Read Sangtam Naga JOHAN 7 Bible Online

JOHAN 7 - Sangtam Naga bible

JOHAN 7

¹Hütsüpü khanglang, Jisunü Galil la rachicho; ta Judea la lü mürachinyücho, tunüo Jihudarünü abi mapsehnung yangchicho.

²Ade Mütpahvi Thsüti amünyethsa licho,

³ko anirütinü abi te yocho, “Nü monotinü nü nguchicho ngunungthsa hilanü shehmüi Juda lang wüng.

⁴Sünü adangchi khüdu kangnyüro, abinü rangnü tu münguchire. Nühnü hiri nguchide liküpnü nüh müdhesohng!”

⁵(Anirütinü mii abi chah yumüdsicho.)

⁶Jisunü arüh te yocho, “I nengdang akyang müchie. Ta nührü bekhyahlü lede lile.

⁷Liminü nührü thrünyirü mah, ta Ih thrünyire, tunüo arüh münyi nguchi nengdang Ihnü yuzi jüre.

⁸Thsüti lang tsü nührü wüng. Hiba thsüti lang tsü Ihlü müwünung, tunüo I nengdang akyang müchie.”

⁹Abinü hütsüta yopü Galil la du licho.

¹⁰Anirü thsüti lang tsü wüko khanglang, abisü rangnü thsüti lang tsü wücho.

¹¹Jihudarü langnürütinü thsüti la tsü abi yangchi yocho, “Abi khüde liro?”

¹²Sühdi la tsü abi nengdang dee jümjümta licho. Khürünü yocho, “Abi nyitsarü atsae,” aparünü yocho, “Mah, abinü nyitsarü amünülang nüre.”

¹³Ta sünüsü abi nengdang mishanü müchocho, tunüo arühnü Jihudarü langnürü drücho.

¹⁴Thsüti bhülong Jisunü Amübükuh la tuwü donung dikehcho.

¹⁵Jihudarü langnürütinü dee nyemüyangnü yocho, “Hiba nyitsarü hi tu mükhipü khüta hitoh-i müdhero?”

¹⁶Jisunü lalingcho, “Ihnü tu doro hi I adoba mah, ta I riwüsohbong Tsingrangba chahnü lile.

¹⁷Sünü Tsingrangba lümcho nguchiro abinü Ihnü doba hi Tsingrangba chahnü a mahkhang Ipu lümyunü chorünang müdhenung.

¹⁸Sünü apu lümyunü chorünang abinü palu nengse yangchire. Ta sünü abi riwüsohbong nengse yangchiro abi tsü yuje ko abi chah tu mülang müle.

¹⁹Mosanü nührü khyang Yuzeng müjücho do? Ta nührü sünüsü yuzeng tsü mübichi. Tuepü nührünü Ih mapsehnung müküpro?”

²⁰Sühdi tsünü lalingcho, “Nü chah motsing lile. Sünü nüh mapsehnung yangchiro?”

²¹Jisunü lalingcho, “Ihnü thsayahiya khüdu nguchicho, ko nührü atümung nyemüyangcho.

²²Nührü tsurüti müjüp-pehnung Mosanü Yuzeng jücho (Hütsü Mosa chahnü mahpü nührü jümürü chahnüe), ko nührünü Sabath nyümong azarü müjüp-pehjücho.

²³Sabath nyümong azarü müjüp-pehchonü Mosa yuzeng müthsangnyangkhang, Ihnü Sabath nyümong nyüh khüdu kyangjüchonü nührü I te zichürorü mah-o?

²⁴Tsahdheng yu tükha, ta yujenü yukhang.”

²⁵Jerusalemrü khürünü yocho, “Langnürütinü mapsehnung yangchiba nyitsarü tsü hi mahrü do?

²⁶Dheng! Abinü mishanü cho rachile, ta arühnü abi nyüm tu müyore! Abi tsü Mesia tsüepü arühnü yuje müdherü mah-o?

²⁷Ta khode Mesia ronang, abi khüdenünang sünüsü mümüdhenung. Ta hiba nyitsarülü khüdenünang Ihsa atümungnü müdhele.”

