Read Sangtam Naga AZIKA YU 30 Bible Online

AZIKA YU 30 - Sangtam Naga bible

AZIKA YU 30

¹“Ihnü ade nührü khyang amüwa mahkhang chokehchola khüdu throchehnung jüre. Khode hiri apüm nührü chah tikehnang ko ABÜDONGBA nührü Tsingrangnü nührü shupishuzasohcho yuchoti yola tsü liyade, athrochehnung Ihnü mülaba tsü nührünü lümchehnung.

²Nührü ko nührü trahnü ABÜDONGBA yanglang ximülakhang ko Ihnü chünye jüba Abi yuzeng hiri nührü lasih apümnü nyikhang,

³ABÜDONGBA nührü Tsingrangnü nührü te yanglilümnung. Abinü nührü pehba yuchoti la tsünü nührü nüli ronung ko thali nührü müwajünung

⁴Nührü alih changka chii pehpü linye, nührü jümürü khüdupi liba lih tsü nührünü thali khyülinung thsa,

⁵ABÜDONGBA nührü Tsingrangnü nührü thali nübülung nüli ronung. Ko nührü jümürü tenü nührü alaa müwajünung ko adrongnü suhsohnung.

⁶Nührü lasih apümnü Abi müinungthsa ko hütsüla mütozah linung nengdang ABÜDONGBA nührü Tsingrangnü nührü ko nührü trah khyang yocho nyiba lasih jünung.

⁷Abinü chokehchola hi apüm, nührü thrünyirü ko nührü sehchirü nührü rorüh chah küdusohnung,

⁸ko nührünü thali Abi yocho nyinung ko Ihnü chünye jüba Abi yuzeng bichinung.

⁹Nührü nguchicho apüm la ABÜDONGBAnü müwajünung, nührü tsuzarü khütang thsanung ko kanglungrü adrong linung ko nührü luh lanü tsahma thangchi chüronung. Abinü nührü jümürü müwajüde künyangcho kyo nührü künyang müwajünung,

¹⁰ta nührünü Abi adoba vakha la thrah liba yuzeng apüm yochonyi bichieng. Nührünü nührü lasih apümnü Abi yang ximülang.

¹¹“Chünye Ihnü nührü khyang jüba yuzeng hi nührü nengdang amükohnung ko thsahra mah.

¹²Hütsü ning chah mükeh ‘Ihsanü yuchipü bichinung nengdang sünü küdu hijüronung pü nührünü tütsingdheng.’

¹³Mahkhang hütsü kihkeh khüu müle. ‘Ihsanü yuchipü bichinung nengdang, sünü kihjü tsü keh küdu hironung pü nührünü tütsingdheng.’

¹⁴Mah, nührü te hila lile. Nührünü hütsü müdhele ko khichehle, hütsüeko ade hütsü bichieng.

¹⁵“Chünye Ihnü nührü khyang atsa ko amütsa akang ko asü throchehnung bekhyah jüre.

¹⁶Nührünü chünye Ihnü jüba ABÜDONGBA nührü Tsingrang yuzeng nyikhang, Abi müikhang, Abi yocho nyieng ko Abi yuzeng apüm yohpüng, khang nührü müwajünung ko yucho amülah kangsohnung. Nührünü ngunung liba lih la tsü ABÜDONGBA nührü Tsingrangnü nührü müwajünung.

¹⁷Ta nührünü yocho münyikhang ko apa tsingrang mübünung nücho tsikhang,

¹⁸nührü changnung Ihnü ade ko hila nührü müzahsohre. Nührünü ngunung liba Jordan khüulang lih la tsü nührü kutsüp mülinung.

¹⁹Ihnü ade nührü khyang, akang ko asü, amüwa ko chokehchola kahla throsohnyüre ko nührü throchehba tsü yuzi thsanung Ihnü ning ko alih dsire. Akang throung.

²⁰ABÜDONGBA nührü Tsingrang müing ko Abi yocho nyieng ko Abi te yuje cho lieng, khang nührü jümürü Abraham, Isak ko Jakobrü te nyengchoba lih la tsü nührü ko nührü trah kutsüp linung.”