Read Sangtam Naga JOHAN 9 Bible Online

JOHAN 9 - Sangtam Naga bible

JOHAN 9

¹Jisunü lahkhu tside, anahtohjungpü surocho nyüh khüdu abinü mütohcho.

²Amonotinü abi te tsingdhengcho, “Adorü, sü münyinü abi nahtohjungpü suronungthsa kangcho? Apu münyinü a mahkhang tpurü münyi nüo?”

³Jisunü lalingcho, “Abi nahtohba tsü apu münyi mahkhang tpurü münyi nüsü mah, ta abi chah Tsingrangba zii mishanung nengdang.

⁴Atsingse la Ihsanü I riwüsohba nguchi nguchinung; tunüo sünüsü münguchichehnungthsa ama tsü tsehle.

⁵Ih limih la lide, Ih limih atsingse.”

⁶Abinü hütsüta yoko khanglang, Jisunü alih la müjü müchohcho ko müjü tsünü lishe külüpcho; ko lishe tsü anahtse la müyühjüpü

⁷abi te yocho, “Wüng ko Siloam (adüzü ‘müthehcho’) kihting la nü romih müpieng.” Achotsü nyitsarüba tsünü wücho ko aromih müpipehcho ko ngunü thali rocho.

⁸Hütsüde, kurümrü, ko amüngu abi chingkichingnang ngurünü tsingdhengcho, “Pümpü chingkichingnang pümbasü hivi mahrü do?”

⁹Khürünü yocho, “Hütsüvi süe,” ta aparü khürünü yocho, “Abi mah, kyotarü due.” Hütsüde apu jangjang yocho, “Ih hütsüvi süe.”

¹⁰Arühnü abi te tsingdhengcho, “Nüh ade khüta nguro?”

¹¹Abinü lalingcho, “Jisu dsiba nyitsarü tsünü lishe külüp I nahtse la müyühjücho, ko I te wü Siloam la I romih müpipehnung yocho. Achotsü Ihnü wücho, ko müpipehyeng Ihnü ngunung kohcho.”

¹²Arühnü tsingdhengcho, “Abi khüde liro?” Abinü lalingcho, “Ihnü mümüdhe.”

¹³Achotsü arühnü Farisirü yang amüngu nahtohko liba tsü nowücho.

¹⁴Jisunü lishe külüp anah trahsohba tsü Sabath nyümong thsacho.

¹⁵Hütsüde Farisirünü nyitsarüba te tsü abinü khütapü ngucho ko tsingdhengcho. Abinü arüh te yocho, “Abinü I nahtse la lishe müyükehjücho, Ihnü I romih müpipehcho, ko Ihnü ade ngunung kohre.”

¹⁶Farisirü khürünü yocho, “Hi nguchiba nyitsarü tsü Tsingrangba chahnü müthsanunge, tunüo abinü Sabath nyümong yuzeng mübichi.” Ta aparünü yocho, “Amünyi nyitsarü khüdunü khüta thsayahiya hiroh-i nguchichehnung?” Hütsüta arüh yola achangnah chürocho.

¹⁷Hütsünü Farisirünü adesü nyitsarüba te tsü yocho, “Nü nahtoh abinü kyangjüchoepü nühnü yore, khang nühnü abi nengdang tu yoro?” Abinü yocho, “Abi azikehrü khüdu.”

¹⁸Ta Jihudarü langnürünü abi tpurü dsiro “Hi nührü tsurü mah-o? pü arüh te mütsingdhengde yu müdsicho.

¹⁹Abi nahdohjungpü surochoepü nührünü yore, khang, ade abinü khütapü nguro?”

²⁰Abi tpurünü lalingcho, “Abi ihrü tsurüe ko abi nah tohjungpü surochoepü ihrünü müdhele.

²¹Ta ade abinü khütapü ngunung kohro, mahkhang sünü abi nahtse khangthrujücho ihrünü mümüdhe. Apu te tsingdheng; abi lümjingko, abinü apu nengdang lalingnung kohnung!”

²²Jihudarü langnürü drüchonü abi tpurünü hütsüta yocho, tunüo sünü Jisu tsü Mesia epü yudsinang Sinagog lanü iipehnung arüh yutrümpü licho.

²³Hütsünü abi tpurünü yocho, “Abi lümjingko; apu te tsingdheng!”

²⁴Anyüpiusü arühnü abi dsipü yocho, “Nühnü yuje du chonungepü Tsingrangba te nyengchoung! Nüh kyangjüba nyitsarü hi münyirü khüduepü ihrünü müdhele.”

²⁵Nyitsarübanü lalingcho, “Abi amünyi nyitsarü a mahnang Ihnü mümüdhe. Ihnü lango du müdhele: I nah tohcho, ade Ihnü ngure.”

²⁶Arühnü tsingdhengcho, “Abinü nü chah tu nguchicho? Abinü nü nah khüta trahsohcho?”

²⁷Abinü lalingcho, “Ihnü nührü te yopehko, ta nührünü münyi. Tuepü thali nyinyüro? Nührüsü abi mono kangnyürü mah-o?”

²⁸Arühnü abi münyüjo yocho, “Nüh hütsüvi monoe, ta ihrülü Mosa monoe.

²⁹Tsingrangbanü Mosa te chotachoepü ihrünü müdhele, ta hivilü khüdenünang ihrünü mümüdhe!”

³⁰Nyitsarübanü lalingcho, “Hi khüta anyemüyangnungo! Abi khüdenünang nührünü mümüdhe, ta abinü I nah trahsohko!

³¹Tsingrangbanü münyirü te münyire; ta abi jengreng drürü ko abi lümcho nguchirü te du nyirepü Ihsanü müdhele.

³²Limih thridinü sünüsü nahtohrü trahsohcho müyuchidheng.

³³Hiba nyitsarü hi Tsingrangba chahnü rocho müthsakhang, abinü tu münguchichehnung”

³⁴Arühnü lalingcho, “Nüh amünyi la nümüsucho ko nühnü ihrü thsingyunung mah-o?” Ko arühnü abi Sinagog lanü iipehcho.

³⁵Khode Jisunü atikehcho tsü yuchicho, abinü nyitsarüba tsü shiro abi te yocho, “Nühnü Nyitsarü Tsurü chah yudsirü mah-o?”

³⁶Nyitsarüba tsünü lalingcho, “Adirü, Ihnü abi chah yudsinungthsa abi süo?”

³⁷Jisunü abi te yocho, “Nühnü abi nguko, ko ade nü te sünü chotaro hütsü abi-e.”

³⁸Nyitsarüba tsünü yocho, “Abüdongba Ihnü yudsire!” ko Jisu jingte mükhukehcho.

³⁹Jisunü yocho, “Nahtohrünü ngunung ko sürünü nguro arüh nah tohnungthsa yukhanung Ih hiba limih yang rocho.”

⁴⁰Farisirü khürü hütsüla abi te yarünü hütsü yuchi abi te tsingdhengcho, “Ihrü mii nahtohrü mah-o?”

⁴¹Jisunü lalingcho, “Nührü nahtohlanglü, nührü mümülangbae; ta nührünü ngurechonü, nührü mülangre.”