Read Sangtam Naga RIWÜRÜ NGUCHI 14 Bible Online

RIWÜRÜ NGUCHI 14 - Sangtam Naga bible

RIWÜRÜ NGUCHI 14

¹Ikonium lasü hütsü kyo tikehcho: Paul e Barnabas nyühnü Sinagog la wünü chode Jihudarü ko yangpirüti khütango yudsirü kangcho.

²Ta müyudsirü Jihudarütinü yangpirü ruhmüsu yudsirüti nyüm yasohcho.

³Riwürütinü hütsüla nyümong asheng mungnü Abüdongba nengdang rezeh chocho; ko abi achomang nengdang arüh yusi tsü yuje-epü yuzi nengdang arüh khyang thsayahiya ko anyemüyangnung nguchinung zii jücho.

⁴Ko yangdi la liba nyitsarü tsü changnahpü khürü Jihudarü ko khürü riwürüti yola zehcho.

⁵Hütsüde Jihudarü ko yangpirü khürü arüh langnürüti zeh riwürü chah mütsa bichi lungnü mapnung dhrongchehcho.

⁶Khode riwürütinü hütsü yuchicho, arühnü Likonia la Lystra ko Derbe yangditi ko mükangmüshü lih lang tsicho.

⁷Hütsüri la arühnü Yuse Atsa tsü thsingyucho.

⁸Lystra la asuro denü jahloh-hilohrü ko khodesü mütsehdhengba nyüh khüdu licho.

⁹Abinü hütsüla pümpü Paul yu nyicho. Abinü yudsile ko kyangnung kohlepü müdhenü Paulnü abi chah nyeh-e dhengcho

¹⁰ko yuva amülahnü yocho, “Müchongkhüti yaang!” Ko abinü tsohmüsu tsehcho.

¹¹Ko sühdi tsünü Paulnü nguchicho ngude, arühnü arühbürü Likoniarü yunü züdecho, “Ihsa yanglang tsingrangti nyitsarü kyo kangpü jüro lile!”

¹²Arühnü Barnabas te Zeus ko Paul te Hermes dsicho, tunüo abi yuchorü aying licho.

¹³Ko yangdi shündhün liba Zeus amübükuh bebüba tsünü tbükhüm lang tsü misüpung ko yungpi lah hirocho, tunüo abi ko sühdi tsünü riwürüti khyang kangmübü mübünyücho.

¹⁴Khode Barnabas e Paul nyühnü hütsü yuchicho, arüh shü rehnah sühdi longla tsü züde züducho,

¹⁵“Nührünü tuepü hiroh-i nguchiro? Ihrüsü nührü kyo nyitsarü due! Ning, alimih, kihdi ko hütsüla liba apüm külüpbong akang Tsingrang yanglang hütsüri amükhyu nguchi lanü nührü ximülasohnung nührü yang yusi atsa seyohjünung ihrü hila lile.

¹⁶Atsichola abinü apüm palu thsanyücho thsasohko.

¹⁷Ta abinü lede abi liba tsü nguchi atsa khu yuzi jücho: abinü ninglangnü tsing rosohre ko bechola tsahma jüre; abinü tsuyongnung jüre ko nührü lasih akünyangnü jengjüre.”

¹⁸Hütsüpü du, riwürütinü arüh mümübüsohnung haririnü sühdi tsü yaticho.

¹⁹Ta hütsüde Pisidia la Antiok ko Ikonium lanü Jihudarü khürü rocho; arühnü sühdi tsü arüh lahpi kihchocho, ko Paul chah lungnü kengcho ko abi sükopü lümnü yangdi lanü tphahchehchüpehcho.

²⁰Ta khode yudsirüti abi mükang shibülungcho, abi shemüsu yangdi lang züducho. Nyümong khüu Barnabas anyüh Derbe lang wücho.

²¹Paul e Barnabas nyühnü Derbe la Yuse Atsa thsingyucho ko nyitsarü adrong mono kangcho. Hütsüpü arühnü Lystra, Ikonium ko Pisidia la Antiok lang thalicho.

²²Arühnü yudsirüti rezehsohcho ko yudsi la drengdreng linung thsüchicho. Arühnü docho, “Tsingrangba yanglih la züdunung nengdang chongcha adrong khunungbae.”

²³Lithro mükhu arühnü azibarüti throchehnü, kong dangkhidangnangpü arühnü yudsiba Abüdongba khehla arüh nyümkeh yohpüjücho.

²⁴Arühnü Pisidia lih bongnü Pamfelia lang rocho.

²⁵Ko Perga la thsingyupü khanglang Attalia lang wücho.

²⁶Hütsü lanü Antiok lang khüi lanü Tsingrangba achomang nguchi nengdang nyümkehjücho adelü thümpü kihtang lanü thalicho.

²⁷Khode arüh Antiok ro chihcho, arühnü lithrorü müjang shibülungpü, arüh te Tsingrangbanü nguchicho apüm ko yangpirü nengdang abinü khüta yudsinung lang khangthrujücho hütsü apüm arüh te yocho.

²⁸Ko hütsüla arühnü yudsirü te bekhyah anyahli mungcho.