²⁸Hütsünü Jisunü amübükuh la dode züdenü yocho, “Yuje nührünü Ih müdherü mah-o, ko Ih khüdenünang müdherü mah-o? Ih Ipu lümyunü müro. Sünü Ih riwüsohcho abi yuje. Nührünü abi mümüdhe,

²⁹ta Ihnülü abi müdhele, tunüo Ih abi chahnü rocho ko Ih abinü müthehcho.”

³⁰Hütsüde arühnü abi rangnung müküpcho, ta sünüsü abi chah kheh müthahcho, tunüo abi becho müchiecho.

³¹Ta sühdi la tsü adrongnü abi chah yudsi yocho, “Khode Mesia ronang, hiba nyitsarünü nguchicho tenü alaa nguchinung mah-o?”

³²Sühdi tsünü Jisu nengdang jümjümcho Farisirünü yuchicho, hütsünü arüh ko bebü ayingtinü Jisu rangnung anyahrü khürü müthehcho.

³³Hütsüde Jisunü yocho, “Nührü te Ih adesü azachah linung, hütsüpü Ih müthehbong yang tsinung.

³⁴Nührünü Ih yangchinung, ta Ih müngunung, tunüo Ih linung la tsü nührünü müwüchehnung.”

³⁵Jihudarü langnürünü arühbürü yola chotacho, “Ihsanü abi müngunungthsa abi khüde wünungbao? Abinü Ihsa nyitsarü liba Greek yangditi lang wünü Greekrü donung mah-o?

³⁶Ihsanü abi yangchinung ta abi müngunung, ko abi linung la tsü Ihsanü müwüchehnung yoba hi tu adüzüo?”

³⁷Thsüti achangka dizangba nyümong la Jisunü yapü züde yocho, “Sü xoro abi I yanglang ro young.

³⁸Amüsa yunü yocho roh-i, Sünü I chah yudsinang alasih lanü akangnung kih yongna pohnung.”

³⁹Sürünü abi chah yudsicho arühnü ngunung liba Anbü nengdang Jisunü chocho. Hütsütade Anbü tsü müjüecho, tunüo Jisu mühechiecho.

⁴⁰Sühdi la nyitsarü khürünü yu hiri yuchi yocho, “Hiba nyitsarü hi yuje azikehrü tsü-e!”

⁴¹Aparünü yocho, “Abi Mesia tsü-e!” Ta aparü khürünü yocho, “Mesia tsü Galil lanü müronung!

⁴²Mesia tsü David tsutpu lanü ko David liba yangdi Bethlehem lanü ronung Amüsa yunü yo lile.”

⁴³Hütsüta Jisu thsacholanü sühdi yola tsü achangnah chürocho.

⁴⁴Khürünü abi rangnyücho, ta sünüsü abi chah kheh müthahcho.

⁴⁵Khode anyahrüti thali tsicho, bebü ayingti ko Farisirünü arüh te tsingdhengcho, “Tuepü nührünü abi müno rocho?”

⁴⁶Anyahrütinü lalingcho, “Nyitsarü hinü chocho kyo sünüsü müchodheng!”

⁴⁷Farisirünü arüh te tsingdhengcho, “Abinü nührü mii nümülacho mah-o?”

⁴⁸“Langnürüti ko Farisirü khürünü dusü abi chah yudsicho nührünü mütsüp-o?

⁴⁹Sühdi hinü Mosa yuzeng mümüdhe, hütsünü arüh Tsingrangba chokehchola pohki lile!”

⁵⁰Farisirü yola khüdu Nikodemus, sü akhulang Jisu dhengnung wücho abisü hütsüla zeh licho. Abinü aparü te yocho,

⁵¹“Ihsa yuzengnü nyüh khüdu yu münyidhengpü ko abinü tu nguchicho mürangchehpü yu mükhare.”

⁵²Arühnü lalingcho, “Tsale, nüh mii Galilrü mah-o? Amüsa yu tsü khidheng, Galil lanü tu azikehrü müchüronung ko nühnü ngunung.”