Read Sangtam Naga AZIKA YU 7 Bible Online

AZIKA YU 7 - Sangtam Naga bible

AZIKA YU 7

¹“ABÜDONGBA nührü Tsingrangnü anyengchocho lih la tsü nührü noronung ko hütsü lanü Abinü yucho adrong iipehnung. Nührü züdude, nührü te adiu ko amüküp-u yucho dhünyeh abinü iipehjünung: Hit-rü, Girgashrü, Amor-rü, Kananrü, Perizrü Hivrü ko Jebusrü.

²Khode ABÜDONGBA nührü Tsingrangnü hiri tsü nührü khehla jonang ko nührünü kohnang, nührünü arüh atümung süsohng. Arüh te yangtsa tükülüp mahkhang yanglilüm tüngu.

³Arüh süsü tükhyü ko nührü tsuzarüti khyangsü arüh süsü tükhyüsoh,

⁴tunüo hütsüde apa tsingrang mübünung nührü tsuzarü tsü ABÜDONGBA tenü arühnü nücho tsinung. Hütsüta khang ABÜDONGBAnü nührü te zichüronung ko nührü changjünung.

⁵Hütsüeko, arüh bholu tphünahjüng, arüh yo amüsa lung tsü kengnahpehjüng, arüh tsingrang Ashera kyothri tsü kyühnahpehjüng ko arüh kyothriti tsü trüp-pehjüng.

⁶Hi nguching tunüo nührü ABÜDONGBA Tsingrang yo lile. Limih la nyitsarü apüm yolanü Abinü apu yo thsanung nührü throchehcho.

⁷“Aparü nyitsarü tenü adrongu thsachonü ABÜDONGBAnü nührü müicho mahkhang throchehcho mah; limih la azauba yucho tsü nührü licho.

⁸Ta ABÜDONGBAnü nührü müicho ko nührü jümürü te anyengchocho tsü yohpünyücho. Hütsü khu Abinü Abi zii amülah la nührü khümchocho ko Ijip Yangthsaba pohki ayurü suro lanü nührü nüchehcho.

⁹ABÜDONGBA nührü Tsingrang du tsü yuje ko longlangchehba Tsingrangepü lümkehng. Abinü Abi azengtacho yohpünung ko sünü Abi müiro ko Abi yuzeng bichiro, Abinü shang hajar adrong Abi amüthreba amüi ngusohnung,

¹⁰ta Abi thrünyirü khingchinung Abinü mütüdohnyünyehnung.

¹¹Hütsüeko ade, nührü te tuturü docho hütsü bichieng; Ihnü chünye jüba yuzeng apüm bichieng.

¹²“Nührünü yuzeng hiri nyi ko yuje cho bichikhang, ABÜDONGBA nührü Tsingrangnü Abi azengtaba yohpünung ko Abinü nührü jümürü te nyengchocho kyo, nührü te Abi amüthreba amüi ngusohnung.

¹³Nührü khütang suh tsuzarü linung nengdang Abinü nührü müinung ko müwajünung; nührü fürü, yongkha ko olive tuji kükyo linung nengdang, Abinü nührü luh müwajünung; ko Abinü kanglungrü ko san jo nührü müwajünung. Abinü hiri amüwanung apüm tsü nührü jümürü te nyengchoba lih la tsü jünung.

¹⁴Limih la nührü bholo müwajücho kyo, süsü mümüwajünung. Nührü süsü ko nührü kanglungrü amüyüh mülinung.

¹⁵ABÜDONGBAnü füthsa apüm lanü nührü tsungtinung ko nührünü Ijip la thsaba rümra tunüsü nührü müchinung, ta Abinü hiri apüm tsü nührü rorüh chah kürosohnung.

¹⁶ABÜDONGBA Tsingrangnü nührü khehla jücho yuchoti atümung changjüng, ko arüh te tu yanglilüm tüngusoh. Arüh tsingrang tümübü, tunüo arüh tsü asüba thsanung.

¹⁷“Hiri yuchoti nührü tenü adrongu-e mahkhang nührünü arüh mü-iipehchehnungepü tülüm.

¹⁸Arüh tüdrü; ABÜDONGBA nührü Tsingrangnü Ijip Yangthsaba ko abi nyitsarü te tu nguchicho hütsü lümchehng.

¹⁹Nührübürü nahnü nguba adrünung rümra, thsayahiya ko anyemüyangnungti ko nührü lehchehjüba Tsingrangba re ko zii amülahsü lümchehng. Abinü Ijiprü changsohcho kyo, nührünü ade dro yaba nyitsarüti tsü changjünung.

²⁰Abinü arüh yola lümdhama chürosohnung ko rang tsirü ko rangpümrü apüm changjünung wara müthehnung.

²¹Hütsüeko hiri nyitsarü tüdrü. ABÜDONGBA nührü Tsingrang nührü te lile; Abi Tsingrang amülah ko Abi du drünungbae.

²²Nührü züdude aza-zanü Abinü yucho hiri iipehnung. Nührünü khüdupinü arüh mükohnung, tunüo nührünü hütsüta nguchide, rangmü kanglungrü suhnung ko hütsü nührü nengdang dhsürü thsanung.

²³ABÜDONGBAnü nührü rorüh nührü khehla jünung ko arüh mükohde arüh lümdhama lisohnung.

²⁴Abinü arüh yangthsarüti nührü khehla jünung. Nührünü arüh kyüsehnung ko arüh nbüchopehnung. Sünüsü nührü müyatichehnung; nührünü atümung changjünung.

²⁵Arüh kyothriti trüp-pehjüng. Hütsüri chah kehba hon ko taripi tümükhyah ko hütsüri nührübürü nengdang tükhyü. Nührünü khyükhang, hütsü asüba linung, tunüo ABÜDONGBAnü kyothri mübürü thrünyire.

²⁶Hitari kyothri tusü nührü kuh yang tühiro mahkhang hütsüri chah kehba chokehchola tsü nührü chah küdunung. Nührünü hitari kyothri thrünyieng ko tükhyüyoh, tunüo hütsü chokehcholacho kohro lile.