Read Sangtam Naga RIWÜRÜ NGUCHI 13 Bible Online

RIWÜRÜ NGUCHI 13 - Sangtam Naga bible

RIWÜRÜ NGUCHI 13

¹Antiok Lithro la tsü azikehrüti ko adorüti khürü licho. Barnabas, (Anyah ko dsiba) Simon, Cyrene lanü Lucius, Herod Governor yola kangchehba Manean ko Saul.

²Arüh Abüdongba dikeh kong lide, Anbü Amüsanü arüh te yocho, “Ihnü arüh dsiba nguchi nguchinung nengdang Barnabas ko Saul nyüh I nengdang pathsa yohpüng.”

³Arühnü kong dangkhidangnangpü arüh chah khehnü nyümyehjüpü arüh müthehcho.

⁴Anbü Amüsanü müthehnü, Barnabas ko Saul nyühnü Selucia lang jowücho ko hütsü lanü Cyprus mütro lang kihtang chahnü wücho.

⁵Khode arüh Salamis chihcho, arühnü Sinagog la Tsingrangba yu thsingyucho. Arüh trosohnung Johan Mark arüh yola nücho.

⁶Arühnü Pafos mütro khu lang ayung wücho, hütsüla azikehrüepü dsiba Jihudarü khüdu amongrü anengnü Bar Jisu shirücho.

⁷Abi tsü hütsüba mütro Governor, athsehthsa Sergius Paulus müyangrü thsacho. Governornü Barnabas ko Saul nyüh abi bete dsicho tunüo abinü Tsingrangba yu nyinyücho.

⁸Ta amongrü Elemas (hütsü Greek yu la abi neng) tsünü müküpnü arüh iiticho.

⁹Hütsüde Saul, süte Paul dsicho, Anbü Amüsanü jengnü; abinü amongba chah tsü nyeh-e dheng yocho,

¹⁰“Nüh motsing tsurü! Atsa apüm rorüh tsü nüh. Nüh amünyi rah lüpchonü jeng lile, ko nüh lede Abüdongba yuje tsü arahkheh kangsohnung müküpre.

¹¹Ade Abüdongba kheh nü chah küronung; nü nah tohpehnung ko nühnü anyümong atsingse azachah nengdang müngunung.” Hütsüde tsünü ama khüdunü anahtse shüticho Elemasnü müdhecho, ko abi shürisohnung nyitsarü khürü yangchi thrümchicho.

¹²Governornü atikehcho tsü ngu yudsicho tunüo Abüdongba nengdang docho la tsü abi dee nyemüyangcho.

¹³Paul ko ashangrüti Pafos lanü Pamfelia la yangdi khüdu Perga chii kihtang lanü rocho. Hütsü la Johan Marknü arüh pehjüpü Jerusalem lang thali tsipehcho.

¹⁴Arühnü Perga lanü mütozahnü Pisidia la Antiok chihcho, ko Sabath nyümong arühnü Sinagog la züdu pümcho.

¹⁵Mosa Yuzeng ko azikehrüti vakha lanü khiko khanglang, Sinagog la adirütinü arüh yang yusi khüdu müthehcho: “Jünirüti, nyitsarüti nengdang nührü athsüchiba yu likhang yosohnyüre.”

¹⁶Paulnü shemüsupü akhehnü iichi chonung dikehcho: “Israelrü ko Tsingrangba mübürüti apümnü hi nyieng:

¹⁷Israelrü Tsingrangnü Ihsa jümürüti throchehcho ko arüh shirü lih Ijip la lide yucho arangcheh kangsohcho. Tsingrangbanü abi zii amülahnü arüh Ijip lanü nüchehcho,

¹⁸ko kang yüre lipilih la abinü arüh te rangchocho.

¹⁹Abinü Kanan limih la yucho dhünyeh changsohpü abi nyitsarüti abüdongrü kangsohcho.

²⁰Hiri apüm kang thsih müyüpü dhünyang khyücho. “Hütsü khanglang Samuel azikehrü nyümong tashi arüh khyang yukharü jücho.

²¹Ko khode arühnü yangthsarü khüdu chingcho, kang yüre arüh yangthsarü thsanung Tsingrangbanü Benjamin tsutpu lanü Kish tsurü Saul jücho.

²²Abi khyümüipü, Tsingrangbanü David arüh yangthsarü kangsohcho. Abi nengdang Tsingrangbanü hita yocho: ‘I longsüba ko Ihnü lümcho apüm nguchinung I khyünyücho nyitsarü Jese tsurü David Ihnü nguko.’

²³Anyengchocho roh-i David chahnü trahchocho lanü Tsingrangbanü Israelrü khyang Kangchehjüba khüdu Jisu tsü jücho.

²⁴Jisu nguchi müdikeh-ede, Johan-nü Israelrü atümung te arüh münyi lanü lasih thsamüla baptinung thsingyucho.

