Read Sangtam Naga AZIKA YU 28 Bible Online

AZIKA YU 28 - Sangtam Naga bible

AZIKA YU 28

¹“Nührünü ABÜDONGBA nührü Tsingrang yochonyikhang ko Ihnü chünye nührü khyang jüba yuzeng hiri apüm yuje cho bichikhang, Abinü limih la yucho apüm tenü nührü adiu kangsohnung.

²ABÜDONGBA nührü Tsingrang yocho nyieng ko amüwa hiri apüm nührü yo thsanung:

³“ABÜDONGBAnü nührü yangdi ko luh müwajünung.

⁴“ABÜDONGBAnü nührü khyang tsuzarü adrong, tsahma akükyüh, ko misü ko san adrong müwajünung.

⁵“ABÜDONGBAnü nührü fürü ko tsang müwajünung.

⁶“ABÜDONGBAnü nührünü nguchicho lüpcho la müwajünung.

⁷“ABÜDONGBAnü nührü rorüh kohjünung. Arühnü lang khüdulang dunü nührü benung, ta arüh lang apümlang nührü betenü tsishonung.

⁸“ABÜDONGBA nührü Tsingrangnü nührü nguchi müwajünung ko nührü shih fürünü jengjünung. Abinü jüba lih la tsü abinü nührü müwajünung.

⁹“Nührünü ABÜDONGBA nührü Tsingrang yocho nyikhang ko Abinü mülacho apüm nguchikhang, Abinü nyengchocho kyo, Abinü nührü apu müyurü kangsohnung.

¹⁰Hütsüde limih la nyitsarü atümungnü ABÜDONGBAnü nührü apu yo thsanung throchehkopü müdhenung, ko arühnü nührü drünung.

¹¹ABÜDONGBAnü nührü jümürü te nyengchocho kyo, Abinü nührü khyang tsuzarü, kanglungrü ko tsahma hiri apüm müwajünung.

¹²Nührünü apa yucho adrong khyang nyasohnung ta nührü nülü sü chahnüsü münyanungthsa, Abinü ning chahnü akyang tsing müthehnung ko nührünü nguchicho apüm la müwajünung

¹³ABÜDONGBA nührü Tsingrangnü nührü yuchoti michah mono mah ta langnürü kangsohnung. Nührünü chünye Ihnü jüba yuzeng hi apüm yuje cho bichikhang, nührü lede pungrohiro linung.

¹⁴Ta nührünü khodesü Abi yocho münyi tüli mahkhang aparü tsingrang mübo tüdikeh.

¹⁵“Ta nührünü ABÜDONGBA nührü Tsingrang yocho münyikhang, ko Ihnü chünye nührü khyang jüba yuzeng hiri apüm yuje cho mübichikhang, hiri amütsa apüm nührü chah tikehnung:

¹⁶“ABÜDONGBAnü nührü yangdi ko luh chokehcholanung.

¹⁷“ABÜDONGBAnü nührü fürü ko tsang chokehcholanung.

¹⁸“ABÜDONGBAnü nührü khyang tsuzarü, tsahma ko misü ko san azikyah du jonü nührü chokehcholanung.

¹⁹“ABÜDONGBAnü nührünü nguchicho lüpcho chokehcholanung.

²⁰“Nührünü amütsa nguchi ABÜDONGBA mükhyüchokhang, Abinü nührü michah achangba, lümdhama ko athsangthsi nührü riri müchangde hirojünung.

²¹Nührünü ngunung liba lih la tsü apüm müchangde dhsara khüdu khanglang khüdu Abinü müthehnung.

²²ABÜDONGBAnü nührü chah axahtaba, abümba ko rihmi thsaranü xüpnung; Abinü nührü tsahma thsangnyangsohnung akungse ko atrüpba nyübong müthehnung. Hiri achangba hi nührü müsüde nührü te linung.

²³Tsing müronung ko nührü lih tsü idhse kyo müküp kangnung.

²⁴Tsing mülih ABÜDONGBAnü nührü müchangde asongsong ko lihpi tsingxinyübong müthehnung.

²⁵“ABÜDONGBAnü nührü michah nührü rorüh khyang akoh ngusohnung. Nührünü khüulangnü arüh mahnung ta nührünü arüh betenü lang apümlang tsinung ko nührü chah tikehcho ngude limih la lirü apüm drümüyangnung.

