Read Sangtam Naga AZIKA YU 26 Bible Online

AZIKA YU 26 - Sangtam Naga bible

AZIKA YU 26

¹“ABÜDONGBA nührü Tsingrangnü jüba lih tsü khyüpü ko hütsüla lipü khanglang,

²nührü müipinü nührünü yangyocho tsahma apüm lanü loh khüdu la khyüpülung mübüji lang tsü hiwüng.

³Hütsü shikhe tungtethsaba bebüba yanglang wüng ko abi te young, ‘Ihrü jümürü te nyengchoba lih la tsü adelü Ih züroko pü ABÜDONGBA I Tsingrang te müdhesohre.’

⁴“Nü kheh lanü bebübanü loh tsü khyünung ko ABÜDONGBA nührü Tsingrang bholu te yohpünung.

⁵Hütsüpü ABÜDONGBA bete nühnü yu hiri khinung! ‘Ihrü jümürü tsü rümchi liba Arameanrü thsacho, abinü abi kukhi nüpü wü Ijip la licho. Arüh hütsü lang wüde azikyoh du thsacho, ta arüh arangcheh ko rezeh yucho khüdu kangcho.

⁶Ijiprünü ihrü mütsa bichicho ko ihrü ayurü kang nguchisohcho.

⁷Hütsüde ihrünü ABÜDONGBA ihrü jümürü Tsingrang te züdecho. Abinü ihrü yuva yuchicho ko ihrü chongcha, bhamüling ko athsangthsi ngucho.

⁸Abi zii ko tasenü Ijip lanü Abinü ihrü nüchehcho. Abinü thsayahiya ko anyemüyangnungti nguchi adrünung tikehsohcho.

⁹Abinü ihrü hila norocho ko hiba nyikih ko thsakukih pohba lih hi ihrü khyang jücho.

¹⁰Hütsüeko ade, ihrünü Abinü jücho amüwa lanü ABÜDONGBA khyang akhu yangyocho hirojüre.’ Hütsüpü loh tsü ABÜDONGBA bete müdongpüpü mübüng,

¹¹ABÜDONGBA nührü Tsingrangnü nührü ko nührü kukhi nengdang atsa jücho shulüm Abi te künyang; ko Levirü ko nührü yola liba shuparüsü hiba thsüti la zehsohng.

¹²“Kang asang müipi, nührü tsahma lanü dhüre nohlüm Levirü, shuparü, mürürü ko chomilarü nengdang jüng, hütsünü du, amülung müipi la arühsü atsunung ngunung. Khode nührünü hi nguchinang,

¹³ABÜDONGBA te young: ‘Amüsa dhüre nohlüm I kuhla tu nying müle; Ihnü hütsüri Levirü, shuparü, mürürü ko chomilarü khyang jüko. Dhüre nohlüm nengdang Nü yuzeng tusü Ihnü münyipü mahkhang nbücho müle.

¹⁴Ih meshü lide Ihnü hütsüri lanü tusü mütsu; Ih mümüsa lide kuh lanü hütsüri lanü tu mükhyü; ko Ihnü hütsüri lanü tusü asürü nengdang amübü müjü. O ABÜDONGBA, Ihnü Nü yocho nyiko; dhüre nohlüm lahpi Nühnü mülacho apüm Ihnü nguchiko.

¹⁵Ninglang Nü Amüsa müdüm lanü dhengchahchüng ko Nü müyurü Israelrü müwajüng; ko Nühnü ihrü jümürü te nyengchoba nyikih ko thsakukih pohyaba lih hi müwajüng.’

¹⁶“Chünye ABÜDONGBA nührü Tsingrangnü Abi yuzeng apüm nyisohnyüre hütsüeko nührü lasih apümnü hütsüri yuje cho bichieng.

¹⁷Chünye nührünü ABÜDONGBA tsü nührü Tsingrangepü khyüchoko; Abi yocho nyinung, Abi yuzeng bichinung Abinü yocho apüm nguchinung nührünü nyengchoko.

¹⁸Chünye ABÜDONGBA Apunü nyengchocho kyo, nührü Abi müyurü thsanung khyüchoko; ko Abi yuzeng apüm bichisohnyüre.

¹⁹Abinü külüpcho yucho yola nührü yucho adiu kangsohnung, ko nührünü Abi khyang anengse ko adhichi hirojünung. Abinü nyengchocho kyo, nührü apu müyurü tsatsa kangsohnung.”