Read Sangtam Naga RIWÜRÜ NGUCHI 12 Bible Online

RIWÜRÜ NGUCHI 12 - Sangtam Naga bible

RIWÜRÜ NGUCHI 12

¹Hi shikhe la Herod Yangthsabanü Lithro khiyoh khürü chah dhsümthsenung dikehcho.

²Abinü Johan amung Jakob nohshengnü kyüsehcho.

³Ko khode abinü hinü Jihudarü künyangsohrepü rangchehcho, abinü Petersü rangnung yangchicho. (Hi Bhüpza müyohba Hümthse Thsüti shikhe tikehcho.)

⁴Peter rangko khanglang abi arangyoh la yohpücho, hütsüla abi rothsarü nyüh müyünü nyahnung mülung müyü khyang khakhuchüjücho. Phungkhu Thsüti khanglang du abi yu khanung Herod lümchung licho.

⁵Hütsüta Peter tsü arangyoh la yohpücho, ta lithrorünü abi nengdang Tsingrangba te khahkhah dangkhidangnangjo licho.

⁶Herodnü abi nyangnyü khüu nüchehnungede, Peter tsü anyahrü nyüh anyüh kahla yüpsohcho. Abi tpoluyo anyünü rahcho, ko arangyoh trahtri la anyahrü yacho.

⁷Dhrongyengnü Abüdongba riwürü khüdu yacho, ko hütsüla atsingse khüdu vikehcho. Riwürü tsünü Peter pakyarünü tphahmüsu yocho, “Zah shemüsung!” Hütsüde tsü akheh lanü tpoluyo tsü shohjocho.

⁸Hütsüpü riwürü tsünü yocho, “Nü kih rüm ko nü jingkhüm khüm.” Peternü hütsü roh-i nguchicho ko riwürü tsünü yocho, “Nü shü müpieng ko Ih iirung.”

⁹Peternü arangyoh kuh khu iiwücho, ta riwürünü nguchiba tsü tsalangepü mülüm; ta müngucheh khüduepü du lümcho.

¹⁰Arühnü akhudiba anyahrü yaji ko anyüuba khucho, ko achangka la yangdi lang nüba idhse tbükhüm chihcho. Trahtri tsünü ajangjangthsa arüh khyang khangthrujücho, ko arühnü chüducho. Arühnü lang khüdu khu jowücho, ko dhrongyengnü riwürü tsünü Peter pehjo tsicho.

¹¹Hütsüde Peternü abi chah tu tikehcho hütsü lümcheh yocho, “Hi yuje tsalangepü Ihnü müdhele! Herod kheh lanü ko Jihudarü nahmürahba lanü khümchonung Abüdongbanü abi riwürü müthehko.”

¹²Hütsü suro tsü müdhenü, abinü Johan Mark atpa Mary kuh lang wücho. Hütsüla nyitsarü adrong shibülung dangkhidangnang yacho.

¹³Peternü dongkhu kukhang chah drongdrongchicho, ko kulilarü anengnü Roda lalingnung rocho.

¹⁴Abükyünü Peter yuva nyichehcho ko alongphichonü kukhang tsüsü mükhangthrujüpü thali shang wünü Peter dongkhu yalepü müdhesohcho.

¹⁵Arühnü abükyü te yocho, “Nüh mükyangle! Ta abükyünü yuje-epü ritacho. Hütsüde arühnü lalingcho, Hütsü apu nbüe.”

¹⁶Hütsüde tsü Peternü mütozah drongdrongchicho. Achangka la, khode arühnü kukhang khangthrucho, arühnü abi ngu nyemüyangcho.

¹⁷Abinü arüh te yah-a du linung akhehnü iiticho, hütsüpü abinü khüta Abüdongbanü abi arangyoh lanü nüchehcho hütsü arüh te yocho. Ko abinü yocho, “Jakob ko ajünirüti te young;” hütsüpü abinü khüdenang tsipehcho.

¹⁸Tsingsede, Peter tu kangcho pü anyahrüti yola khütang lüm dhamacho.

¹⁹Herodnü abi yangchinung yuzeng jücho, ta arühnü abi müngucho. Achotsü abinü anyahrüti te yutsingcho ko arüh süsohnung yuzeng jücho.

²⁰Herodnü Tyre ko Sidonrü te khütang wahcho, hütsünü arüh amülung thsapü abi shirünung wücho. Akhudi arühnü arüh trosohnung Yangthsaba kuh dhengyehbong Blastus kihchicho. Hütsüpü arühnü Herod yanglang wünü yangtsa chingcho, tunüo Yangthsabarü lih lanü arüh yucho khyang tsuyongnung chixicho.

²¹Athrochehcho nyümong khüdu la Herodnü Yangthsaba jengki khyüpü yukhaba pümji la pümcho ko nyitsarüti te chocho.

²²Arühnü züde yocho, “Hi nyitsarünü chorülü mah, ta Tsingrangrü khüdue.”

²³Hütsüde tsünü Abüdongba ninglang riwürünü Herod xüptsucho, tunüo abinü Tsingrangba khyang jengreng müjü. Ko abi müsinü rühseh sücho.

²⁴Hütsüla Tsingrangba yu mütozah sobho zicho.

²⁵Arüh nguchi thümpü khanglang, Barnabas e Saul nyünü Johan Mark nüpü Jerusalem lanü thalicho.