Read Sangtam Naga AZIKA YU 31 Bible Online

AZIKA YU 31 - Sangtam Naga bible

AZIKA YU 31

¹Mütozah Mosanü Israelrü te chota yocho,

²“Ih adelü kang thsihpü mükyü ashirü ko nührü langnürü thsanung mükohre. Hütsü chah lahkeh, Ihnü Jordan tsü mükehnungepü ABÜDONGBAnü I te yoko.

³ABÜDONGBA apu nührü bekhu wünung ko hütsüla liba yuchoti changjünung ko nührünü arüh lih khyünung; ko ABÜDONGBAnü yocho kyo Joshua nührü langnürü thsanung.

⁴Amor-rü yangthsarü Sihon ko Og nyüh kohcheh, arüh lih changjücho kyo, ABÜDONGBAnü hütsüri nyitsarü changjünung.

⁵ABÜDONGBAnü arüh michah nührü khyang akoh jünung ko Ihnü nührü te yocho kyo tsü arüh chah bichieng.

⁶Rezehng ko müsi mülahng. Arüh tüdrü. Nührü Tsingrang, ABÜDONGBA apu nührü te linung. Abinü nührü müthrüchahchüpehnung.”

⁷Hütsüpü Mosanü Israelrü atümung bete Joshua dsi yocho, “Rezehng ko müsi mülahng; ABÜDONGBAnü arüh jümürü te nyengchocho lih tsü khyünung hiri nyitsarü langnünung tsü nüh lile.

⁸ABÜDONGBA apunü nüh nünung ko nü te zehnung. Abinü nüh müpehjünung, hütsüeko suh müzeh tüli mahkhang dro tüli.”

⁹Hütsüpü Mosanü Yuzeng tsü thrahchocho ko yuzeng singdi xükümrü Levirü bebürü ko Israel zirü khyang jücho.

¹⁰Abinü yuzeng jo yocho, “Kang dhünyeh mükhu kang changka la, khode thsite pehjüba kang tsü ro chihnang, mütpahvi Thsüti la hi tasenü khieng.

¹¹Israelrü mübüji lang tsü ABÜDONGBA nührü Tsingrang mübünung rode, müyurüti te khi young.

¹²Khingkurü adhrerü, azarü ko nührü yola liba shuparü atümung müjang dsibülung ko atümungnü hütsü yuchipü ABÜDONGBA nührü Tsingrang yuzeng adoba yuje cho bichisohng.

¹³Hütsüta khodesü ABÜDONGBA nührü Tsingrang Yuzeng müyuchidhengrü nührü shümtsurütinü hütsü yuchinung. Hütsüta Jordan khüulang nührünü khyünung liba lih la tsü arüh akang li ayung arühnü yuchipü bichinung.”

¹⁴Hütsüpü ABÜDONGBAnü Mosa te yocho, “Nüh anyahli mülinung. Shükuh lang tsü Joshua dsieng ko Ihnü abi khyang athülaba jünung.”

¹⁵Achotsü Mosa e Joshua nyühnü Shükuh lang tsü wücho ko ABÜDONGBAnü Shükuh trahtri la nyükhi dongdi la anyüh te chüro ngusohcho.

¹⁶ABÜDONGBAnü Mosa te yocho, “Nüh zah sünung ko nüh süpü khanglanglü Müyurünü I te yuje müchonung ko Ihnü arüh te külüpba azengtacho tsü thsangnyangnung. Arühnü Ih thrüchahchüpehjüpü arühnü züdunung liba lih la müyudsirü tsingrang mübünung.

¹⁷Khode hütsüta tikehnang, Ihnü arüh te zichüronung; Ihnü arüh pehjünung ko arüh changsohnung. Adrünung achangba adrong arüh michah ronung ko hütsüde du arühnü, Ih arüh Tsingrang arüh te mülepü lümchehnung.

¹⁸Hütsüde Ihnü arüh mütrochehnung, tunüo arühnü amünyi nguchi apa tsingrang mübücho.

¹⁹“Ade, khi hi thrahchoung. Ko hi arüh nyüm yuzi thsanung nengdang Israelrü te hi doung.

²⁰Ihnü arüh jümürü te nyengchocho kyo, Ihnü arüh nyikih ko thsakukih pohba lih la tsü no züdunung. hütsüla arüh tsunyücho lüpcho ngunung ko arüh tbachi linung. Ta arühnü ximüla aparü tsingrang mübünung. Arühnü Ih mükhyüchonung ko azengtacho thsangnyangnung,

²¹ko achangba adrong arüh michah ronung. Ta hiba khi hi thsanung, ko hütsü arüh nyüm yuzi linung. Ade mii, Ihnü arüh anyengchocho lih lang münozüduenü, arühnü tu lümro Ihnü müdhele.”

²²Hütsü nyümong tsünü Mosanü khi tsü thrahchocho ko Israelrü te docho.

²³Hütsüpü ABÜDONGBAnü Nun tsurü Joshua te chota abi te yocho, “Rezehng ko müsi mülahng. Anyengchocho lih la tsü Israelrü nühnü no züdunung ko Ih nü te linung.”

²⁴Mosanü vakha khüdu la tusü müpehpü yuzeng tsü thrahcho.

²⁵Khode abinü thümcho, abinü yuzeng singdi xükümrü Levirü bebürü te tsü yocho.

²⁶“Tsingrangba Yuzeng vakha hi khyüng ko ABÜDONGBA nührü Tsingrang Yuzeng Singdi bete tsü yohpüng, hütsü abi nyitsarü nengdang yuzi thsanung.

²⁷Arüh khüdoi hong azi ko yocho münyiro Ihnü müdhele. Ih akang lide mii arühnü ABÜDONGBA nyümcho, ko Ih sükolü alaa nyümnung.

²⁸Ihnü hiri arüh te yonung nengdang, ahung müipi lanü azirü ko thsazirüti shimükhongsohng; arüh nyüm I yuzi thsanung Ihnü ning ko alih dsinung.

²⁹Ih sükolü hiri nyitsarü hi amütsa kangnung ko Ihnü arüh te doba hi mübichinungepü Ihnü müdhele. Ko achangba dunü arüh mütohnung, tunüo abinü yaticho nguchi arühnü ABÜDONGBA wahsoh linung.”

³⁰Hütsüpü Israelrü atümungnü nyi yade, Mosanü khi ayung tsü khicho.