Read Sangtam Naga JOHAN 14 Bible Online

JOHAN 14 - Sangtam Naga bible

JOHAN 14

¹Jisunü arüh te yocho, “Nührü tülongri; nührünü Tsingrangba chah yudsing ko I chahsü yudsing.

²I U kuhla alichah khütang lile, ko Ih nührü nengdang alichah rungnümnung würe. Hütsüta mahrelang Ihnü nührü te yobae.

³Ko Ih wü nührü nengdang alichah rungnümko khanglang, Ih khüde linang hütsüla nührüsü linungthsa, Ih anyüpiu ro nührü nünung.

⁴Ih khüde würo hütsüba lang tsü nührünü müdhele.”

⁵Thomasnü abi te yocho, “Abüdongba, nüh khüilang würo Ihrünü mümüdhe; hütsükhang Ihrünü lang tsü khüta müdhenung?”

⁶Jisunü abi te lalingcho, “Lang, yuje ko akang tsü Ih; Ih mükhupü süsü Au yanglang müwücheh.

⁷Abinü arüh te yocho, Adelü nührünü Ih müdheko, nührünü I Usü müdhenung, ko ade tinü nührünü abi müdhele ko abi nguko.”

⁸Filipnü abi te yocho, “Abüdongba, ihrü te Au ngusohng; ihrü nengdang hütsü akükyüe.”

⁹Jisunü lalingcho, “Filip, Ih nührü te hidoi nyahli liko; ta nühnü Ih mümüdherü ang? Sünü Ih ngucho abinü Au nguko. Khang khütapü nühnü, ‘Ihrü te Au ngusohng pü yoro’?

¹⁰Ih Au chah ko Au I chah lirepü nühnü yumüdsirü do?” Ihnü nührü te yoba yu hiri I lümyunü yorü mah, ta Au, sü I chah liro, abinü apu nguchi nguchire.

¹¹Ih Au chah, ko Au I chah lirepü yoba yu tsü yudsing. Hütsüta mahnye Ihnü nguchicho chah dusü yudsing.

¹²Ihnü nührü te yutsatsa yore: Sünü I chah yudsiro Ihnü tu nguchiro abinü hütsü nguchinung, ho, abinü adiu mii nguchinung, tunüo Ih Au yanglang würe.

¹³Ko nührünü I nengla tuturü chingnang Ihnü nguchinung, hütsünü Au ahechi tsü Atsurü khu ngusohnung.

¹⁴Nührünü I neng lanü lango chingkhang, hütsü Ihnü nguchinung.

¹⁵“Nührünü Ih müikhang, I yuzeng bichinung.

¹⁶Ihnü Au te chingnung ko nührü te lede linung nengdang abinü nührü khyang aparü atrorü khüdu jünung.

¹⁷Abi tsü Tsingrangba yuje mishajübong Anbü. Liminü abi mükhyüchore, tunüo liminü abi müngure mahkhang mümüdhe. Ta nührünülü abi müdhele, tunüo abi nührü te lire ko nührü chah lile.

¹⁸“Ihnü nührü mürümürang müpehjünung; Ih nührü yang thali ronung.

¹⁹Akhikyah chah lipü liminü Ih müngupehnung, ta nührünü Ih ngunung; ko Ih akang lichonü, nührüsü akang linung.

²⁰Khode hütsüba nyümong tsü ronang, Ih I U chah, nührü I chah ko Ih nührü chah lirepü nührünü müdhenung.

²¹“Sünü I yuzeng khyüchoro ko hütsüri bichiro abinü Ih müire. Sünü Ih müiro; I Unü abi müinung ko Ihnüsü abi müinung ko abi te Ipu mishanung.”

²²Judasnü (Judas Iskariot mah) yocho, “Abüdongba, khütapü nüpu jangjang limih te mümishapü ihrü te mishanung?”

²³Jisunü abi te lalingcho, “Sünü Ih müiro abinü I adoba bichinung. I Unü abi müinung, ko I U ko Ih abi yang ro abi te linung.

²⁴Sünü Ih mümüiro abinü I yu mübichire. Ko nührünü yuchiba yu tsü I yu mah, ta I riwüsohba Au yue.

²⁵“Ih nührü te lidenü hi nengdang nührü te yoko.

²⁶Atrorü, Anbü Amüsa, sü Aunü I nengla müthehnung, abinü nührü te lüpcho donung ko Ihnü nührü te yochoba atümung lümchehsohnung.

²⁷“Ihnü nührü te atbachi yohpüjüre; Ihnü Ipu atbachi nührü khyang jüre. Ihnü hütsü liminü jücho kyo müjüre. Nührü tülongri ko tüwah; ko tüdrü.

²⁸‘Ih tsire, ta nührü yang thali ronungepü nührü te yocho nührünü yuchiko.’ Nührünü Ih müire langlü, Ih Au yanglang wüba tsü nührünü künyangbae, tunüo abi I tenü adiuba.

²⁹Khode hi tikehnang nührünü yudsinung nengdang, hiri mütikehdenü Ihnü nührü te yore.

³⁰Ihnü nührü te anyahli müchotacheh, tunüo hiba limih yangthsabong tsü tsehle. Abi I chah tu tase müle,

³¹ta Ihnü Au müirepü liminü müdhenung nengdang abinü I khyang yuzeng jücho roh-i; Ihnü lüpcho nguchire. “Rung, Ihsanü hilanü tsinung.