Read Sangtam Naga AZIKA YU 21 Bible Online

AZIKA YU 21 - Sangtam Naga bible

AZIKA YU 21

¹“Adüzünü, ABÜDONGBA nührü Tsingrangnü jünung lih la nyüh khüdu luh khüdu la so jo nguko ko sünü müpsehchonang nührünü mütsüp.

²Nührü langnürü ko yukharünü wü me jocho la tsünü amünyeh-u yangdi kahla adukah tsü kii dheng.

³Hütsüpü me jocho lanü amünyeh-u yangdi lanü khodesü münguchidhengsohcho misü aza khüdu throcheh hirung.

⁴Arühnü hütsü münyehthsa yongkhi shündhün ko khodesü xünah fürü mükhyümdhengcho müdüm khüdu yang no jowüng, ko hütsüla arühnü ahong xisahjünung.

⁵Hütsülasü Levirü bebürü wünung, tunüo shühkhatohcho khiyu atümung arühnü khanung. ABÜDONGBA nührü Tsingrangnü abi dikehnung ko abi nengla müwajünung arüh throchehko.

⁶Hütsüpü me joba tenü amünyeh-uba yangla langnürüti atümungnü misü michah tsü arüh kheh mütsapehnung

⁷ko yonung, ‘Ihrünü nyitsarü tsü mükyühseh ko sününang mümüdhe.

⁸ABÜDONGBA, Nühnü Ijip lanü nüchehba Nü nyitsarü Israelrü khyang mülang pehjüng. Ihrü khyang mülang pehjüng ko achomükeh nyitsarü müpsehcho ihrü tümütang.’

⁹Ko hütsüta, ABÜDONGBAnü yocho nguchinü, amüpsehcho tsü nührü bha müthsanung.

¹⁰“Khode ABÜDONGBA nührü Tsingrangnü nührü khyang khata la akoh jonang ko nührünü arangyohrü khürü khyonang,

¹¹arüh yola atsah atsa lazarü ngu khyünyükhang,

¹²abükyü tsü nührü kuh lang nowüng ko abükyü kuva hehpehsohng, müzi müjüpsohng,

¹³ko ajengki mülihjüng. Abükyünü arüh tpurü nengdang nührü kuhla choo khüdu meshüsohng; hütsüpü khanglang, nühnü abükyü khyünung kohle.

¹⁴Akhanglang, nühnü mükhyünyükhang, abükyü lehcheh tsisohng. Nühnü khingnü abükyü te thsangnyangrü tsü, nühnü abükyü ayurü kyo bichi ko inung mükoh.

¹⁵“Adüzünü, nyüh khüdunü anitpü anyüh khyüko ko anyüdingnü adhrerü nümüsujüko, ta aukhuba tsü abinü mürulatpü tsurü tsü mah.

¹⁶Khode nyitsarüba tsünü atsurü anyüh kahla kuthsi changjünung dhrongchehnang, abinü mürulatpü tsurü khyang tsü aukhuba nohlüm tsü jünung mükoh.

¹⁷Abinü mürulatpü tsurü mahnye, aukhuba khyang tsü nohlüm anyüh jüng. Nyitsarünü aukhuba müdhebae ko abi ngunung athsalang nohlüm tsü jüng.

¹⁸“Adüzünü, nyüh khüdu tsurü hongzi ko yocho münyi azarü khüdu lile ko tpurünü khingchi nye arüh yocho münyi.

¹⁹Khang, abi tpurünü arüh yangdi la langnürü yang nowü yukhasohnung yasohng.

²⁰Tburünü arüh te yonung, ‘Ihrü tsurü hi hongzi ihrü nyümre ko ihrü yocho münyire; abinü kuthsi müzangre ko müchamülohre.’

²¹Hütsüpü yangdi nyitsarü tsünü lungnü abi kengseh süsohnung, ko hütsüta hiba amünyi hi phungpehnung. Israel la atümungnü hütsü yuchinung ko drünung.

²²“Nyüh khüdu abi nguchi amütsa nengdang süsohkhang ko abi fü tsü dongdi khüdu chah tbengkhang,

²³hütsüla müyüp müyohpünung. Hütsü nyümongnü dhrürangnung, tunüo dongdi chah me tbengpüba tsünü alih chah Tsingrangba chokehchola hirore. ABÜDONGBA Tsingrangnü nührü khyang jüba lih tsü mümünyinungthsa, me tsü dhrürangpehng.