Read Sangtam Naga RIWÜRÜ NGUCHI 15 Bible Online

RIWÜRÜ NGUCHI 15 - Sangtam Naga bible

RIWÜRÜ NGUCHI 15

¹Judea lanü Antiok lang khürü ro yudsirüti te hita thsingyucho, “Mosa yuzengnü mülacho roh-i mümüjüp-pehkhang, nührü khümchonung mükoh.”

²Paul e Barnabas nyühnü hi nengdang arüh te khütang rehtacho, achotsü Paul e Barnabas nyüh yola aparü khürü zeh hiba khiyu nengdang riwürüti ko azibarüti shirünung Jerusalem lang wüsohnung kihtacho.

³Arüh tsü lithrorünü müyangyohchücho; ko arüh Foenicia ko Samaria bong tside, yangpirü khüta Tsingrangba yang ximülacho hütsü arüh te yocho ko hiba yusinü yudsirüti atümung künyangsohcho.

⁴Khode arüh Jerusalem chihcho, Lithro azibarüti ko riwürütinü arüh künyang khyüchocho, ko Tsingrangbanü arüh khu nguchicho apüm nengdang arüh te yocho.

⁵Ta Farisirü lahpi zehrü yudsirü khürünü shemüsu yocho, “Yangpirü tsü müjüp-pehbae ko Mosa yuzeng bichisohbae.”

⁶Riwürüti ko azibarüti hiba khiyu kihtanung shimükhongcho.

⁷Anyahli rehtako khanglang Peternü shemüsu yocho, “Jünirüti, yangpirü te Yuse Atsa thsingyunung ko arühnü yuchiba yudsisohnung nengdang nührü yolanü akhudinü Tsingrangbanü Ih throchehcho nührünü müdhele.

⁸Ko nyitsarü müipi lasih müdheba Tsingrangnü Ihsa khyang jüba roh-i yangpirü khyangsü Anbü Amüsa jonü, arüh khyüchocho.

⁹Abinü arüh-e Ihsa kahla tu papa mübichi; arühnü yudsichonü abinü arüh münyi pehjücho.

¹⁰Hütsütakhang, bha khüi Ihsanü mahkhang Ihsa jümürütinü mükoh hicho, hütsü yudsirü chah phungrangjonü, tuepü Tsingrangba thsatsüro?

¹¹Ta Abüdongba Jisu achomang khu arüh kyo Ihsa sü kangchehnungepü yudsire.”

¹²Barnabas e Paul nyühnü Tsingrangbanü arüh khu yangpirüti yola thsayahiya ko anyemüyangnung nguchicho yode amülungshünü sahmüthsa nyicho.

¹³Khode anyünü chozahcho, Jakobnü shemüsu yocho: “Jünirüti, I yu nyieng!

¹⁴Tsingrangbanü yangpirü akhu xükümcho amüdhethsa apu nyitsarü arüh yolanü nüchehcho ade Simon khu yuchiko.

¹⁵Hinü azikehrüti yu ajeng tikehcho ngusohre. Amüsa yunü yocho kyo:

¹⁶“‘Hi khuko khanglang Ih thali ronung ko David yanglih thali khyünung. Ihnü athsangnyangcho külüpchinung ko hütsü yachehsohnung.

¹⁷Ko amüi tsurü atümung I yanglang ronung, Ko I nengla dsiba yangpirü atümung I yo kangnung.

¹⁸Hütsüta papadenü hi müdhesohba Abüdongbanü yore.’ ”

¹⁹Jakobnü yocho, “I lümcholü, yangpirü sürü Tsingrangba yang ximülaro arüh khyang athsangthsi müjübae.

²⁰Ta kyothri khyang mübücho amümüsa mütsunung; nahtrahnaxeng lanü za linung; ko axihsehcho kanglungrü mahkhang ashüh mütsunung yonü vathrah khüdu thrahnung.

²¹Tunüo papadenü Mosa yuzeng tsü Sabath nyümong müthe Sinagog la khinü rore, ko abi yu yangdi mükhu la thsingyure.”

²²Hütsüpü riwürüti ko azibarüti lithrorü zehnü, arüh yolanü nyitsarü khürü throcheh Paul e Barnabas nyüh yola Antiok lang müthehnung rungnümcho. Arühnü yudsirünü dee khichi liba nyüh anyüh, Barsabbas dsiba Judas ko Silas nyüh throchehcho, ko

²³arühnü vathrah hita thrahpü müthehcho: “Antiok Syria ko Silicia la yangpirü ajünirü yanglang, riwürüti, azirüti ko ajünirüti atümungnü salüm mühehre.

²⁴Ihrü yolanü nyitsarü khürü ronü nührü thsangthsisoh ko wahsohcho ihrünü yuchiko; ta ihrü chahnü tu athülaba arühnü mükhyü.

²⁵Hütsünü ihrü müjang shimükhong betrümpü nührü yanglang khürü throcheh rosohnung rungnümcho.

²⁶Arüh, ihrünü müiba shangrü Barnabas ko Paul, sürü Ihsa Abüdongba Jisu Khrista dikehba la akang apüm jücho, anyüh yola rosohnung.

²⁷Hütsüeko, Ihrünü tu thrahro hütsü abenü yosohnung Judas e Silas nyüh nührü yanglang rosohre.

²⁸Yuzeng hiri chah khu apa bhamüling nührü khyang tu müjünung nengdang Anbü Amüsa ko ihrünü yutrümko:

²⁹Kyothri khyang mübücho tu mütsunung; ashüh mütsunung; axihsehcho kanglungrü mütsunung; ko nahtrahnaxeng lanü nührü jangjangthsa za lieng. Hiri hi münguchinung nührünü müzahkhang nührü tu müthsanung. Salüm na.”

³⁰Yusi hirü tsü Antiok lang müyangyohchücho ko hütsüla arühnü yudsirü atümung shimükhongsohpü vathrah tsü jücho.

³¹Khode arühnü hütsü khicho, athsüchi yusi khu arüh akünyangnü jengcho.

³²Judas e Silas nyüh, anyübünyü azikehrü thsachonü, arüh rezehsoh anyahli arüh te chocho.

³³Hütsüla azachah mungpü, yudsirütinü arüh atbachi la müyangyohchücho ko arüh müthehrü yanglang thalicho.

³⁴(Ta Silas lü nyehlinung dhrongchehcho.)

³⁵Paul e Barnabas nyühnü aparü adrong zehnü, Abüdongba yu donü ko thsingyunü azachah Antiok la mungcho.

³⁶Azachah lipü Paulnü Barnabas te yocho, “Ihsanü Abüdongba yu thsingyuba yangdongti apümlang Ihsanü thali wü arüh khüta lirünang xodhengnung.”

³⁷Barnabasnü Johan Mark anyüh yola nünyücho,

³⁸ta Paulnü abi nünung athsalang mah pü lümcho, tunüo abinü arüh yola achangchi müzehpü Pamfelia lanü thali tsipehcho.

³⁹Anyüh kahla yujita amülah chüro anyüh zacho. Barnabasnü Mark nüpü Cyprus lang kihtang lanü tsicho,

⁴⁰ta Paulnü Silas throchehcho, ko yudsirütinü Abüdongba achomang khehla nyümkehjo zacho.

⁴¹Abinü lithroti rezehchisohnü Syria ko Silicia bong tsicho.