²⁶Nührü süde, uza ko rangmü kanglungrünü ro nührü me tsunung ko arüh iipehnung süsü mülinung.

²⁷ABÜDONGBAnü Ijiprü chah nguchicho kyo nührü chah kii chürosohnung. Abinü nührü fü la mathsanü tsütisohnung. Amükihnü tingtinung ko müsahnung ta akyangba mülinung.

²⁸ABÜDONGBAnü nührü lüm chahsohnung; abinü nührü nahtohsoh ko lümdhamasohnung.

²⁹Anahtohrü kyo nührünü anyümong hümchi rachinung ko nührünü nührü lang müngunung. Nührü nguchicho tulasü amüwa mülinung, müjangmüji nührü sehchinung ko kengcho khyünung, ta nührü tronung süsü mülinung.

³⁰“Nührü lazarü khüdu müxingnung, ta aparü khüdunü abükyü khyünung. Nührünü kuh thsanung, ta khodesü hütsüla mülitpahnung. Nührünü shükusih khyümnung ta khodesü hütsü sih mütsutpahnung.

³¹Nührü nahtse tenü nührü misü tinahnung, ta shuh tsü mütsutpahnung. Nührünü ngunü nührü gadu tphah tsinung ko nührü khyang thali müjünung. Nührü san tsü nührü rorüh khyang jünung ko nührü trorü süsü mülinung.

³²Nührünü ngunü nührü tsurü ko tsularüti tsü shuparü khyang ayurü thsanung jünung. Nyümong mükhu nührü tsuzarü thalinung nahmürahchonü nührü nahkoh tohyohnung.

³³Nührünü hütsüdoi khee nguchiba tsahma apüm tsü shuparünü khyünung ko nührübürülü müjangmüji sehchi ko mütsa bichinung.

³⁴Chongcha tsünü nührü lüm chahnung.

³⁵ABÜDONGBAnü nührü jing tsü amükyangba ko adohba mathsanü jengsohnung; Kiinü jing lanü thah chii tsütisohnung.

³⁶“ABÜDONGBAnü nührü ko nührü Yangthsaba, nührü ko nührü jümürünü khodesü mülidhengcho shuparü lih lang notsinung; hütsüla nührünü singlungrünü külüpcho tsingrangti dikehnung.

³⁷ABÜDONGBAnü nührü tsisohnung yuchoti la tsü, nührü chah tikehcho ngu nehnung; arühnü nührü münyodhengnung ko adüzü thsa bichinung.

³⁸“Nührünü khütang shunung, ta aikyah du xanung, tunüo khengqunü nührü tsahma tsukhangnung.

³⁹Nührünü shükusih khyümnung ko yuthsachehnung, ta nührünü shükusih mülanung ko hütsüri lanü cikih müyongnung, tunüo azahnü shükusih tsü tsunung.

⁴⁰Nührü lih apümlang olive Singdong chinung, ta nührünü olive tuji müngunung, tunüo olive aji kungpehnung.

⁴¹Nührü tsurü ko tsularüti linung, ta arüh chahkhangnung, tunüo arüh khata la arangyohrü kang rang tsinung.

⁴²Nührü sing ko tsahma apüm kangzahnü thümjünung.

⁴³“Nührü lih la liba shuparü tase alaa alaa dinung, ta nührülü khai khai kyühchonung.

⁴⁴Nührü khyang nyasohnung arüh thsi linung, ta nührünü arüh khyang nyasohnung tu mülinung. Achangka la arüh tsü nührü yangthsarü kangnung.

⁴⁵“Hiri achangba apüm nührü chah ronung ko nührü müchangde arüh nührü te linung, tunüo nührünü ABÜDONGBA nührü Tsingrang yocho münyi ko Abinü jücho yuzeng apüm mübichi.

⁴⁶Hütsü lede nengdang nührü ko nührü trah michah Tsingrangbanü yukhacho yuzi linung.

⁴⁷ABÜDONGBAnü lüpcho la nührü müwajüko, ta nührünü akünyang lasihnü Abi müdikeh.

