Read Sangtam Naga AZIKA YU 2 Bible Online

AZIKA YU 2 - Sangtam Naga bible

AZIKA YU 2

¹“Achangkathsa Ihsanü ximüla Amoh kihdi lang tsü ABÜDONGBAnü mülacho kyo akungaselih lang tsü wücho ko Edom azong lih la tsü anyahli rümchicho.

²“Hütsüde ABÜDONGBAnü I te

³Ihsa azong lih la tsü kükyo liko ko adelü kihkulang lahpi wübaepü yocho.

⁴Nührü khyang yuzeng hiri jüng pü Abinü I te yocho: ‘Nührü ade, Esau chahnü trahchocho za liba nührü jünirü Edom azong lih khu tsinung thsako.

⁵Arühnü nührü drünung ta nührünü arüh te tükhata, tunüo Ihnü nührü khyang arüh lih lanü dsiosü müjünung. Ihnü Edom tsü Esau trah khyang jüko.

⁶Nührünü arüh chahnü tsuyongba ko kih lihnung kohle.’

⁷“ABÜDONGBA nührü Tsingrangnü nührünü nguchicho lüpcho la khüta müwajücho lümchehng. Lipilih hidoi la nührü rümchide Abinü nührü xükümcho. Kang yüre tashi Abi nührü te li rore ko nührü thsütah lüpcho nguko.

⁸“Achotsü Ihsanü shehmüicho ko Elath ko Eziongeber yangditi lanü Asü kihdi lang züduba lang tsü pehjücho ko Ihsanü Moab nyüchürolang ximülacho.

⁹ABÜDONGBAnü I te yocho, ‘Lot chahnü trahchocho Moabrü khyang alongmüzi tüjü, mahkhang arüh nyüm khata tümüsu. Ihnü arüh khyang Ar yangdi tsü jüko, ko Ihnü nührü khyang arüh lih lanü dsiosü müjünung.’ ”

¹⁰(Emim pü dsiba akurahrü hung khüdu Ar la tsü licho. Arüh tsü aparü akurahrü hung khüdu Anakimrü kyo athsengthseng licho.

¹¹Anakim kyo arüh te Refaim püsü dsicho; ta Moabrünü arüh te Emim dsicho.

¹²Hor-rü tsü Edom la licho, ta Israelrünü ABÜDONGBAnü arüh khyang jücho lih lanü arüh rorüh iipehcho kyo, Esau trahnü arüh tsü iipehcho, arüh yucho changjücho ko hütsüla arühbürü licho.)

¹³“Hütsüpü ABÜDONGBAnü Ihsa te yocho kyo, Ihsanü Zered Yongkhi kehcho.

¹⁴Hi Ihsanü Kadesh Barnea pehjüpü kang sangrepü-keh khanglang licho. ABÜDONGBAnü yocho kyo, hütsüba shang la athrungrüti atümung sükhangpehcho.

¹⁵ABÜDONGBAnü arüh müchangjü yingcheh Abinü arüh nyüm du licho.

¹⁶“Arüh atümung süko khanglang,

¹⁷ABÜDONGBAnü Ihsa te yocho,

¹⁸‘Chünye nührünü Ar lang lanü Moab lih khu tsinung.

¹⁹Hütsüpü nührü Lot chahnü trahchocho Amonrü lih amünyethsa ronung. Arüh khyang alongmüzi tüjü mahkhang arüh nyüm khata tümüsu, tunüo Ihnü arüh khyang jücho lih lanü nührü khyang müjünung.’ ”

²⁰(Hiba lih te hütsüla lirü nyitsarü nengla Refaimrü lih püsü dsicho; Amonrünü Zamzumim dsicho.

²¹Arüh tsü Anakimrü kyo athsengthseng thsacho. Arüh khütang thsacho ko akurahrü hung licho. Ta Amonrü lisohnung ABÜDONGBAnü arüh changjücho.

²²ABÜDONGBAnü akyokyo tsü Edom azong lih la lirü, Esau trah Edomrü chahsü nguchicho. Edomrü ade liyaba lih hütsüla lisohnung Abinü Hor-rü changjücho.

²³Mediteranean kihdi jüp tsü Krete mütro lanü rorüti licho. Arühnü alih abüdongrü Avim tsü changjücho ko kihjinglang Gaza chii arüh lih apüm khyüjücho.)

²⁴“Ihsanü Moab khu tsipü khanglang, ABÜDONGBAnü Ihsa te yocho, ‘Ade shemüsung ko Arnon Yongkhi kehng. Heshbon la Amor-rü Yangthsaba Sihon ko abi lih zeh nührü khehla jüre. Abi mahng ko abi lih khyünung dikehng.

²⁵Chünye tinü apümlang lirü nyitsarütinü nührü drüsohnung. Nührü dangchichonü mii atümungnü dhridhri drünung.’

²⁶“Hütsüde Ihnü Kedemot akungaselih lanü Yangthsaba Sihon yang mongtsa yu hita hipü müthehcho.

²⁷‘Nü lih khu ihrü lahkhu tsisohng. Ihrünü lang tenü müzapü müchongkhüti lahkhu tsinung.

²⁸Atsucho ko ayongcho shulüm ihrünü angang jünung. Jordan Yongkhi tsü keh ABÜDONGBAnü ihrü khyang jüba lih la tsü züdunung nengdang,

²⁹nührü lih lahkhu du tsisohng. Edom la lirü Esau trah ko Ar la lirü Moabrünü arüh lih khu ihrü tsisohko’

³⁰“Ta Yangthsaba Sihon-nü abi lih lahkhu tsinung Ihsa khyang mümülacho. ABÜDONGBA nührü Tsingrangnü, ade Ihsa liyaba hi abi kohcheh Ihsa khyang khyüsohnung abi hongzi nyümsohcho.

³¹“Hütsüde ABÜDONGBAnü I te yocho, ‘Dheng, Ihnü Yangthsaba Sihon ko abi lih khüta mütsa kangsohko; abi lih khyüng ko hütsüla lieng.’

³²Sihon-nü abi nyitsarü atümung nüpü Jahaz yangdi shündhün Ihsa te khatanung chürocho,

³³ta ABÜDONGBA Ihsa Tsingrangnü Ihsa khehla abi jücho ko Ihsanü abi, atsurüti ko anyitsarü atümung kyüsehcho.

³⁴Hütsü te müjang Ihsanü yangditi apüm mahchehcho ko khingkurü, adhrerü ko azarü atümung süsohcho. Süsü nying müpehjücho.

³⁵Ihsanü kanglungrü khyücho ko yangditi tsü changjücho.

³⁶ABÜDONGBA Ihsa Tsingrangnü Arnon Ngah achangka, Aroer lanü Angah long la yangdi Gilead chii khyüsohcho. Tu yangdi tbü Ihsa nengdang amükohnung mülicho.

³⁷Ta Ihsanü Amonrü lih mahkhang Jabbok Yongkhi mahkhang azong lih yangdi ABÜDONGBA Ihsa Tsingrangnü Ihsa te tüwüpü yaticho yangditi te amünyeh mii müwücho.