Read Sangtam Naga JOHAN 11 Bible Online

JOHAN 11 - Sangtam Naga bible

JOHAN 11

¹Bethany la liba nyüh khüdu anengnü Lazarus füthsa licho. Bethany tsü Mary ko afü Martha nyüh liba yangdi tsü licho.

²(Mary hinü Abüdongba jing chah axümlichi tuji tungkehjüpü abükyü kuvanü nipehjücho; füthsaba tsü abükyü ani Lazarus licho.)

³Afü nyüh tsünü Jisu yang yusi mütheh yocho: “Abüdongba, nühnü müibong füthsa lile.”

⁴Khode Jisunü hütsü yuchicho, abinü yocho, “Hiba füthsa hi asünungthsa mah; hi Tsingrangba hechinung nengdang, ko hi khunü Tsingrangba Tsurü hechisohnung.”

⁵Jisunü Martha ko ani ko Lazarus müicho.

⁶Ta khode abinü Lazarus füthsalepü yusi yuchicho, abinü hütsüla nyümong anyüh alaa pümcho.

⁷Hütsüpü abinü monoti te yocho, “Ihsanü Judea lang thali wonung.”

⁸Monotinü lalingcho, “Adorü, atüzitü du tsü hütsüla lirütinü nü chah lungnü mapnung yangchicho; ko nüh hütsülang thali wünyürü ang?”

⁹Jisunü yocho, “Nyümong khüdu la rehtseh dhüre-anyüh mahrü do? Sünü atsingse la rachinang jing mümüthire, tunüo abinü hiba limih atsingse ngure.

¹⁰Ta abinü amala rachikhang jing müthire, tunüo abi atsingse müle.”

¹¹Jisunü hütsü yopü hi lahkehcho, “Ihsa müyangba Lazarus yüpseh tsiko, ta Ih wünung ko abi khamüsunung.”

¹²Monotinü lalingcho, “Abi yüpseh tsicho thsakhang, Abüdongba, abi kyangpehnung.”

¹³Jisunü yoba tsü Lazarus sücho nengdang, ta aje yüpsehcho nengdang abinü yorepü arühnü lümcho.

¹⁴Achotsü Jisunü arüh te khohcheh yocho, “Lazarus süko,

¹⁵ta Ih abi te mülicho tsü nührü nengdang Ih künyangre, hütsü dunü nührünü yudsinung. Ihsanü abi yang wonung”

¹⁶Thomas (arüp tsurü dsiba) nü arüh müyangrü monoti te yocho, “Abi te sünungthsa Ihsa atümung adoba yola wonung!”

¹⁷Jisu ro chihde, Lazarus merangpü nyümong müyü tsipü thsacho.

¹⁸Bethany tsü Jerusalem lanü Lutri asang mii müthsacho,

¹⁹ko ani sücho nengdang Martha e Mary nyüh lüm kihchonung Judearü adrong ro licho.

²⁰Khode Marthanü Jisu tsehlepü yuchicho, abükyünü abi mütohnung wücho, ta Marylü kuhla pümcho.

²¹Marthanü Jisu te yocho, “Abüdongba, nüh hila lirelang, Ini müsüba thsako!

²²Ta ade mii nühnü tu chingnang Tsingrangbanü nü khyang jünungepü Ihnü müdhele.”

²³Jisunü abükyü te yocho, “Nüni kangli ronung.”

²⁴Abükyünü lalingcho, “Abi achangka nyümong kangli ronungepü Ihnü müdhele.”

²⁵Jisunü abükyü te yocho, “Ih kangli roba ko akang. Sünü I chah yudsiro abi sünye akang linung;

²⁶ko sü akang linang ko I chah yudsinang khodesü müsünung. Nühnü hi yudsirü mah-o?”

²⁷Abükyünü lalingcho, “Ho, Abüdongba! Alimih yang ronung liba Tsingrangba Tsurü Mesia tsü nüh-epü Ihnü yudsire.”

²⁸Marthanü hi yopü khanglang, abükyünü wü ani Mary rang dsinü yocho, “Adoba hila lile ko abinü nüh yangchile.”

²⁹Marynü hi yuchi, zah shemüsu abi shirünung dhsüthsa wücho.

³⁰(Jisu ro yang tsü müchie, Marthanü mütohba müdüm la du tsü licho.)

³¹Nyitsarü sürü Mary te kuhla abükyü lümkihcho licho, Mary shemüsu dhsüthsa tsicho ngu abükyü khanglang iiwücho. Abükyü tsü kong lang atranung würepü arühnü lümcho.

