ABÜDONGBA abi Tsingrang bebürü kang dikehnung kohle.

⁸Aparü bebürü te müjang abisü tsuyongnung ngunung ko kukhirünü tu abi khyang mühehro hütsü zahkehnung kohle.

⁹“Khode ABÜDONGBA nührü Tsingrangnü jüba lih lang tsü nührü ronang, hütsüla lirü saying tüithsa.

¹⁰Nührü bholu michang la tsü nührü tsuzarü kangmübü tüjü; zii-mongba, müchehba mahkhang ziikeh nguchi hitari tübichisoh ko

¹¹asürü nbü te müchehnung asülang tüwüsoh.

¹²ABÜDONGBA nührü Tsingrangnü hitari nguchirü thrünyire, hütsünü nührü züdude hütsüla lirüti Abinü iipehjücho.

¹³ABÜDONGBA chah du longlang lieng.”

¹⁴Hütsüpü Mosanü yocho, “Nührünü khyünung liba lih la lirünü, azii-amongrü ko müchehmülohrü yu müyurünü nyi lire, ta ABÜDONGBA nührü Tsingrangnü hitari nguchi nguchinung mümülare.

¹⁵Hütsü mülih, nührübürü nyitsarü yolanü abinü nührü khyang Ih kyo azikehrü khüdu müthehchünung ko nührünü Abi yu nyieng.

¹⁶“Nührü Sinai zong la shibülung nyümong, nührü khyang ABÜDONGBA yuva tüyuchisoh mahkhang Abi zehba michang tsü anyüpili tüngusoh pü nührünü kihchicho, tunüo nührü sükhang mütsa pü nührünü drücho.

¹⁷Hütsünü ABÜDONGBAnü I te yocho, ‘Arühnü dee thsehthsa kihchiko.

¹⁸Ihnü arüh yang nüh kyo arühbürü nyitsarü yolanü azikehrü khüdu müthehchünung; abinü tu chonung Ihnü yonung, ko Ihnü mülacho lüpcho abinü müyurü te yonung.

¹⁹Abinü I nengla chonung ko sünü abi yocho münyinang Ihnü abi khingchinung.

²⁰Ta Ihnü mümülapü azikehrü khürünü I nengla chokhang, hütsü ngang, abi sünung ko azikehrü sünü aparü tsingrang nengla chonang abi sünung.’

²¹“Azikehrü khüdu yuzi tsü ABÜDONGBA chahnü rocho a mahnang müdhenung nühnü nyemüyangnung kohle.

²²Azikehrü khüdunü ABÜDONGBA nengla chopü hütsü mütikehkhang, hütsü ABÜDONGBA yusi mah. Azikehrü tsünü apu lümyunü choko ko abi drünung tu müdhsüdah.