Read Sangtam Naga AZIKA YU 24 Bible Online

AZIKA YU 24 - Sangtam Naga bible

AZIKA YU 24

¹“Adüzünü nyüh khüdunü khingkurü khüdu khyüko ko akhanlang abükyü mükhyünyo kangko, tunüo abükyü chah lango rangchehko. Hütsünü abinü zaba vathrah thrahnü, hütsüri abükyü khyang jüpü abi kuh lanü za müthehchüko.

²Hütsüpü abükyü tsü aparü khüdu te kuh kangko,

³ko abinüsü abükyü tsü mükhyünyü, azaba vathrah thrahjüpü abi kuh lanü za müthehchüko. Mahkhang adüzünü anii anyüuba süko.

⁴Khüi khütanye, abükyü akhudiba anii tsünü abükyü thali mükhyünung; abükyü tsü münyipehcho kyo khiching. Abinü thali abükyü khyükhang, hütsü ABÜDONGBAnü mükünyangnung. ABÜDONGBA nührü Tsingrangnü nührü khyang jüba lih la nührünü hitari adrünung amünyi tüshitbah.

⁵“Nyüh khüdu kuh kangyeng, rothsala mahkhang apa amülung nguchi la müyohbae; kang khüdu nengdang abi kuhla anitpü te künyangta lisohng.

⁶“Nührünü nyüh khüdu khyang lango nyasohde, yuzi nengdang abi thsang tükhyüjü. Hütsü kukhi akang hitsijüre.

⁷“Sünü ajünirü Israelrü rang hiwünü abi ayurü kangsoh mahkhang ayurü thsa itsunang, abi süsohnung. Hütsüta nguchi amünyi tsü pehnung.

⁸“Khode nührü mübhiranü thsangnangnang, Levirü bebürünü tu yonang hütsüta nguchinung müdheing; Ihnü arüh khyang athülaba jücho roh-i nguching.

⁹Nührü Ijip lanü chürode ABÜDONGBA nührü Tsingrangnü Miriam chah tu nguchicho hütsü lümchehng.

¹⁰“Nührünü nyüh khüdu khyang lango nyajüde, yuzi thsa abinü nü khyang jünung shü khyünung züdude tüizüdu;

¹¹dongkhu ying ko apu jangjang hichüro jüsohng.

¹²Abi ailümrü thsakhang, müyüp tüyohbü;

¹³Abi müpipü yüpsohnung romang mükhu abi khyang jüng. Hütsüde abinü künyangnung ko ABÜDONGBA nührü Tsingrangnü nü te künyangnung.

¹⁴“Ajünirü Israelrü nye mahkhang nührü lih la liba shuparü nye, ailüm chongcharü tükiyohchü.

¹⁵Nyümong mükhu abi nyükheh ngang tsü nyü müzüdue denü jüng; abi thsi tsü thsütahle ko hütsü ngunung nahmürah yingre. Nühnü abi khyang müjükhang, abinü nüh nyüm ABÜDONGBA te züdenung ko nüh mülangnung.

¹⁶“Tsuzarünü thsamehcho ngang tpurü tüsüsoh ko tpurü thsamehcho ngang tsuzarü tüsüsoh, nyüh khüdu apu thsamehcho ngang du süsohng.

¹⁷“Shuparü ko mürürü tükiyohchü; ko chomilarü thsi nyade yuzi thsanung ajengki tükhyüjü.

¹⁸Nührüsü Ijip la ayurü thsa licho ko ABÜDONGBA nührü Tsingrangnü lehchehchoepü lümchehng; hütsünü Ihnü yuzeng hi nührü khyang jüre.

¹⁹“Nührünü maxade, mabhong khürü müi pehjükhang, hütsü khyünung thali tüwü; hütsü shuparü, mürürü ko chomilarü nengdang lile, hütsü dunü ABÜDONGBA nührü Tsingrangnü nührünü nguchicho lüpcho la müwajünung.

²⁰Nührünü olive khüdupi laa tsikhang, amütrüh laanung thali tüwü, hütsü shuparü mürürü ko chomilarü nengdang lile.

²¹Nührünü shükusih khüdupi laa tsikhang, anyüpiu anyingcho laanung tüthali; anyingcho tsü shuparü, mürürü ko chomilarü nengdang lile.

²²Nührü Ijip la ayurü thsa lichoepü khodesü tünbüchü; Hütsünü du Ihnü hiba yuzeng hi nührü khyang jüre.