Read Sangtam Naga JOHAN 1 Bible Online

JOHAN 1 - Sangtam Naga bible

JOHAN 1

¹Adikehdi Yu licho, ko Yu tsü Tsingrangba te licho, ko Yu tsü Tsingrangba thsacho.

²Adikehdi abi Tsingrangba te licho.

³Abi khu Tsingrangbanü lüpcho külüpcho; athricho la tusü abi müzehpü mükülüp.

⁴Ko akang tsü amüi tsurü atsingse licho.

⁵Atsingse tsünü amala vire, ko ama tsünü hütsü khodesü mümehsohre.

⁶Tsingrangba chahnü müthehcho nyitsarü khüdu, anengnü Johan licho.

⁷Apümnü yusi tsü yuchi yudsisohnung nyitsarü te atsingse nengdang tsü yonung müthehcho.

⁸Abi atsingse tsü mah; abi atsingse nengdang yonung rocho.

⁹Yuje atsingse tsü limih la ro amüi tsurü atümung chah vijüre.

¹⁰Yu tsü limih la licho, ko abi khu limih tsü külüpcho, ta liminü abi mümüdhecho.

¹¹Abi apu limih yang rocho, ta anyitsarünü abi mükhyüchocho.

¹²Ta abi khyüchorü atümung, sürünü abi nengla yudsicho, arüh khyang abinü Tsingrangba tsurü kangnung zii jücho;

¹³sürü ashüh mahkhang shutsa mahkhang nyitsarü lümcho la müsuro ta Tsingrangba chahnü surocho.

¹⁴Yu tsü nyitsarü kangpü achomang ko yujenü jeng Ihsa yola licho; Au chahnü Atsudhre ahechi tsü Ihsanü nguko.

¹⁵Johan-nü abi nengdang chocho. Abinü züde yocho, “Abi I khanglang rore, ta abi I tenü adiuba, tunüo abi ‘Ih müsuro denü lijungcho ko sü nengdang Ihnü yocho, abi tsü hivie.’ ”

¹⁶Abi akükyüh achomang lanü Ihsa atümungnü amüwa khüdu khanglang khüdu nguko.

¹⁷Tsingrangbanü Yuzeng tsü Mosa khu jücho, ta achomang ko yuje tsü Jisu Khrista khunü rocho.

¹⁸Sünüsü Tsingrangba khodesü müngudheng. Ta atsudhre, sü Au dreng chah liro, abinü mishajücho.

¹⁹Jerusalem la Jihudarü zirünü Johan yanglang abi te, “Nüh süo?” pü tsingdhengnung Bebürü ko Levirü khürü müthehcho.

²⁰Johan-nü lalingnung mütütohnyünyeh, ta mishanü tsitsa yocho, “Ih Mesia tsü mah.”

²¹Arühnü tsingcho, “Khang, nüh süo?” “Nüh Elija mah-o?” Johan-nü lalingcho, “Ih mah.” Arühnü tsingcho, “Nüh azikehrü tsü mah-o?” Abinü lalingcho, “Mah.”

²²Arühnü tsingcho, “Khang nüh sünang ihrü te young. Sürünü ihrü rosohcho arüh yang alalingba khüdu hiwünungbae. Nühnü nüpu nengdang tu yonung?”

²³Johan-nü Isaya azikehrü yu hironü lalingcho, “Lipilih la züdeba yuva tsü Ih, Abüdongba lang tsü müchongkhüti külüpm!”

²⁴Hütsüde Farisirünü müthehba yusi hirü tsünü Johan te tsingdhengcho,

²⁵“Nüh Mesiasü, Elijasü, ko azikehrüsü mahkhang, nühnü tuepü baptijüro?”

²⁶Johan-nü lalingcho, “Ihnü kih la baptijüre, ta nührünü mümüdhepü nührü yola nyüh khüdu lile.

²⁷Abi I khanglang tsehle, Ihlü abi jingkhüm lehchehnung mii müdekheng.”

²⁸Hiri apüm Bethany la Johan-nü baptijo rachiba Jordan yongkhi khüulang tikehcho.

