Read Sangtam Naga AZIKA YU 8 Bible Online

AZIKA YU 8 - Sangtam Naga bible

AZIKA YU 8

¹“Ihnü chünye nührü khyang jüba yuzeng hiri apüm yuje cho bichieng, khang nührü linung, suhnung, ko ABÜDONGBAnü nührü jümürü te nyengchocho lih tsü nührünü ngunung.

²ABÜDONGBA nührü Tsingrangnü hidoi nyahli, atsicho kang yüre akungaselih khu nührü norocho lümchehng, ko nührü alümcho müdhenung ko Abi yuzeng nyi a münyinang müdhenung Abinü nührü thsatsünung nührü yang achongcha müthehcho.

³Abinü nührü kongsohcho, hütsüpü nührü ko nührü jümürünü khodesü mütsudhengcho tsuyongba manna nührü khyang jücho. Hi nührü te nyitsarü tsü tsang dunü akang mülire, ta ABÜDONGBAnü chocho yu tsünü akang lirepü donung khyanglangnü nguchicho.

⁴Hiri kang yüre la nührü jengki müthreh, mahkhang nührü jing mübüm.

⁵Au khüdunü atsurü rahsehcho kyo, Tsingrangbanü nührü müchongchijüre ko khingchirepü lümchehng.

⁶Hütsüeko, ABÜDONGBAnü nührü te mülacho kyo nguching ko Abi yuzeng roh-i lieng ko Abi yocho nyieng.

⁷ABÜDONGBA nührü Tsingrangnü asu lih khüdu, yongkhi zehba, yongna ko alih yonglang kihna lanü akhang ko angah la züchehsohba;

⁸litoh ko lüdi, Shükusih, ngurüsih, tsanümsih, olive ko thsakukih chürosohba yang norore.

⁹Hütsüla nührü khodesü mükongnung mahkhang mümüdsimükunung. Lung la tsü idhse zehle ko akhang la tsünü nührünü imüyeng juchehnung.

¹⁰Nührü tsunyücho lüpcho ngunung ko ABÜDONGBA nührü Tsingrangnü nührü khyang asu lih jücho ngang nührünü Abi khyang nengse jünung.

¹¹“Nührünü ABÜDONGBA nührü Tsingrang münbüchünung Ihnü chünye nührü khyang jüba yuzeng khüdusü müpehpü bichieng.

¹²Khode nührü tsunyücho apüm ngunang ko nührü linung kuh atsa thsanang

¹³ko khode nührü misü ko san, hon ko taripi ko apa kuthsi apüm zikehnang,

¹⁴hütsüde, müthsehnü, Ijip la ayurü suro lanü nührü nüchehba ABÜDONGBA nührü Tsingrang nbüchopehnung müzahng.

¹⁵Abinü nührü hütsüba amülah ko adrünung, müyüh kehba mürü ko khakikoh liba akungaselih khu nüchehcho. Hütsüba kih müliba akungaselih la tsü, Abinü nührü khyang lung khüdu lanü kih pohchehsohcho.

¹⁶Lipilih la Abinü nührü jümürünü mütsudhengcho tsuyongnung manna nührü khyang jücho. Achangka la Abinü nührü müwajünung nengdang, nührü thsatsünung Abinü nührü yang chongcha müthehcho.

¹⁷Hütsüeko nührü zii ko tase khu nührü jangjang alirü kangchoepü nührünü tülüm.

¹⁸Hütsü ABÜDONGBA nührü Tsingrangnü nührü alirü kangsohnung zii jüchoepü müdheing. Abinü nührü jümürü te külüpba azengtaba tsü chünye yingcheh yuje cho yohpücho müdhenung hi nguchire.

¹⁹ABÜDONGBA nührü Tsingrang khodesü tünbüchü mahkhang apa tsingrang mübünung ko dikehnung tüximüla. Nührünü hütsüta nguchikhang, nührü yuje changnungepü Ihnü chünye nührü müzahsohre.

²⁰Nührünü ABÜDONGBA te münyikhang, nührü züdude Abinü yuchoti changsohnung liba kyo nührü changsohnung.