Read Sangtam Naga JOHAN 10 Bible Online

JOHAN 10 - Sangtam Naga bible

JOHAN 10

¹Jisunü yocho, “Ihnü nührü te yutsatsa yore: Nyitsarü sünü trahtri khunü San kuhla müzüropü lang palangnü züronang, abi aführü ko fükhohrü.

²Ta sünü trahtri khu züroro abi San anyahrü.

³Abi khyang trahtri nyahbanü kukhang khangthrujüre; ko abinü apu Santi anengnü dside arühnü abi yuva nyichehre, ko abinü arüh nücheh tsire.

⁴Khode abinü arüh nüchehnang, abinü arüh belang würe, ko santinü abi khanglang iiwüre, tunüo arühnü abi yuva müdhele.

⁵Arühnü aparü khanglang mü-iiwünung; ta hitari nyitsarü tenü arühnü tsicho tsinung, tunüo arühnü abi yuva mümüdhe.”

⁶Jisunü arüh te yukita hi yocho, ta abinü yonyüba tsü arühnü münyichehcho.

⁷Achotsü abinü anyüpiusü yocho, “Ihnü nührü te yutsatsa yore: Ih San trahtri.

⁸I müngu rorüh atümung aführü ko fükhohrüti, ta santinü arüh yu münyi.

⁹Ih trahtri. Sünü Ih khu züroro abi khümchonung; abi züroli chüdulinung ko tsuyongchah ngunung.

¹⁰Aführünü afühnung, amapsehnung ko thsangnyangjünung du rore. Nührü akang ajeng ngusohnung Ih rocho.

¹¹“Ih San nyahrü atsa. San nyahrü atsanü santi nengdang apu akang jüre.

¹²Sü san nyahrü mahro, ta shehsherü du, abinü rangfü ro ngunü santi pehjüpü rang tsire; hütsüde rangfü tsünü santi tsü tphah tsire ko arüh iishore.

¹³Shehsherünü rang tsiba tsü abinü santi tsü müi müle, tunüo abi shehsherü khüdu du.

¹⁴Ih San nyahrü atsa. Aunü Ih müdhe ko Ihnü Au müdhecho roh-i, Ihnü I santi müdhere ko arühnü Ih müdhere.

¹⁵Ko Ihnü arüh nengdang sünung mii khyangre.

¹⁶San kuhla müzehcho adesü I yo san apasü lile. Ihnü arühsü norobae; arühnü I yuva nyinung, ko arüh anyahrü khüdu pohki atii khüdu kangnung.

¹⁷“Aunü Ih müire tunüo anyüpiu ngulinung nengdang Ihnü I kang jünung khyangre.

¹⁸Sünüsü I chahnü I kang khyünung mükoh. Hütsü Ipu lümyunü jüre. Hütsü jünung, ko khyülinung I chah tase kehle. Hi nguchinung I Unü I khyang yuzeng jüko.”

¹⁹Yu hiri khu adesü arüh yola achangnah chürocho.

²⁰Arüh adrongnü yocho, “Abi chah motsing zehle! Abi amükyangrüe! Nührü tuepü abi yu nyiro?”

²¹Ta aparünü yocho, “Motsing zehcho nyitsarü khüdunü hita müchochehnung! Motsingnü anahtohrü khüta trahsohnung!”

²²Hütsü tsingkang bekhyah ko Jerusalem la amübükuh Müsacheh Thsüti khyo licho.

²³Amübükuh la Jisu Solomon Kekhüm la rachicho.

²⁴Hütsüde nyitsarütinü abi mükang shibülungnü abi te tsingdhengcho, “Ihrü khüdoi nyahli lümdhamasohnung? Ihrü te tsitsa young: Nüh Mesia tsü mah-o?”

²⁵Jisunü lalingcho, “Ihnü nührü te yopehko, ta nührünü müyudsire. I U nengla Ihnü tu nguchiro, hütsünü I nengdang yuzi jüre;

²⁶ta nührünü I yu müdsire, tunüo nührü I santi mah.

²⁷I santinü I yuva nyire; Ihnü arüh müdhele, ko arühnü I khanglang iirore.

²⁸Ihnü arüh khyang müchangkaba akang jüre, ko arüh khodesü müsünung. Ko I kheh lanü sünüsü arüh rohcho mühitsinung.

²⁹I Unü I khyang jüba tsü lüpcho tenü adiuba, ko sünüsü I U kheh lanü arüh rohcho mütsicheh.

³⁰I U Ihjü khüdu du.”

³¹Hütsüde nyitsarütinü abi chah mapnung lung throcho.

³²Jisunü arüh te yocho, “I Unü I khyang nguchinung jücho nguchi atsa adrong Ihnü nührü yola nguchiko; arüh yola nguchi khüiba nengdangnü nührünü I chah mapnyüro?”

³³Arühnü lalingcho, “Nguchi atsa nengdang Ihrünü nü chah mapnyürü mah, ta Tsingrangba müchümükehcho ngang! Nüh nyitsarü khüdu du, ta nühnü Tsingrangba kangnyüre!”

³⁴Jisunü lalingcho, “Nührübürü yuzeng la Tsingrangbanü, ‘Nührü tsingrangrütiepü’ yocho thrah zehle.

³⁵Amüsa yunü tu yoro hütsü lede yuje-epü Ihsanü müdhele, ko sürü khyang abi yusi jücho, arüh te Tsingrangbanü tsingrangrüti pü dsicho.

³⁶Ihlü Tsingrangbanü throchehcho ko hiba limih yang müthehcho. Khang, Ihnü Ih Tsingrangba Tsurüechonü khütapü Tsingrangba müchümükehrepü nührünü yoro?

³⁷Ihnü I U nguchi münguchikhang, I chah tüyudsi.

³⁸Ta Ihnü hütsüri nguchikhang, nührünü I chah müyudsi nye, I nguchi tsü yudsing, hütsünü Au I chah lire, ko Ih Au chah lirepü lede nengdang nührünü müdhenung.”

³⁹Adesü arühnü Jisu rangnung müküpcho, ta arüh kheh lanü bücheh tsipehcho.

⁴⁰Hütsüpü Jisunü thali Jordan yongkhi keh wünü Johan-nü akhulang baptijüba müdüm la tsü licho.

⁴¹Ko nyitsarü adrong abi yang ronü yocho, “Johan-nü thsayahiya tu münguchi, ta tuturü Johan-nü hiba nyitsarü nengdang chocho apüm yuje lile.”

⁴²Ko hütsüla lirü adrongnü abi chah yudsicho.