²⁹Nyümong khüu tsü, Johan-nü Jisu abi yanglang rochi ngu yocho, “Alimih münyi hitsibong Tsingrangba Sanza tsü dheng!

³⁰‘Abi I khanglang tsehle, ta abi I tenü adiuba, tunüo abi Ih müsuro denü lijungcho ko sü nengdang Ihnü yocho, abi tsü hivie.’

³¹Abi sü donang Ihnü mii mümüdhe, ta abi Israelrü khyang müdhesohnung nengdang Ihnü kih la baptijo rocho.”

³²Johan-nü yuzi hi jo yocho: “Anbü tsü mümüdhrü kyo ninglangnü jüro abi chah püm Ihnü ngucho.

³³Ihnü ade yingcheh hütsü abiepü mümüdhe, ta Tsingrangba sünü kih la baptijünung Ih müthehcho, abinü I te yocho, ‘Anbü tsü jüro nyüh khüdu chah püm nühnü ngunung; hütsü sünü Anbü Amüsa la baptijüro abi tsü lile.’

³⁴Johan-nü yocho, Ihnü hütsü nguko ko Ihnü nührü te abi Tsingrangba Tsurüepü yore.”

³⁵Nyümong khüu Johan hütsüla apu mono anyüh yola yacho,

³⁶ko abinü Jisu tsicho ngu yocho, “Tsingrangba Sanza tsü dheng!”

³⁷Mono anyüh tsünü abinü yocho tsü yuchi Jisu khanglang iiwücho.

³⁸Jisunü ximüla arüh abi khanglang rocho ngu yocho, “Nührü tu yangchiro?” Arühnü lalingcho, “Nüh khüde liro, Rabbi?” (adüzü “Adorü”).

³⁹Abinü lalingcho, “Rung ko dheng.” (Hütsü anyüzehlang müyü mücheh licho.) Ko arüh abi iiwücho, ko abi lichah tsü ngucho. Hütsüla nyümong chang abi yola licho.

⁴⁰Anyüh yola khüdu tsü Simon Peter ani Andreu thsacho.

⁴¹Akhudiba abinü amung Peter ngu abi te yocho, “Ihrünü Mesia tsü nguko.” (adüzü “Khrista”)

⁴²Hütsüpü abinü Jisu yanglang Simon nowücho. Jisunü abi chah dheng yocho, “Nüh Johan tsurü Simon, ta nü te Kefas pü dsinung.” (Adüzü “lung”)

⁴³Nyümong khüu Jisunü Galil lang wünung dhrongchehcho. Abinü Filip shiro abi te yocho, “I yola rung!”

⁴⁴(Filip tsü Andreu ko Peter nyüh liba Bethsaida town lanü licho.)

⁴⁵Filipnü Nathanael shiro abi te yocho, “Mosanü Yuzeng vakha la ko azikehrütinü sü nengdang thrahcho hütsü ihrünü nguko. Abi Nazaret lanü Josef tsurü Jisu.”

⁴⁶Nathanaelnü tsingdhengcho, “Nazaret lanü mii lango atsa chürochehnung mah-o?” “Rung ko dheng,” Filipnü lalingcho

⁴⁷Khode Jisunü Nathanael abi yangro ngucho, abinü abi nengdang yocho, “Hila Israelrü khung khüdu lile; abi chah tu mülang müle!”

⁴⁸Nathanaelnü abi te tsingdhengcho, “Nühnü khüta Ih müdhero?” Jisunü lalingcho, “Filipnü nüh müdsiede, nüh ngurüsih dong pohki pümdenü, Ihnü nüh nguchoe.”

⁴⁹Nathanaelnü lalingcho, “Adorü, nüh Tsingrangba Tsurü! Nüh Israelrü Yangthsaba!”

⁵⁰Jisunü yocho, “Ihnü nüh ngurüsih dong pohki püm nguchoepü yochonü nühnü yudsirü mah-o? Hi tenü dee adiu nühnü ngunung!”

⁵¹Ko abinü arüh te yocho, “Ihnü nührü te yutsatsa yore: Ning khangthrupü Tsingrangba riwürüti Nyitsarü Tsurü michah jüroli-tuwüli ko nührünü ngunung.”