Read Sangtam Naga RIWÜRÜ NGUCHI 10 Bible Online

RIWÜRÜ NGUCHI 10 - Sangtam Naga bible

RIWÜRÜ NGUCHI 10

¹Kaesarea la nyüh khüdu anengnü Kornelius, “Italirü Rothsarü mülung” ko dsiba, Roman rothsarü yola thsih michah anüchirü licho.

²Abi khakhuchüjüba nyitsarü khüdu; akukhi shünü Tsingrangba jengreng dro licho. Adesü abinü ailümrü dee trocho, ko Tsingrangba te lede dangkhidangnang licho.

³Abinü nyümong khüdu anyüzehlang asang bekhyah koh abi te Tsingrangba riwürü khüdunü ro, “Kornelius!” pü dsicho müngucheh khüdu tsitsa ngucho.

⁴Abinü riwürü chah tsü drüseh dhengkeh yocho, “Hi tuo, Abüdongba?” Riwürü tsünü lalingcho, “Nü dangkhidangnang ko nü amüi nguchinü Tsingrangba longsüre, ko nü te lalingnung rungnüm lile.

⁵Ade Joppa lang Simon Peter ko dsiba nyitsarü nünung khürü müthehng.

⁶Kihbekhüm la shuküp külüprü Simon kuhla abi müdong lile.”

⁷Hütsüde riwürü tsü tsipehcho, ko abinü akulirü nyüh anyüh ko abi dikehrü Tsingrangba müdherü rothsarü khüdu dsicho.

⁸Abinü atikehcho tsü arüh te yopü Joppa lang müthehcho.

⁹Nyümong khüu, arüh lang la Joppa shündhün rode, nyüthung koh Peternü dangkhidangnangnung kuh michah tuwücho.

¹⁰Abi yangcho ko lango tsunyücho; tsuyongnung rungnüm yade abinü müngucheh khüdu ngucho.

¹¹Jongnah müyü kehpü atpah amülah khüdu kyo ning khangthrupü jürochi abinü ngucho.

¹²Hütsüla kanglungrü lüpcho, achitsiba ko rangmü uzati zehcho.

¹³Yuva khüdunü abi te yocho, “Shemüsung Peter; mapsehng ko tsung!”

¹⁴Ta Peternü yocho, “Imoh, Abüdongba! Amümüsa ko münyicho tusü Ihnü khodesü mütsu.”

¹⁵Yuva tsünü thali abi te yocho, “Tsingrangbanü müsachehjücho tusü nühnü amümüsa tükangsoh.”

¹⁶Hiroh-i asangpi tikehcho, ko hütsü ninglang dhikehli tsicho.

¹⁷Hiba müngucheh adüzü nengdang Peter lümkücha yade, Korneliusnü müthehba nyitsarüti, Simonrü kuh tsingchi trahtri te yacho.

¹⁸Arühnü dsicheh tsingdhengcho, “Hila shirü khüdu anengnü Simon Peter lirü mah-o?”

¹⁹Peternü müngucheh tsü nyichehnung müküp yade, Anbünü abi te yocho, “Nyieng! Nyüh asangnü nüh yangchile.

²⁰Rungnümpü jowüng, ko mütütohnyünyehpü arüh yola wüng, tunüo arüh Ihnü müthehcho.”

²¹Achotsü Peternü jowü arüh te yocho, “Nührünü yangchiba nyitsarü tsü Ih-e. Nührü tu nengdang rocho?”

²²Arühnü yocho, “Adirü Korneliusnü ihrü müthehcho. Abi nyitsarü atsa ko Tsingrangba mübürü ko Jihudarü atümungnü abi jengreng drüre. Nühnü abi te tu yonung lirünang abinü nyinungba abi kuhla nüh dsiyohnung riwürü khüdunü abi te yocho.”

²³Achotsü Peternü hütsü romang arüh hütsüla müdongnung kihchicho. Nyümong khüu abinü rungnümpü Joppa lanü yudsirü khürü zeh abi yola wücho.

²⁴Ko nyümong khüu tsü abi ro Kaesarea chihcho. Hütsüla Korneliusnü trahvarü ko shangrüti müjang dsibülungtapü abi yingyacho.

