Read Sangtam Naga RIWÜRÜ NGUCHI 1 Bible Online

RIWÜRÜ NGUCHI 1 - Sangtam Naga bible

RIWÜRÜ NGUCHI 1

¹Amüi Theofilus: Vakha akhudiba la, Jisunü anguchi dikehpü abi ninglang nükeh tsi yingcheh

²abinü nguchicho ko docho apüm nengdang Ihnü thrahko. Abi nükeh mütsiede, abi riwürüti thsanung throchehchoti khyang abinü Anbü Amüsa zii khu athülaba jücho.

³Abi süpü nyümong yüre abinü abi akang licho tütohnyünyeh mülisohnung arüh te adrongpi chüro ngusohcho. Arühnü abi ngucho, ko abinü Tsingrangba yanglih nengdang arüh te docho.

⁴Abi arüh yola lide, abinü arüh khyang yuzeng hi jücho: “Jerusalem lanü tütsi, ta I Unü nyengchocho Ihnü nührü te yoba jiyü nengdang ying.

⁵Johan-nü kih la baptijücho, ta tunyah mülipü nührü Anbü Amüsa la baptijünung.”

⁶Khode riwürüti müjang Jisu yola shibülungcho, arühnü abi te tsingdhengcho, “Abüdongba, nühnü ade Israel khyang yanglih tsü thali jünung do?”

⁷Jisunü arüh te yocho, “Bekhyah ko akyangti I Unü apu zii la yohpüre, ko hütsüri nührünü müdhenung athsalang mah.

⁸Ta khode nührü chah Anbü Amüsa ronang, ziinü nührü jengnung ko Jerusalem, Judea ko Samaria apüm la ko limih achangka chiinü nührü I yuzi thsanung.”

⁹Hi yopü, arühnü dheng yade, abi ninglang nükeh tsicho ko arüh nah tenü nyükhinü abi shüticho.

¹⁰Ko arühnü abi tsicho dheng yade, nyüh anyüh shü athru khyüpü arüh müshüm yacho ko arüh te yocho,

¹¹“Galilrü, tuepü nührü hütsüla ninglang dheng yaro? Hi Jisu, sü nührü tenü ninglang no tsicho, khüroh-i ninglang tuwü ngucho hütsü roh-i abi thali ronung”.

¹²Hütsüpü riwürüti tsü Jerusalem lanü lutri khüdu-o wüpü liba Olive Zong la tsünü Jerusalem lang thalicho.

¹³Arühnü yangdi la züducho ko arüh liji amichahba chongsah lang tsü tuwücho: Arüh tsü Peter, Johan, Jakob ko Andreu, Filip ko Thomas, Bartholomeu ko Mathi, Alfaeus tsurü Jakob, suro müirü Simon, ko Jakob tsurü Judas.

¹⁴Arühnü amülungthsa dangkhidangnangnung khingkurüti, Jisu atpa Mary ko anirüti te adrongpi müjang shibülungcho.

¹⁵Tunyah mülipü yudsirüti thsihpü mükyü-o shibülungcho, ko Peternü shemüsu chocho.

¹⁶Jünirüti, “Jisu rangrü te lang thonguba Judas nengdang Anbü Amüsanü David khu choyohchoba amüsa yu tsü tikehnungbae.

¹⁷Judas tsü Ihsa yola khiyoh khüdu licho, tunüo Ihsa nguchi la nohlüm khyünung abisü throchehcho.”

¹⁸(Judasnü apu amütsa nguchicho ngang nguba thsi tsünü alih khüdu licho, hütsüla abi longcho; ko ami tsohphoh bohnying apüm shicheh sücho.

¹⁹Jerusalem la lirü atümungnü hütsü yuchicho, hütsünü arühbürü yu la hütsüba lih te Akeldama pü dsicho adüzü “Ashüh lih.”)

²⁰“Tunüo Nengsekhi la hi thrah lile, ‘Abi kuh pehng; hütsüla süsü tülisoh.’ Adesü hita thrah lile: ‘Abi nguchi khürü khyang khyüsohng.’

²¹“Hütsünü, Abüdongba Jisu kanglicho yuzi thsanung Ihsa yola nyüh khüdu throyohbae.

²²Baptinung nengdang Johan-nü thsingyuba nyümong lanü Abüdongba Jisu Ihsa yola rachicho ayung ko Ihsa yolanü ninglang nükeh tsiba nyümong chiinü Ihsa yola zehrü nyüh khüdu thsanungbae.”

²³Achotsü arühnü nyüh anyüh yodhengcho: Barsabbas dsiba Josef (Justus mii dsicho), ko Mathias.

²⁴Hütsüde arühnü dangkhidangnangcho, “Abüdongba, atümung lümcho nühnü müdhele, hütsüeko Judas, sü apu rülang thali tsipehcho

²⁵abi mülih hinyi yola riwürü khüdu roh-i dikehnung nühnü sü throchehcho, ihrü te young.”

²⁶Hütsüpü arühnü anyüh yola throchehnung zii thsadhengde Mathias chah küducho. Ko arühnü abi dhüre-kheh yola throkehcho.