²⁵Johan-nü anguchi thüm rode nyitsarüti te yocho, ‘Nührünü Ih süero? Nührünü yingba tsü Ih mah. Ta dheng! Nyüh khüdu, sü jing lanü jingkhüm phungchehnung mii Ih müdekhengro, abi I khanglang tsehle’

²⁶“Abraham chahnü trahchocho Israelrü, ko Tsingrangba mübürü jünirüti: Hiba akangcheh yusi hi Ihsa yanglang müthehcho.

²⁷Tunüo Jerusalem la lirü ko arüh langnürünü abi tsü Kangchehjübaepü mütsüpcho, mahkhang arühnü Sabath nyümong mükhu khiba azikehrüti yu tsü münyicheh. Ta arühnü Jisu mülangjücho khu azikehrüti yu tikehsohcho.

²⁸Ko arühnü abi asünung leng yuzi tu müngu nye, arühnü Pilat te abi süsohngpü khingcho.

²⁹Ko abi nengdang amüsa yunü yocho lüpcho arühnü nguchiko khanglang, arühnü abi khala chah tsünü dhicho kong khüdu la yohpücho.

³⁰Ta Tsingrangbanü abi asücho lanü kanglisohcho,

³¹ko abi yola Galil lanü Jerusalem lang würü te nyümong adrong chüro ngusohcho. Arüh tsü ade Israelrü te abi nengdang yuzi lile.

³²Ko tu Tsingrangbanü abinü nguchinung Ihsa jümürü te nyengchocho, ko hütsü ade abinü Ihsa arüh shümtsurüti te Jisu kanglisohchonü abinü Ihsa te nguchicho, hi nengdang nührü te Yuse Atsa yonung ihrü lile.

³³Nengsekhi anyüuba la thrah licho kyo: “Nüh I tsurü; chünye Ihnü nüh nümüsure.

³⁴Ko hi tu Tsingrangbanü abi asücho lanü kangchehlinung yocho, khodesü kong la tsü müsütpahnungthsa: ‘Ihnü David te nyengchocho amüsa ko amüwa Ihnü nü khyang jünung.’

³⁵Ajüje abinü nengsekhi apa khüdu la yocho kyo: ‘Nühnü nü dikehrü kong la müsütpahsohnung.’

³⁶Tunüo Davidnü apu chiichah Tsingrangba dikehko khanglang abi sücho, ko abi jümürü te dhrürangcho, ko kong la abi fü sühtpahcho.

³⁷Ta Tsingrangbanü asücho lanü kanglisohbong chah hütsüta mütikeh.

³⁸Ajünirü Israelrü, nührü yangang münyi mülang pehba yusi ko abi chah yudsirü müipi Mosa yuzengnü lehchehnung mükohba apüm lanü nührü nyüje kangsohnung nengdang;

³⁹Jisu khu dunü nührü te thsingyuchoepü nührü khyang müdhesohnyüre.

⁴⁰Hütsüeko, azikehrünü tu chocho hütsü nührü chah mütikehnung nengdang müzahmükieng:

⁴¹‘Dheng, nührü müthsamünyürüti! nyemüyang ko changpehng! Tunüo Ihnü chünye tu nguchiro hütsü khürünü nührü te yonyesü, nührünü müyudsinung.!’ ”

⁴²Paul e Barnabas nyüh Sinagog lanü tside, nyitsarütinü aronung Sabath nyümong thali ro arüh te hütsüri nengdang alaa yonung kihchicho.

⁴³Ashibülung tsü shishoko khanglang, Jihudarü ko Jihuda yangthsa khyüchorü yangpirüti adrong Paul e Barnabas nyüh khanglang iiwücho. Riwürütinü arüh te Tsingrangba achomang la mütozah linung müküpm pü thsüchicho.

⁴⁴Akhüu Sabath nyümong tsü yangdi la nyitsarü adronguba Tsingrangba yu nyinung rocho.

⁴⁵Jihudarünü sühdi tsü ngude, arühnü mükoh dhengcho; ko Paulnü chocho yu la yujinü abi mükhimüngucho.

⁴⁶Ta Paul e Barnabas nyühnü alaa du re zehnü chocho: “Nührü te Tsingrangba yu akhu chonung tsü athsütah thsacho. Ta nührünü hütsü mükhyüchochonü ihrünü nührü pehjo yangpirü yanglang ximülare.

⁴⁷Tunüo Abüdongbanü hiroh-i ihrü te mülako: “Lihküpshünü khümchonung nengdang, yangpirü nengdang atsingse khüdu Ihnü nührü külüpcho.”

⁴⁸Khode yangpirütinü hi yuchicho, künyangnü Abüdongba yusi tsü arühnü secho; ko sürü müchangkaba akang nengdang throchehcho arüh yudsirü kangcho.

⁴⁹Abüdongba yu tsü hütsüba lih apümlang sobhocho.

⁵⁰Ta Jihudarünü yangdi la ko Tsingrangba mübüba mülung la aneng atsa lirü yangpilarüti thsümüsucho. Arühnü Paul e Barnabas nyüh nyüm shemüsu lurü khu arüh iipehcho.

⁵¹Riwürütinü arüh nyümnü arüh jing chah asongsong tipehpü Ikonium lang wücho.

⁵²Antiok la yudsirüti tsü akünyang ko Anbü Amüsanü jeng licho.