Read Sangtam Naga JOHAN 15 Bible Online

JOHAN 15 - Sangtam Naga bible

JOHAN 15

¹“Ih shükusishü khung, ko tbü thsaba tsü I U lile.

²I chah liba asih müsihba ajengza tsü abinü kyopehre, ko asih sihba jengza tsü asih alaa sihsohnung abinü hütsü dhrükehjüre.

³Nührülü Ihnü jücho adoba khu müsachehpehko.

⁴I chah lieng, ko Ih nührü chah linung. Ajengzanü ashü chah mülikhang ajangjang asih müsihcheh. Hütsü kyo nührünü I chah mülikhang asih müsihcheh.

⁵“Ih shükusishü, ko nührü ajengza. Sü I chah liro, ko Ih sü chah liro, abinü asih khütang sihre; tunüo Ih müzehpü nührünü tu münguchicheh.

⁶Sü I chah müliro abilü ajengza kyopehre ko mükupehre; hitari ajengza tsü khyübülung michang la yoh tahpehre.

⁷Nührü I chah likhang ko I yu nührü chah likhang; nührü khyünyücho ching, ko hütsü nührünü ngunung.

⁸Nührünü asih khütango sihcho khu I U ahechi ngusohre; ko hütsüta nührü I monoti kangre.

⁹I Unü tu khüta Ih müiro, Ihnü hütsü roh-i nührü müire; I müi la lieng.

¹⁰Ihnü tu khüta I U yuzeng bichiro, ko abi amüi la liro; hütsü roh-i nührünü I yuzeng bichikhang, nührüsü I müi la linung.

¹¹“I akünyang nührü chah linung ko nührü akünyang ajeng kangnung nengdang, Ihnü nührü te hi yoko.

¹²I yuzeng tsü hi: Ihnü nührü müicho kyo, nührü khüdunü khüdu te müitaang.

¹³Nyüh khüdunü müyangrü khüdu nengdang apu akang jüba tenü adiu amüi müle.

¹⁴Ko Ihnü nührü te tu mülaro hütsü nührünü nguchikhang, nührü I müyangrü.

¹⁵Ihnü adelü nührü te kulirü pü müdsire, tunüo kulirü khüdunü abüdongrünü tu nguchiro hütsü mümüdhere. Hütsü mahpü, Ihnü nührü te müyangrü pü dsire, tunüo I U chahnü yuchicho lüpcho Ihnü nührü te yoko.

¹⁶Nührünü Ih throchehcho mah; ta Ihnü nührü throchehcho ko nührünü wünü singsih khütango sihsohnung Ihnü nührü jehsohcho. Hütsünü nührünü I nengla tuturü chingnang Aunü hütsü nührü khyang jünung.

¹⁷Hütsüeko, Ihnü nührü te hi mülare: Nührünü khüdunü khüdu te müitaang.

¹⁸“Liminü nührü thrünyikhang, hinü Ih akhu thrünyichoepü nührünü lümchehng.

¹⁹Nührü limih yoerelang, abi yo roh-i nührü müiba thsako. Ta hiba limih lanü Ihnü nührü throchehcho, ko nührü abi yo mah; hütsünü liminü nührü thrünyire.

²⁰Ihnü nührü te yoba yu lümchehng: ‘Ayurü süsü abüdongrü tenü adiuba mah.’ Arühnü Ih dhsümthsekhang, nührüsü dhsümthsenung: arühnü I yu nyikhang, nührü yusü nyinung.

²¹Ta arühnü hi apüm nührü chah nguchinung; tunüo nührü I yo ko arühnü Ih müthehbong mümüdhe.

²²Ih ronü arüh te müyore langlü, arüh amünyi müliba thsako; ta adelü arüh münyi nengdang mülang pehba mülinung.

²³Sünü Ih thrünyiro abinü I Usü thrünyire.

²⁴Ihnü arüh yola sünüsü münguchicho nguchi tsü münguchirelang arüh münyi müliba thsacho; ta adelü Ihnü tu nguchicho; arühnü nguko, arühnü I U Ihjüding thrünyire.

²⁵Ta hütsü arüh yuzeng la thrah licho tikehnungba licho: ‘Arühnü amükangnü Ih thrünyicho’

²⁶“Atrorü, Anbü sünü Tsingrangba yuje mishajüro abi Tsingrangba chahnü ronung. Ihnü abi Au chahnü nührü yang müthehnung, ko abinü I nengdang yuzi jünung.

²⁷Ko nührü mii I yuzi thsanung, tunüo adikeh lanü nührü I yola licho.