Read Sangtam Naga AZIKA YU 20 Bible Online

AZIKA YU 20 - Sangtam Naga bible

AZIKA YU 20

¹“Nührünü khatanung wüde, nührü rorüh nyübong kari, kuri ko rothsarü nührü tenü adrongu ngude, arüh tüdrü. Ijip lanü nührü nüchehba ABÜDONGBA Tsingrang nührü te linung.

²Nührü khata müsuwüde, bebürü khüdu bekhu ronung ko rothsarü te yonung,

³‘Israelrü, nyieng! Chünye nührü rothsa würe. Nührü rorüh tüdrü, mahkhang suzah mahkhang lümdhama tüli.

⁴ABÜDONGBA nührü Tsingrang, nührü yola würe ko abinü nührü khyang akoh jünung.’

⁵“Hütsüpü adirüti tsünü amülung te yonung, ‘Hila khürü kuh thsachopü mümüsacheh-epü mülio? Likhang, abi thali kuh lang wüng. Mahkhang, abi khata la tsü sükhang, abi kuh tsü khürünü müsachehnung thsa kangnung.

⁶Shükusih khyümdupü khüdupisü mülaatsueba nyitsarü khürü lirü mah-o? Likhang, abi thali kuh lang wünung, mahkhang, abi khata la tsü sükhang, abi yongkha tsü khürü nganglang thsanung.

⁷kukangnung müxingta dupü khürü lirü mah-o? Likhang, abi thali kuh lang wüng, mahkhang abi khata la tsü sükhang abinü müxing liba khingkurü tsü khürünü khyünung thsa kangnung’

⁸“Adirüti tsünü hisü yonung, ‘Khürü adrüchonü suh müzeh lirü mah-o? Likhang, abi kuh lang thali wüng. Mahkhang, aparü mii müsi sümpehnung.’

⁹Khode thsazirüti tsünü rothsarüti te tsü chokanang, mülung müipi nengdang anüchirü throchehnung.

¹⁰“Nührünü yangdi khüdu mahnung thsade hütsüla lirü khyang tsü yangtsa külüpnung bekhyah jüng.

¹¹Arühnü tbükhüm khangthru yangtsa külüpkhang, arüh tsü nührü hehneh thsanung.

¹²Ta arühnü yakhang, nührünü mükangtieng.

¹³Hütsüpü khode, ABÜDONGBA nührü Tsingrangnü nührü khyang yangdi tsü kohchehsohnang, hütsüla lirü adhrerü atümung kyüsehng.

¹⁴Ta nührünü khingkurü azarü, akang kuthsi ko yangdi la licho lüpcho khyüng. Nührü rorüh kohro lüpcho nührünü bichieng. ABÜDONGBAnü hütsü nührü khyang jüko.

¹⁵Hütsüta nührü linung lanü ashu za liba yangditi te bichieng.

¹⁶“Ta ABÜDONGBA nührü Tsingrangnü nührü khyang jüba lih la yangditi nührünü kohcheh delü, atümung kyüsehng.

¹⁷Hiri nyitsarü atümung riri changjüng: Hit-rü, Amor-rü Kananrü, Perizrü, Hivrü ko Jebusrü.

¹⁸Arühnü arüh Tsingrang mübüba nguchi nührü te donü nührü khyang ABÜDONGBA nyüm amünyi müshitpahsohnungthsa arüh kyüsehkhang.

¹⁹“Nührünü yangdi khüdu kohchehnung müküpde, betiba tsü bekhyah anyahli khyünye, singsidong tükyopeh. Asih tsü tsung ta singdong tsü tüthsangnyang; singdong tsü nührü rorüh mah.

²⁰Yangdi tsü mümahchehde hütsüla bichinung singdong apa kyühnung kohle.