Read Sangtam Naga AZIKA YU 34 Bible Online

AZIKA YU 34 - Sangtam Naga bible

AZIKA YU 34

¹Mosanü Moab Ngah lanü Jeriko lahpi Nebo zong, Pisga khang chah küducho ko hütsü lanü ABÜDONGBAnü abi te alih tsü apüm ngusohcho: Gilead limih lanü Dan chii;

²Naftali apüm, Efraim ko Manase lih; Juda lih lanü nyüzüdu Mediteranean Kihdi chii;

³Juda kihjing lahpi; Zoar lanü sedong yangdi Jeriko chii liba angah apüm ngusohcho.

⁴Hütsüpü ABÜDONGBAnü Mosa te yocho, “Ihnü Abraham, Isak ko Jakob te arüh shümtsurü khyang jünungepü nyengchoba lih tsü hi lile. Ihnü nü khyang hi ngusohre, ta nüh hütsüla müzüdusohnung.”

⁵Hütsüta, ABÜDONGBAnü yocho kyo, ABÜDONGBA dikehrü Mosa, Moab lih hütsüla sücho.

⁶ABÜDONGBAnü abi Bethpeor yangdi dükeh Moab lih ngah la dhrürangcho, ta chünye yingcheh abi khüi la dhrürangcho sünüsü mümüdhe.

⁷Mosa, abi süde kang thsihpü mükyü thsacho; abi amüküp shüshü ko anahtsesü atsatsa thsacho.

⁸Israelrünü Moab ngah la nyümong sangre abi meshücho.

⁹Nun tsurü Joshua tsü lümlong ajeng licho, tunüo Mosanü abi mülihnung throchehcho. Israelrünü Joshua yu nyicho ko ABÜDONGBAnü Mosa khu jüba yuzengti arühnü bichicho.

¹⁰Israel la Mosa kyo azikehrü süsü mülicho; ABÜDONGBAnü abi te romih dhsükehta chotacho.

¹¹ABÜDONGBAnü Mosa müthehnü Ijiprü Yangthsaba, thsazirüti ko yucho apüm nyüm nguchicho kyo, aparü azikehrü sünü thsayahiya ko anyemüyangnungti münguchi.

¹²Israelrü apüm bete Mosanü nguchicho kyo aparü azikehrü sünüsü adrünung ko nguchi arangcheh münguchi.