³²Hütsüde Marynü Jisu licho ro chihcho, ko abi ngu dunü ajing te mükhukeh yocho, “Abüdongba, nüh hila lirelang, Ini müsüba thsachoe!”

³³Khode Jisunü abükyü ko abükyü yola rorüh tra ngucho; alasih la thahpücho, ko dee thsa lümcho.

³⁴Abinü arüh te tsingdhengcho, “Nührünü abi khüde dhrürangcho?” Arühnü lalingcho, “Abüdongba, Rung ko dheng.”

³⁵Jisunü tracho.

³⁶Nyitsarütinü yocho, “Dheng, abinü khütoh-i abi müiro!”

³⁷Ta khürünü yocho, “Abinü anahtohba mükyangjücho do? Khang, abinü Lazarus müsüsohnung mükohcho ang?”

³⁸Jisunü adesü amüsithsa lümnü kong lang tsü wücho, hütsü Lungkhi kong ko trahtri la lung khüdunü dhitipücho.

³⁹Jisunü yuzeng jo yocho, “Lung tsü dhipehng!” Asüba afü Marthanü yocho, “Abüdongba, adelü asüh xümnung, tunüo dhrürangpü amüyü nyümonge!”

⁴⁰Jisunü abükyü te yocho, “Nühnü yudsikhang Tsingrangba ahechi ngunungepü Ihnü nü te müyocho mah-o?”

⁴¹Hütsüde arühnü lung tsü dhipehcho. Jisunü ninglang dhengnü yocho, “Uwa, nühnü I yu yuchichonü Ihnü nü nengsere.

⁴²Ko nühnü lede I yu nyirepü Ihnü müdhele, ko hila yarütinü nühnü Ih müthehchoepü yudsinung nengdang Ihnü hi yore.”

⁴³Abinü hütsüta choko khanglang, yuva athsengnü dsi yocho, “Lazarus chürung!”

⁴⁴Hütsüde ajing akheh meshünü yüpü ko aromih shünü müshütipü abi chürocho. Jisunü arüh te yocho, “Abi lehchehjüng ko tsisohng.”

⁴⁵Mary xodhengnung roba nyitsarütinü Jisunü nguchicho ngu abi chah yudsicho.

⁴⁶Ta khürünü Farisirü yang wünü Jisunü tu nguchicho hütsü arüh te yocho.

⁴⁷Hütsünü Farisirü ko bebü ayingtinü ashimükhong li yocho, “Ihsanü tu nguchinung? Hiba nyitsarünü nguchiba thsayahiyati apüm tsü dhingdheng!

⁴⁸Ihsanü abi hita du pehjükhang, atümungnü abi du yudsinung ko Roman tasenü Ihsa nyümnung ko Ihsa Amübükuh ko Ihsa yanglih thsangnyangjünung!”

⁴⁹Arüh yola nyüh khüdu, anengnü Kaifas, sü hütsü kang Bebü Amungthriba licho abinü yocho, “Nührünü tu mümüdhe!

⁵⁰Yanglih apüm changnung tenülü apüm nyükheh nyüh khüdu sünung nührü nengdang atsauepü mülümchehrü ang?”

⁵¹Hi abinü alümyunü müyo, ta hütsü kang abi amungthriba bebü thsachonü, abinü Jisu tsü Jihudarü nengdang sünungbae,

⁵²ko arüh nengdang du mah, ta shupishuza liba Tsingrangba tsurüti afü khüdu la nübülungnung nengdang abinü hi chocho.

⁵³Hütsü nyümong tinü Jihudarünü Jisu süsohnung arah külüpcho.

⁵⁴Hütsünü Jisunü Judea la misha mürachicho, ta abinü Efraim dsiba yangdi lang lipilih shündhün wü hütsüla amonoti yola licho.

⁵⁵Phungkhu Thsüti shikhe amünyeh licho ko thsüti bekhu arüh jangjang müsachehnung Jerusalem lang khütango tuwücho.

⁵⁶Arühnü Jisu yangchicho, ko arühnü Amübükuh la shibülungde, khüdunü khüdu te tsingdhengtacho, “Nührü nüsü tu lümro? Abi thsüti lang yuje müronung mah-o?”

⁵⁷Arühnü abi rangnung nengdang, Jisu khüde lirünang khürünü müdhekhang, hütsü youngpü bebü ayingti ko Farisirütinü yuzeng jücho.