Read Sangtam Naga JOHAN 8 Bible Online

JOHAN 8 - Sangtam Naga bible

JOHAN 8

¹Hütsüpü arüh atümung kuh lang tsicho, ta Jisu Olive zong lang tuwücho.

²Nyangnyü khüu mütoh abinü Amübükuh lang thali wücho. Nyitsarü atümung abi mükang shibülungcho, ko abinü pümpü arüh te donung dikehcho.

³Ko Yuzeng adorü e Farisirünü khingkurü khüdu nahtrahnaxeng yade rangchoba norocho, ko arüh atümung bete yasohcho.

⁴Arühnü Jisu te yocho, “Adorü, Hiba khingkurü hi nahtrahnaxeng yade rangcho.

⁵Hitari khingkurü tsü lungnü mapsehnung Mosa yuzeng la yo lile. Ade, nühnüsü tonung?”

⁶Abi xohsohpü mülangjünung nengdang hi tsingdhengcho. Ta abinü mükhurangcho ko amüyungzanü alih la thrahcho.

⁷Arühnü hütsüta abi te tsingdheng yade, abinü tsungmüsu arüh te yocho, “Nührü yola sü amünyi müshitpahdhengcho, abinü akhu abükyü chah lungnü müpm.”

⁸Hütsüpü abinü anyüpiu mükhurang alih la thrahcho.

⁹Arühnü hi yuchide, azibarünü müxüpü arüh atümung khüdu khüdunü tsipehcho. Hütsüla Jisu müleng te khingkutpü tsü ayashüshü pehjüpü tsicho.

¹⁰Abinü tsungmüsu abükyü te yocho. “Arüh khülo-o? Sünüsü nüh mümülangjücho do?”

¹¹Abükyünü yocho, “Abüdongba, sünüsü mümülangjü.” Achotsü Jisunü yocho, “Ihnüsü nüh mümülangjüre. Wüng, ta hiko tinü amünyi tübichi.”

¹²Jisunü Farisirü te anyüpiusü yocho, “Ih limih atsingse, sünü I khanglang ronang abi amala mütsehnung ta akang atsingse ngunung.”

¹³Farisirünü abi te yocho, “ade nühnü nüpu nengdang yuzi jüre; nü yuzi tsü arahkheh.”

¹⁴Jisunü lalingcho, “Ihnü Ipu nengdang yuzi jünyesü, Ihnü yoba tsü yuje, tunüo Ih khüdenü rocho ko khüde wünung hütsü Ihnü müdhele. Ih khüdenü rocho mahkhang Ih khüde wünung hütsü nührünü mümüdhe.

¹⁵Nührünü shutsa phi yukhare; ta Ihnü sü yusü mükhare.

¹⁶Ta Ihnü yukharelang, I yukhaba yuje thsanung; tunüo hütsüla I müleng mah; Au sünü Ih müthehcho abi I yola zehle.

¹⁷Khode nyüh anyüh yuzi linang, hütsü yuje-epü nührü yuzeng la thrah lile.

¹⁸Ihnü Ipu nengdang yuzi jüre, ko Au sünü Ih müthehcho abinü I nengdang yuzi jüre.”

¹⁹Arühnü abi te tsingdhengcho, “Nü U khüde liro?” Jisunü lalingcho, “Nührünü Ihsü mümüdhe ko I Usü mümüdhe. Nührünü Ih müdherelang I Usü müdhebae.”

²⁰Jisunü hiri apüm amübükuh la dode amübü Singdi yohpüji la chocho. Ko sünüsü abi mürangcho, tunüo abi akyang müchiecho.

²¹Jisunü arüh te anyüpiu yocho, “Ih tsipehnung; ko nührünü Ih yangchinung, ta nührü palu münyi la sünung. I wücho lang nührünü mürochehnung.”

²²Hütsüpü Jihudarü langnürünü yocho, “Abi khüde würünang Ihsanü müwüchehnungepü abinü yore. Hi apu jangjang mapsehnung khu mah-o?”

²³Jisunü lalingcho, “Nührü hiba limih lanü, Ih ninglangnü; Nührü hiba limih yo, Ihlü limih yo mah.

²⁴Hütsünü Ihnü nührü te palu münyi la sünungpü yocho. Ko nührünü Ih tsü ‘Abi-e’ ” pü yumüdsikhang, nührübürü münyi la sünung.

²⁵Arühnü abi te tsingdhengcho, “Nüh süo?” Jisunü lalingcho, “Ihnü adikehdinü nührü te tu yocho, hütsüe.

²⁶Nührü nengdang Ihnü ayonung ko mülangjünung khütango lile. Ta sünü Ih müthehcho abi Yuje lile, ko abi chahnü tu nyisicho hütsü du Ihnü alimih te yore.”

²⁷Jisunü arüh te Au nengdang chorepü arühnü münyichehcho.

²⁸Hütsünü abinü arüh te yocho, “Khode nührünü Nyitsarü Tsurü dhikehnang, nührünü ‘Ih tsü Abi’ epü müdhenung; hütsüde Ihnü I lümyunü tu müchore, ta I Unü yocho du yorepü nührünü müdhenung.

