Read Sangtam Naga AZIKA YU 27 Bible Online

AZIKA YU 27 - Sangtam Naga bible

AZIKA YU 27

¹Hütsüpü Mosa ko Israel zirütinü müyurü te yocho, “Ihnü chünye nührü khyang jüba athülaba hi apüm bichieng.

²Nührünü Jordan Yongkhi keh ABÜDONGBA nührü Tsingrang anyengchocho lih la tsü züdu nyümong, nührünü lung amülülah khyüm ko hütsü münohng,

³ko yuzeng ko adoba hiri hütsü chah tsü thrahng. Khode nührünü ABÜDONGBA nührü Tsingrangnü nührü jümürü te nyengchoba nyikih ko thsakukih pohba lih la tsü züdunang,

⁴ko nührü Jordan khüulang tsü linang, Ihnü chünye nührü te thülacho kyo Ebal Zong chah lung tsü khyüm ko hütsü münohng.

⁵Hütsüla idhse noh-ha mükehcho lung dunü bholu khüdu külüpm,

⁶tunüo nührünü ABÜDONGBA nührü Tsingrang khyang bholu tsü amühamnahcho lung dunü külüpm. Hütsüla, trüp mübü kangmübü tsü jüng,

⁷ko nührünü kangmübü jünung ko akehta mübü tsü tsunung ko ABÜDONGBA nührü Tsingrang bete künyangtanung.

⁸Ko hütsü amünohcho lung chah tsü yuzeng tsü tsitsa thrahkehng.”

⁹Hütsüpü, Mosa ko Levirü bebürü zehnü Israel müyurü atümung te yonung, “Israelrü, türongrong ko I yu nyieng. Chünye nührü ABÜDONGBA, nührü Tsingrang müyurü kangko;

¹⁰hütsüeko Abi yocho nyieng ko Ihnü nührü khyang chünye jüba yuzeng hiri apüm bichieng.”

¹¹Hütsüpü Mosanü Israelrü te yocho,

¹²“Nührünü Jordan kehpü khanglang, müyurü michah amüwa seyohjüde, Gerizim zongchah ahung hiri yanung: Simeon, Levi, Juda, Isakar, Josef ko Benjamin.

¹³Ko chokehcholade Ebal zongchah hung hiri yanung: Reuben, Gad, Asher, Zebulun, Dan, ko Naftali.

¹⁴Levirünü yu hiri züde chonung:

¹⁵“ ‘Sünü sing, lung mahkhang idhsenü kyothri külüp-pü rang hütsü mübüro, abi chokehcholaang; ABÜDONGBAnü kyothri thrünyire.’ “Ko nyitsarü apümnü lalingnung, ‘Amen!’

¹⁶“Sünü atpa au jengreng müdrüro, abi chokehcholaang; “Ko nyitsarü apümnü lalingnung, ‘Amen!’

¹⁷“ ‘Sünü kurümrü luhrü lohchiro, abi chokehcholaang.’ “Ko nyitsarü apümnü lalingnung, ‘Amen!’

¹⁸“Sünü anahtohrü amünülang nüro, abi chokehcholaang! “Ko nyitsarü apümnü lalingnung, ‘Amen!’

¹⁹“Sünü shuparü, mürürü ko chomilarü kihyochüro, abi chokehcholaang! “Ko nyitsarü apümnü lalingnung, ‘Amen!’

²⁰“Sünü au nitpü khüdu te mükhong au khyang ashah hirojüro, abi chokehcholaang! “Ko nyitsarü apümnü lalingnung, ‘Amen!’

²¹“Sünü kanglungrü te mükhongro, abi chokehcholaang! “Ko nyitsarü apümnü lalingnung, ‘Amen!’

²²“Sünü anilarü mahkhang au tsularü mahkhang atpa tsularü te mükhongnang, abi chokehcholaang! “Ko nyitsarü apümnü lalingnung, ‘Amen!’

²³“Sünü atpa-thsatpü te mükhongnang, abi chokehcholaang! “Ko nyitsarü apümnü lalingnung, ‘Amen!’

²⁴“Sünü rangnü müpsehro, abi chokehcholaang! “Ko nyitsarü apümnü lalingnung, ‘Amen!’

²⁵“Sünü achomükeh nyüh khüdu müpsehnung thsi khyüro, abi chokehcholaang! “Ko nyitsarü apümnü lalingnung, ‘Amen!’

²⁶“Sünü Tsingrangba yuzeng ko adoba apüm münyiro, abi chokehcholaang! “Ko nyitsarü apümnü lalingnung, ‘Amen!’