Read Sangtam Naga JOHAN 19 Bible Online

JOHAN 19 - Sangtam Naga bible

JOHAN 19

¹Hütsüpü Pilatnü Jisu nümüi xüpsohcho.

²Ko rothsarünü zengshünü kuthri khüdu chehpü hütsü athah la thrijücho; hütsüpü arühnü abi chah meyü-mohba shü khüdu phakehjücho

³ko ronü yocho, “Jihudarü Yangthsaba kutsüp lieng!” Ko arühnü küdu abi chah tangcho.

⁴Pilatnü adesü chüdu sühdi te tsü yocho, “Dheng, Ihnü abi süsohnungthsa tu yuzi müngu pü nührü khyang ngusohnung nengdang hila nührü yang abi no chüronung.”

⁵Hütsüta Jisu tsü zeng kuthri thripü meyü-mohba shü tsü müpipü chürocho. Ko Pilatnü arüh te yocho, “Dheng, nyitsarü tsü hila lile!”

⁶Khode bebü ayingti ko amübükuh nyahrütinü abi ngucho, arühnü züdenü yocho, “Abi khala chah hamkehng! Abi khala chah hamkehng!” Pilatnü arüh te yocho, “Nührü jangjang abi nowüng, ko hamkehng; tunüo Ihnü abi süsohnungthsa tu yuzi müngure.”

⁷Sühdi tsünü lalingcho, “Ihrü yuzeng khüdu lile ko hütsünü abi sübae, tunüo apunü abi Tsingrangba Tsurüepü yore.”

⁸Khode Pilatnü hi yuchicho, abi khüsha drücho.

⁹Abinü Yangthsaba pümji lang thali züdu Jisu te tsingdhengcho, “Nüh khüdenü rocho?” Ta Jisunü mülalingcho.

¹⁰Pilatnü abi te yocho, “Nühnü I te müchotarü ang? Nüh müthehnung mahkhang hamkehsohnung I chah tase kehle ko nühnü mümüdherü do?”

¹¹Jisunü lalingcho, “Amilangnü nü khyang müjürelang, I michah nüh tu tase mülinung. Hütsüeko nü khyang sünü Ih khakhuchüjücho, abi amünyi adiuba.”

¹²Khode Pilatnü hi yuchicho, abinü Jisu müthehnung lang yangchicho. Ta sühdi tsünü züde yocho, “Nühnü abi müthehkhang nüh Kaisar shangrü mah! Sünü apu tsü yangthsarüe ro abi Kaisar nyümrü lile.”

¹³Khode Pilatnü yu hiri yuchicho, abinü Jisu dongkhu no chüducho ko “Lungtpah khyang müdüm,” yukharü pümji chah tsü pümcho. (Hütsüba te Ibri yunü “Gabbatha” pü dsire.)

¹⁴Hütsütadelü Phungkhu Thsüti bekhu nyüthung la kangcho. Pilatnü amülung te yocho, “Nührü Yangthsaba tsü hila lile!”

¹⁵Arühnü züdeli yocho, “Abi mapsehng, abi mapsehng! Abi khala chah hamkehng!” Pilatnü arüh te yocho, “Nührünü I khyang nührü Yangthsaba hamkehsohnyürü mah-o?” Bebü ayingtinü lalingcho, “Ihrü Yangthsaba tsü Kaisar due!”

¹⁶Hütsüde Pilatnü khala chah hamkehsohnung arüh khyang Jisu khakhuchüjücho. Hütsüta arühnü Jisu khakhuchü khyücho.

¹⁷Abinü apu khala dhipü, “Thahrü lih” pü dsiba lang wücho. (Ibri yu la “Golgotha” dsire).

¹⁸Hütsüla arühnü abi khala chah hamkehcho. Arühnü aparüsü nyüh anyüh anyüdinglang khüdu-khüdu, Jisu tsü alongla thsapü hamkehcho.

¹⁹Pilatnü amüdhenung khüdu thrah khala kube tangkehjücho. Abinü thrahba tsü “NAZARETRÜ JISU, JIHUDARÜ YANGTHSABA”

²⁰Nyitsarü adrongnü hütsü khicho, tunüo Jisu hamkehba müdüm tsü yangdi shündhün thsacho. Amüdhenung yu tsü, Ibri, Latin ko Greek yu la thrahcho.