²⁹Ko sünü Ih müthehcho abi I te lile; abinü I müleng müpehjü, tunüo abi künyangnungthsa Ihnü lede nguchire.”

³⁰Jisunü hiri chocho yuchi adrongnü abi chah yudsicho.

³¹Achotsü Jisunü abi chah yudsirü te yocho, “Nührünü I adoba nyikhang, nührü ajüje I monoe;

³²nührünü yuje tsü müdhenung, ko Yuje tsünü nührü nyüje kangsohnung.”

³³Arühnü lalingcho, “Ihrü Abraham chahnü trahchocho, ko khodesü ihrü sü yurü müthsadheng. Akhang, ‘Nühnü nyüje kangsohnung pü yoba tsü tu khuo’?”

³⁴Jisunü arüh te yocho, “Ihnü nührü te yutsatsa yore: Sünü amünyi shitpahro abi amünyi yurü.

³⁵Ayurü khüdu tsü kuhla lede mülire, ta atsurü khüdulü lede nengdange.

³⁶Atsudhre tsünü nührü nyüje kangsohkhang, nührü nyüjekhung linung.

³⁷Nührü Abraham chahnü sihchochoepü Ihnü müdhele. Ta I adoba nührünü mükhyüchochonü, nührünü Ih mapsehnung yangchire.

³⁸I Unü I te tu ngusohcho hütsü nengdang Ihnü chore, ta nührünü nührü tpurünü tu yocho hütsü nguchire.”

³⁹Arühnü abi te lalingcho, “Abraham tsü ihrü au.” Jisunü arüh te yocho, “Nührü Abraham tsurüelang abinü nguchicho kyo nguchinung.

⁴⁰Ihnü nguchiba apümnü, Tsingrangba chahnü Ihnü yuchicho yuje tsü nührü te yonung du lile, ta nührünü Ih mapsehnung müküpre. Abrahamnü hi kyo tu münguchi!

⁴¹Nührü aunü tu nguchicho nührünü hütsü nguchire.” Arühnü yocho; “Ihrü Au tsü Tsingrangba apu due, ko ihrü abi tsurü khung.”

⁴²Jisunü arüh te yocho, “Tsingrangba tsü Yuje nührü Auelang, nührünü Ih müibae, tunüo Ih Tsingrangba chahnü rocho, ko hila lile. Ipu lümyunü müro, ta Ih abinü müthehcho.

⁴³Tuepü nührünü I yu münyichehro? Hütsü nührünü I yu rangcho münyichonü.

⁴⁴Nührü, nührü au motsing tsurüti ko nührünü nührü au lümcho la du tsehnyüre. Abi adikehdinü amüpsehrü ko khodesü yuje la müle, abinü arahkheh choba tsü abi susuh, tunüo abi arahkhehrü ko arahkheh apüm au.

⁴⁵Ta Ihlü yuje chore, hütsünü nührünü I yu müdsire.

⁴⁶Nührü sünü Ih amünyirüepü yuzi jüchehnung? Ihnü yuje tsü yokhang tuepü I yu müdsiro?

⁴⁷Sü Tsingrangba chahnü roro abinü Tsingrangba yu nyire.Ta nührü Tsingrangba chahnü müthsachonü nührünü münyire.”

⁴⁸Arühnü Jisu te tsingdhengcho, “Nüh Samariarü ko nü chah motsing zehlepü Ihrünü yoba tsü ihrü athsalang mah ang?”

⁴⁹Jisunü lalingcho, “I chah motsing müle, Ihnü I U jengreng drüre, ta nührünü I jengreng müdrüre.

⁵⁰Ihnü Ipu nengse müyangchire, hütsü yangchiba ko yukhaba khüdu lile.

⁵¹Ihnü nührü te yutsatsa yonung: Sünü I yu nyiro abi khodesü müsünung.”

⁵²Arühnü abi te yocho, “Nü chah motsing zehlepü ade Ihrünü tsüptsi müdhele. Abraham ko azikehrüti sü süko, ta nühnü nü yu nyirülü khodesü müsünungepü yore.

⁵³Ihrü au Abraham süko; nüh Abraham tenü adiuepü yorü mah-o? Ko azikehrütisü süko. Nüh tsü süero?”

⁵⁴Jisunü lalingcho, “Ihnü Ipu jangjang hechikhang, ahechi hütsü tu mah, sünü Ih hechiro abi tsü nührünü nührü Tsingrangepü yoba I U lile.

⁵⁵Nührünü abi khodesü mümüdhe, ta Ihnü abi müdhele. Ihnü abi mümüdhepü yokhang, nührü kyo Ih arahkhehrü. Ta Ihnü abi müdhele, ko Ihnü abi yocho nyire.

⁵⁶Nührü au Abrahamnü Ih roba nyümong ngunung künyangcho; ko abinü hütsü ngucho ko künyangcho.”

⁵⁷Arühnü abi te yocho, “Nüh kang dhünyang mii müjungepü nühnü Abraham ngucho ang?”

⁵⁸Jisunü arüh te lalingcho, “Ihnü nührü te yutsatsa yore: Abraham müsuroedenü Ih licho.”

⁵⁹Hütsüde arühnü abi chah mapnung lung throcho, ta Jisunü Amübükuh lang rang tsicho.