⁴⁸Hütsünü ABÜDONGBAnü nührü nyüm müthehnung liba nührü rorüh tsü nührünü dikehnung. Nührü kongnung, xonung ko tbhüdeng linung ko lüpchonü thsatsünung. Nührü müchangkhangde, ABÜDONGBAnü dee mütsa bichinung.

⁴⁹ABÜDONGBAnü nührü nyüm alih changka langnü nührünü mümüdheba yu chorü yucho khüdu noronung. Arühnü nührü chah müdi kyo thsücho jüronung.

⁵⁰Arühnü aza-azi atümung te tu müchomangpü mütsa bichinung.

⁵¹Arühnü nührü kanglungrü ko chisicho tsunung ko nührü kongseh sünung. Arühnü nührü khyang fürü, yongkha, olive tuji, kanglungrü ko san tu münyingjünung ko nührü sünung.

⁵²Arühnü ABÜDONGBA nührü Tsingrangnü jüba lih la yangdi apüm mahnung ko nührünü longlangba tbü athseng tsü khülunung.

⁵³“Nührü rorünü nührü yangditi betipü lide, nührü kongsehnung ko nührü khyang ABÜDONGBA nührü Tsingrangnü jüba tsuzarü mii nührünü tsunung.

⁵⁴Betipü lide, khura kongko tu atsunung mülirü tsü adirünü mii arüh tsuzarü khürü tsunungthsa kangnung. Abinü hütsü lanü amung khyang nye, abinü müiba anitpü khyang nye mahkhang atsurü anyingcho khyang nye mütüpnung.

⁵⁵

⁵⁶Alichonü khüde mii mübümüipü liba adilarünü mii hütsüta nguchinung. Khode arorühnü arüh yangdi betinang, abükyünü akong mürang rangnü akhunga zatbüyeng ko ashang mii tsunung. Abükyünü hütsü abükyünü müiba anii mahkhang atsurü khyangsü mütüpnung.

⁵⁷

⁵⁸“Nührünü hiba vakha la Tsingrangba adoba thrah liba hi apüm yuje cho mübichikhang ko nührünü ABÜDONGBA nührü Tsingrang anyemüyangnung ko adrünung neng tsü müdhichikhang,

⁵⁹abinü nührü ko nührü trah chah amükyangba dhsara ko khodesü müzahba adrünung rümra müthehnung.

⁶⁰Abinü nührü chah thali Ijip la nührünü nguba adrünung dhsara tsü müthehnung ko khodesü mükyangnung.

⁶¹Abinü hiba Tsingrangba yuzeng ko adoba vakha la müzehcho dhsara ko rümra alang adrong müthehnung ko nührü changjünung.

⁶²Nührü ning chah chenghi doi suh nye, nührü aikyah du akang linung, tunüo nührünü ABÜDONGBA nührü Tsingrang yocho münyi.

⁶³ABÜDONGBAnü nührü müwajüde ko suhsohde künyangcho roh-i, nührü changjüde ko nührü michah athsangnyang hirojüdesü künyangnung. Nührünü ngunung liba lih la tsünü nührü rohcheh pehnung.

⁶⁴“ABÜDONGBAnü alih changka khüdu langnü khüulang chii, yuchoti yola nührü shupishuza pehnung, ko hütsüla nührü ko nührü jümürünü mümübodhengcho, sing ko lungnü külüpcho tsingrang mübünung.

⁶⁵Nührünü khüdesü yangtsa müngunung, nührü yoepü yonung müdüm mülinung; ABÜDONGBAnü nührü michah mükhyahba, alongdi müliba ko achangba hitari mülümpha rosohnung.

⁶⁶Nührü akang lede dhsürü la linung. Ama atsingse adrünü jeng linung ko lede asünung alümxü la du linung.

⁶⁷Nührünü angucho lüpcho la adrüchonü lasih thüthohnung. Nyangnyü mükhu nyüzehnung nahmürahnung, ko nyüzehde tsingsenung nahmürahnung.

⁶⁸ABÜDONGBAnü nührü khodesü Ijip lang thali müwüsohnungepü yo linye, abinü nührü kihkuh lanü Ijip lang thali wüsohnung. Hütsüla nührü rorüh khehla nührübürü jangjang ayurüthsa linyünung, ta sünüsü nührü mülihnyünung.”