Read Sangtam Naga AZIKA YU 33 Bible Online

AZIKA YU 33 - Sangtam Naga bible

AZIKA YU 33

¹Tsingrangba nyitsarü Mosanü abi müsüde Israelrü chah abi amüwa hiri seyohjücho.

²ABÜDONGBA Sinai zong lanü rocho; Edom michah nyü kyo Abi chürocho ko Paran zong lanü müyurü chah hecho. Riwürü hajar dhüre Abi yola zehcho, akheh tsalang dsibhong bicho.

³ABÜDONGBAnü Abi müyurü müire ko Abi yo tsungtire. Hütsünü Ihsanü ajingte mükhukehre ko Abi yuzeng nyire.

⁴Mosanü jüba Yuzeng Ihsanü bichire, Ihsa yucho thsiking.

⁵ABÜDONGBA Abi müyurü Israelrü Yangthsaba kangcho, arüh yuchoti ko langnürüti shimükhongde.

⁶Mosanü Reuben hung nengdang yocho: “Reuben khodesü tüsüsoh, Arüh nyitsarü adükeh du thsanye.”

⁷Juda hung nengdang abinü yocho: “ABÜDONGBA, arüh züdecho nyijüng; aparü hungti yola kehta lisohng. Arüh nengdang khatajüng, ABÜDONGBA, Ko arüh rorüh nyüm arüh tronung.”

⁸Levi hung nengdang abinü yocho: “Nüh, ABÜDONGBA, Urim ko Thummin khu nü lümcho mishang, Levirü, nühnü longlangba nü dikehrü khu; Masa la nühnü arüh thsatsücho, Ko Meriba kih shündhün arüh te yuje yuzi ngucho.

⁹Nü te arüh yocho nyiba tsü tpurü, jünirü ko tsuzarü tenü alaa. Arühnü Nü yuzeng nyiko Ko Nü azengtaba te yuje licho.

¹⁰Arühnü Nü müyurü tenü yuzeng nyinung donung; Arühnü Nü bholu chah arüh kangmübü mübünung.

¹¹ABÜDONGBA, arüh hongzisohng; Arühnü nguchicho la künyang. Arüh rorüh changjüng; Arüh khodesü tüsurosoh.”

¹²Benjamin hung, nengdang abinü yocho: “ABÜDONGBAnü müiba ko tsungtiba hung tsü hi; Abinü nyümong chang arüh nyahre. Ko Abi arüh yola lire.”

¹³Josef hung nengdang abinü yocho: “ABÜDONGBAnü tsingnü arüh lih müwajüng Ko alih yonglangnü kih chürosohng.

¹⁴Nyünü henyiba singsihnü arüh lih müwajüng Akyang müipi singsih atsauba sihsohng.

¹⁵Arüh jümü zong tsü singsih atsaubanü jengsohng.

¹⁶Arüh lih tsü atsa dunü jengsohng, ABÜDONGBA atsabanü müwajüng Sünü michang singtrung lanü chotacho. Amüwa hiri tsü Josef hung chah kürosohng, Tunüo arüh jünirü yola abi tsü anüchiba.

¹⁷Josef tsü misüpung tase zehle, Rangmü misüpung jüh kehle. Abi jüh tsü Manaserü hajar dhüre Ko Efraimrü hajar dhüre kyole. Hütsürinü yuchoti khuhre, Ko alih changka chii khuhyohchüpehre.”

¹⁸Zebulun ko Isakar hung nengdang abinü yocho: “Zebulunrü tsü kihdi shithsabhüleh la pungrohirosohng. Ko kuhla Isakar kuthsi jasohng.

¹⁹Arühnü arüh zong la shuparü dsiyohre Ko kangmübü hütsüla jüre. Arühnü kuthsi kihdi lanü ngure. Ko kihbekhüm la lihpi lanü.”

²⁰Gad hung nengdang abinü yocho: “Tsingrangba seing, sünü arüh lih amülah külüpjücho. Gadnü kihkhünying kyo yingre kheh mahkhang athah mükahsahjünung.

²¹Arühnü alih atsauba khyüko, Langnürü nohlüm arüh khyang jüko. Arühnü ABÜDONGBA yuzeng bichiko Israel zirü shimükhongde.”

²²Dan hung nengdang abinü yocho: “Dan tsü kihkhünying za lile; Abinü Bashan lanü tsohchehre.”

²³Naftali hung nengdang abinü yocho: “Naftali tsü ABÜDONGBAnü mürucho khu khütang müwajüko; Arüh lih Galil kihting lanü kihjing lahpi chii lile.”

²⁴Asher hung nengdang abinü yocho: “Asher tsü aparü hung tenü alaa müwajüko. Abi tsü abi jünirüti müruba thsasohng. Ko abi lih tsü olive singnü jengsohng.

²⁵Abi yangdi tsü idhse tbükhümnü tsungtisohng. Ko abi lede khümcho lisohng.”

²⁶Israelrü, nührü Tsingrang kyo apa tsingrang müle, ning chah ahechi keh rachi, nüh tronung nyükhi khu rore.

²⁷Tsingrangba tsü lede nührü khüm roko; Abi müchangkaba kheh tsü nührü atroba. Nührü zürode Abinü nührü rorüh iipehjücho, ko nührü te arüh changjünung yocho.

²⁸Hütsünü Jakob trah tbachi lire, tsang ko yongkhanü jeng liba limih, ninglang yingkihnü alih la xahre.

²⁹Israel, nührü khüta akünyangnung; Nührü kyo sü müle, ABÜDONGBAnü khümchoba yucho. ABÜDONGBA apu tsü nührü tsung ko nohsheng, nührü tsungtinung ko akoh jünung. Nührü rorünü kihchi ronung, ko nührünü arüh dhrümchinung.