²⁵Peter züdunung thsade, Korneliusnü abi te shirüta, ajing te mükhukeh mübücho.

²⁶Ta Peternü abi tphahmüsunü yocho, “Yamüsung, Ihsü nyitsarü due.”

²⁷Peternü Kornelius te chota kuhla tsü züducho, ko hütsüla khütang shibülung püm ngucho.

²⁸Abinü arüh te yocho, “Yangthsanü Jihudarü khüdunü yangpirü te mükhongnung mahkhang xodhengnung mümülarepü nührünü tsitsa müdhele. Ta Tsingrangbanü nyitsarü süsü amünyi mahkhang amümüsa roh-i tükhichi pü I te yoko.

²⁹Hütsünü nührünü Ih dsinung müthehde, Ihnü tu mülümxüpü rocho. Hütsüeko, tuthsanung Ih dsicho müdhenyüre.”

³⁰Korneliusnü yocho, “Nyümong asang thsako, hiba shikhyah I kuhla anyüzehlang asang bekhyah la dangkhidangnang yacho. Dhrongyengnü I bete shü ariri müpipü nyüh khüdu yacho.

³¹Ko abinü I te yocho: ‘Kornelius! Tsingrangbanü nü dangkhidangnang yuchiko ko nü amüi nguchi müdheko.

³²Joppa lang Simon Peter dsinung khürü müthehng. Abi kihbekhüm la shuküp külüprü Simon kuhla müdong lile.’

³³Hütsünü Ihnü nüh dsinung rosohcho, ko nühnü chomangnü roko. Hütsünü Abüdongbanü nü te tu mülacho lüpcho nyinung hila Tsingrangba jingte ihrü shibülung lile.”

³⁴Peternü chonung dikehcho: “Tsingrangbanü nyitsarü tsah müdhengrepü Ihnü ade müdhere.

³⁵Tu yucho lanü thsanye, sünü abi mübüro ko athsalang nguchiro abinü khyüchore.

³⁶Israelrü khyang abinü atümung michah Abüdongba, Jisu Khrista khu atbachi Yuse Atsa müthehcho nührünü müdhele.

³⁷Johan-nü baptinung thsingyuko khanglang, Galil lanü dikeh Israel apümlang tu tikehcho, hütsü nührünü müdhele.

³⁸Tsingrangbanü khüta Nazaret-rü Jisu chah Anbü Amüsa ko Zii mükhakehjücho hütsü nührünü müdhele. Abinü apümlang wünü nguchi atsa nguchi ko amünyi zii pohki lirü kyangjücho, tunüo abi te Tsingrangba zehcho.

³⁹Abinü Israel ko Jerusalem la nguchicho apüm nengdang ihrü yuzi lile. Hütsüpü arühnü abi khala chah hamkeh süsohcho.

⁴⁰Ta Tsingrangbanü nyümong asang khanglang asücho lanü kanglisohcho, ko

⁴¹atümung te mah, ta Tsingrangbanü throchehcho yuziti abi asücho lanü kangli ropü abi yola tsuyongrü ihrü te ngusohcho.

⁴²Nyitsarü te Yuse Atsa thsingyunung ko abi tsü akang lirü ko asürü yukhanung Tsingrangbanü throchehchoepü yuzi thsanung abinü ihrü khyang yuzeng jücho.

⁴³Abi chah yudsirü müipi abi neng zii khunü mülang pehba ngunung azikehrü atümungnü chocho.”

⁴⁴Peternü cho yade, abi yu nyipümrü atümung chah Anbü Amüsa jürocho.

⁴⁵Peter yola Joppa lanü rorüh Jihudarünü yangpirü chah mii Tsingrangbanü Anbü Amüsa jiyü mükhakehjücho ngu dee nyemüyangcho.

⁴⁶Tunüo arühnü yu papa la chonü Tsingrangba dicho seba arühnü yuchicho. Hütsüde Peternü chochehchücho:

⁴⁷“Hiri nyitsarünü Ihsa roh-i Anbü Amüsa khyüchoko. Khang arüh kih la baptinung nengdang khürünü yatinung kohrü do?”

⁴⁸Achotsü abinü arüh Jisu nengla baptinung yuzeng jücho. Hütsüde abi te arüh yola nyümong azachah linung kihchicho.