²¹Bebü ayingtinü Pilat te yocho, “Jihudarü Yangthsaba pü tüthrah, ta ‘Jihudarü Yangthsaba’ pü hiba nyitsarünü yochoepü thrahng.”

²²Pilatnü lalingcho, “Ihnü tu thrahko hütsü thrahko.”

²³Rothsarütinü Jisu hamkehpü khanglang, arühnü abi shü khyüjo, müyüshi kang changnahnü rothsarü müipi khüdu-khüdu jeh khyücho. Arühnü axücho mükehba abi bongrikhüm tsüsü khyüchocho.

²⁴Rothsarütinü arüh-e arüh-rü chotacho, “Ihsanü hilü mürehnahnung; ta zii thsadhengpü sü chah thsakehnang abi khyünung. Hiba hi amüsa yu tikehsohnung nengdang licho: “Arühnü I shü arüh yola changtacho, ko I pümkhüm nengdang zii thsadhengcho.” Hütsüta rothsarütinü nguchicho.

²⁵Jisu khala müshüm atpa, atpa ani Klopas nitpü Mary, ko Mary Magdalin yacho.

²⁶Jisunü atpa ko abinü müiba mono hütsüla ya ngunü abinü atpa te yocho, “Khingkurü, nü tsurü dheng!”

²⁷Hütsüpü abinü mono te tsü yocho, “Nü tpa dheng!” Hütsüde tsünü mono tsünü abükyü abi kuh lang notsicho.

²⁸Jisunü adelü lüpcho thümkopü müdhe, Amüsa yu tikehsohnung abinü yocho, “Ih xole.”

²⁹Hütsüla acikihnü jeng mütpah-tbhü khüdu licho; achotsü acikih la tsü münuh thsangcho, ko hyssop dong chah throhkehpü abi be la thükehjücho.

³⁰Jisunü hütsü yongcho ko yocho, “Hi thümpehko.” Hütsüpü aku yahlüp sücho.

³¹Hütsüde Jihudarü langnürünü Pilat te ahamkehrü jing khyahsahjüpü khala chah tsünü arüh me khyüchonung mülajüngpü tsingdhengcho. Hütsü Sabath nyümong bekhu thsachonü arühnü me tsü Sabath nyümong khala chah mükehsohnyücho, tunüo hütsüba nyümong tsü dee amüsa licho.

³²Achotsü rothsarütinü wünü Jisu te hamkehba nyüh jing tsü khyahsahjücho.

³³Ta khode arühnü Jisu chii rocho, arühnü Jisu müsi longpü nguchonü, abi jinglü mükhyahsahjücho.

³⁴Ta rothsarü yola nyüh khüdunü athsuhnü Jisu thringxang la thrarangjücho, ko hütsüdenü ashüh ko kih pohchehcho.

³⁵(Nührünü yudsisohnung nengdang hi sünü tikeh ngucho abinü yuzi jüre. Abi yuzi yuje lile ko abinü yuje chorepü apunü müdhele.)

³⁶Amüsa yunü “Abi chah arüh khüdusü müthsangnyang” pü yocho tikehsohnung hi nguchicho.

³⁷Ko amüsa yu apa khüdunü sü yore, “Süchah arühnü thracho arühnü abi chah dhengnung.”

³⁸Hütsü khanglang, Arimathiarü Josefnü ro Pilat te Jisu me khyünung tsingdhengcho. (Josef tsü aranglangnü Jisu mono thsacho, tunüo abinü Jihudarü langnürü drücho.) Me tsü hitsinung abi khyang Pilatnü mülacho, achotsü Josefnü wünü hütsü hitsicho.

³⁹Nikodemus, sü akhulang Jisu yangnü aromang rocho, abisü Josef yola müchiji ko axümlichi kehba süreh sangre-o bipü wücho.

⁴⁰Anyünü Jisu me tsü khyo Jihudarü merangba yangthsa roh-i axümlichi yohnü shü anana la yühcho.

⁴¹Jisu süsohba müdüm la tsü tbü khüdu licho, ko hütsüla süsü mürangdhengchoba kong asi khüdu licho.

⁴²Sabath nyümong bekhu thsachonü ko kong tsü shündhün thsachonü, arühnü Jisu me tsü hütsüla rangcho.