Read Sangtam Naga RIWÜRÜ NGUCHI 11 Bible Online

RIWÜRÜ NGUCHI 11 - Sangtam Naga bible

RIWÜRÜ NGUCHI 11

¹Yangpirünüsü Tsingrangba yu khyüchokopü Judea la riwürüti ko aparü yudsirüti atümungnü yuchicho.

²Khode Peter Jerusalem lang wücho, yangpirü müjüp-pehsohnyürünü abi mülangjo yocho,

³“Mümüjüp-pehrü yangpirü kuhla nühnü müdongcho, ko nühnü arüh yola mii yangtsuko.”

⁴Hütsüde Peternü adikeh lanü tu khüta tikehcho ajeng changnah yocho:

⁵“Joppa la Ih dangkhidangnang yade, müngucheh khüdu ngucho. Ninglangnü atpah amülah khüdu kyo jongnah müyü kehpü jürochi Ihnü ngucho, ko hütsü I bete nyehlicho.

⁶Ihnü dee hapkeh dhengde kuhla liba ko rangmü kanglungrü, chitsiba ko rangmü uzati ngucho.

⁷Hütsüpü yuva khüdunü I te yo yuchicho, ‘Shemüsung, Peter; mapsehng ko tsung!’

⁸Ta Ihnü yocho, ‘Imoh, Abüdongba! Amümüsa ko münyicho tsuyongnung I be la khodesü müyohdheng.’

⁹Ninglangnü yuva tsünü thali yocho, ‘Tsingrangbanü müsachehcho tusü nühnü amümüsa tükangsoh.’

¹⁰Hütsüta asangpili ngusohcho, ko achangka la hütsü ninglang dhikeh tsicho.

¹¹Hütsü shikhe la Kaesarea langnü Ih yang müthehcho nyüh asang ro I müdongba kuh chihcho.

¹²Anbünü I te tu mütütohnyünyehpü arüh yola wünung yocho. Joppa lanü Kaesarea lang Ih müyang roba hiri ajünirü nyüh dhüroh, ihrü atümung Kornelius kuhla züducho.

¹³Abinü riwürü khüdu abi kuhla ya ngucho ko abi te, ‘Simon Peter dsinung Joppa lang khürü müthehngpü yocho abinü ihrü te abinü yocho.

¹⁴Nüh ko nührü kukhi khümchonung abinü nührü te yonung.’

¹⁵Ko khode Ihnü chonung dikehcho, Ihsa michah adikehlang Anbü Amüsa jürocho kyo arüh michah Anbü Amüsa tsü jürocho.

¹⁶Hütsüde, ‘Johan-nü kih la baptijücho, ta nührü Anbü Amüsa la baptijünung’ epü Abüdongbanü yocho Ihnü lümchehcho.

¹⁷Khode Ihsanü Abüdongba Jisu Khrista chah yudsicho, Ihsa khyang jiyü jücho roh-i Tsingrangbanü yangpirü khyangsü hütsüba sako jiyü tsü jüde; Tsingrangba yatinung thsa Ih süo?”

¹⁸Arühnü hi yuchide, arühnü nyümba tsü zahcho ko Tsingrangba senü yocho, “Yangpirü khyangsü lasih thsamülaba linung Tsingrangbanü yanglih jüko!”

¹⁹Stefan mapseh dhsümthsede tsishoba yudsirü khürü Foenicia, Cyprus ko Antiok chii Jihudarü te du yuse tsü yo wücho.

²⁰Ta Cyprus ko Seren lanü yudsirüti aparünü Antiok lang wücho, ko yangpirü te mii Abüdongba Jisu nengdang Yuse Atsa tsü sobhocho.

²¹Arüh te Abüdongba zii zehcho, nyitsarü khütangonü yudsi Abüdongba yanglang ximülacho.

²²Hi nengdang yusi tsü Jerusalem chihcho, hütsünü arühnü Barnabas Antiok lang müthehcho.

²³Abi khode chihcho ko Tsingrangbanü müwajücho ngude, abi künyangcho, ko arüh lasih apümnü Abüdongba te yudsi ko yujecho linung arüh atümung thsüchicho.

²⁴Barnabas tsü nyitsarü atsa ko Anbü Amüsa ko yudsinü jeng licho, ko Abüdongba yanglang nyitsarü adrong norocho.

²⁵Hütsüpü Barnabasnü Saul yangchi Tarsus lang wücho.

²⁶Khode abinü abi ngucho, abinü Antiok lang norocho, ko kang richeh anyünü Lithro te shirüta nyitsarü adrong te docho. Yudsirü te akhu Khristan pü dsiba tsü Antiok la thsacho.

²⁷Hütsü shikhe azikehrü khürü Jerusalem lanü Antiok lang wücho.

²⁸Arüh yola nyüh khüdu anengnü Agabus yamüsu, alimih apüm la yangkong atrehdi ronungepü anbü la choyohcho. (Hütsü Yangthsaba Klaudius chichah tikehcho.)

²⁹Monotinü nyitsarü müipi palu kohchonü, Judea la lirü ajünirüti yanglang arüku müthehnung dhrongchehcho.

³⁰Arühnü hütsü roh-i nguchipü thsi tsü Lithro azibarüti yang Barnabas ko Saul nyüh khu müthehcho.