Read Sangtam Naga JOHAN 21 Bible Online

JOHAN 21 - Sangtam Naga bible

JOHAN 21

¹Hütsüpü Jisunü anyüpiu amonoti te Tiberia kihdi te chüro ngucho. Hütsü hita tikehcho.

²Simon Peter, Thomas (arüp tsurü dsiba), Nathanael (Galil la Kana lanü), Zebedi tsurüti, ko Jisu mono aparü anyüh, arüh müjang licho.

³Simon Peternü aparü te yocho, “Ih ngurangnung würe.” Arühnü abi te yocho, “Ihrüsü nü yola ronung.” Achotsü arühnü kihtang khüdu lanü wücho, ta hütsü romang ayung arühnü tusü mürang.

⁴Tsingselang, Jisu kihbekhüm la yacho, ta hütsü Jisuepü monotinü mütsüpcho.

⁵Hütsüde abinü arüh te tsingdhengcho, “Dhrezarüti, tusü mürangcho mah-o?” Arühnü lalingcho, “Tusü mürang.”

⁶Abinü arüh te yocho, “Nührü yojeh tsü kihtang tsalang tsü phayohchüng, nührünü rangnung.” Achotsü arühnü yojeh tsü phayohchücho ko ngu khütango phatipü arühnü yojeh tsü mükoh tphahchehcho.

⁷Jisunü müiba mono tsünü Peter te yocho, “Hütsü Abüdongbae!” Khode Peternü hütsü Abüdongba epü yuchicho, abinü pümkhüm khümcho, (tunüo abi jengki khohpehpü licho) ko kih la tsohyoh züducho.

⁸Aparü monoti tsü ngunü jeng zehba yojeh tsü tphahpü kihtang la tsünü kihbekhüm lang rocho. Arüh kihbekhüm lanü ashu mah, lang dhünyango du zehcho.

⁹Khode arüh kihbekhüm la mütrahchocho, miha michang chah ngu ko hümthse keh ngucho.

¹⁰Hütsüde Jisunü arüh te yocho, “Nührünü ade rangba ngu lanü khürü hirung.”

¹¹Simon Peternü kihtang la küducho ko ngu adidi thsihpü dhünyangpü asangnü jeng zehpü yojeh tsü athringlang tphahchehcho; ko ngu hütsüdoi zeh nye, yojehlü mürohrüp.

¹²Jisunü arüh te yocho, “Ro tsung.” Hütsü Abüdongba epü müdhenü, “Nüh süo?” pü abi te tsingdhengnung monoti sünüsü müsi mümülahcho.

¹³Achotsü Jisunü wü hümthse ko ngu khyonü arüh khyang jücho.

¹⁴Jisu asücho lanü kangchehli ropü hinü asangpiu monoti te chüro ngure.

¹⁵Arüh tsuyongchopü, Jisunü Simon Peter te yocho, “Johan tsurü Simon, hiri tenü alaa nühnü Ih müirü mah-o?” Abinü lalingcho, “Ho, Abüdongba,” “Ihnü nüh müirepü nühnü müdhele.” Jisunü abi te yocho, “I Sanzati kaang.”

¹⁶Jisunü anyüpiusü abi te yocho, “Johan tsurü Simon, nühnü Ih müirü mah-o?” Abinü lalingcho, “Ho, Abüdongba, Ihnü nüh müirepü nühnü müdhele.” Jisunü abi te yocho, “I Santi xüküm.”

¹⁷Asangpiusü Jisunü yocho, “Johan tsurü Simon, nühnü Ih müirü mah-o?” Ko Jisunü asangpili, “Nühnü Ih müirü mah-o?” pü yochonü Peter longyücho. Hütsünü abinü abi te yocho, “Abüdongba, nühnü lüpcho müdhele; Ihnü nüh müirepü nühnü müdhele!” Jisunü abi te yocho, “I Santi xüküm.

¹⁸Ihnü nü te yutsatsa yore: Nüh dhrezade, nü jangjangthsa shü rapü nü wünyücho lang wücho; ta nüh khode ashirü kangnang, nühnü nü kheh müyungchünung ko aparünü nü shü rajünung ko nüh müwünyücholang nowünung.”

¹⁹(Jisunü Peter khütari asünü Tsingrangba hechisohnung hütsü thongunü yocho.) Hütsüpü Jisunü abi te yocho, “Ih iirung!”

²⁰Peternü ximüla akhang te aparü mono, sü Jisunü müicho ko yangtsude Jisu chah ngakehpü, “Abüdongba, sünü nüh khakhuchüjünung? pü tsingdhengba mii ngucho.”

²¹Khode Peternü abi ngucho, abinü Jisu te tsingdhengcho, “Abüdongba, Hivi hi khüta?”

²²Jisunü abi te lalingcho, “Ihnü abi Ih müro yingcheh lisohnyücho ngang hütsü nühnü tonung? Yah Ih iirung!”

²³Hütsünü hütsüba monolü müsünungepü ajünirü yola yusi tsü sobhocho. Ta hütsü Jisunü abi müsünungepü yochoba mah, ta “Ihnü abi Ih müro yingcheh lisohnyücho ngang, nühnü tu yonung mülepü yochoba due.”

²⁴Hiri choba ko thrahba mono tsü abi-e; ko abi yuje-epü Ihsanü müdhele.

²⁵Adesü Jisunü nguchicho khütango lile. Hütsüri apüm thrahlanglü, athrahcho vakha liminü müzuba thsakopü Ihnü lümre.