Read Sangtam Naga RIWÜRÜ NGUCHI 16 Bible Online

RIWÜRÜ NGUCHI 16 - Sangtam Naga bible

RIWÜRÜ NGUCHI 16

¹Paulnü Derbe ko Lystra lang rocho, ko hütsüla khristan khüdu anengnü Timoti licho. Atpa tsü Jihudalarü khristan khüdu, ta aulü Greekrü thsacho.

²Lystra ko Ikonium la yudsirütinü Timoti tsacho se licho.

³Paulnü abi yola Timoti nünyücho tsü abi müjüp-pehjücho. Tunüo hütsüla lirü atümungnü Timoti au tsü Greekrüepü müdhe lichonü abinü hütsüta nguchicho.

⁴Arühnü yangdongti khu tside, Jerusalem la riwürüti ko azibarütinü tu yuzeng külüpcho, hütsüri bichinung müdhesohcho.

⁵Hütsüta lithroti yudsi la rezehsohcho ko nyümong mükhu khiyoh la alaa zikehcho.

⁶Asia lih la yusi tsü müthsingyunung Anbü Amüsanü yatichonü, arühnü Fergia ko Galatia lih khu tsicho.

⁷Khode arühnü Mysia lurü chihcho, arühnü Bithenia lih lang wünung müküpcho, ta Jisu Nbünü arüh khyang mümülacho.

⁸Achotsü arühnü Mysia lanü Troas lang müchungdi wücho.

⁹Hütsü romang Paul müngucheh khüdu la Macedoniarü khüdunü abi te kihchi yocho, “Macedonia lang rung ko ihrü troung!”

¹⁰Paulnü müngucheh tsü nguyeng, ihrünü Macedonia lang shemüsunung rungnümcho, tunüo hütsüla lirü te Yuse Atsa thsingyunung Tsingrangbanü dsirepü ihrünü müdhecho.

¹¹Troas lanü ihrünü kihkuh lanü müchungkhüti Samothrace lang rocho, ko nyümong khüu tsü Neapolis chihcho.

¹²Hütsü lanü ihrünü akhudiba Macedonia la district yangdiba, ko Romrü lichah, Filipi lang rocho. Hütsüla ihrünü nyümong adrong licho.

¹³Sabath nyümong yongkhijüp Jihudarü dangkhidangnang la zehnung lümnü, ihrünü pehjüpü yangdi khu wücho. Ihrünü pümpü hütsüla shibülung lirü khingkurü te chotacho.

¹⁴Ihrü yu nyirü yola Theatira lanü nyahrüm shü irü Ledia zehcho. Abükyü tsü Tsingrangba mübülarü khüdu thsacho ko Paulnü thsingyucho nyinung nengdang Abüdongbanü alasih khangthrujücho.

¹⁵Abükyü ko arüh kukhi apüm baptiko khanglang, abükyünü ihrü dsi yocho, “Nührünü Ihnü Abüdongba chah yuje yudsirepü dhengchehkhang, ro I kuhla müdong.” ko abükyünü ihrü te kihchicho.

¹⁶Nyümong khüdu ihrü dangkhidangnangji lang woyade, kulilarü amünyi nbü kehcho khu choyohrü khüdu shirücho. Abükyünü choyohcho khu abüdongrü khyang thsi khütang shehjücho.

¹⁷Abükyünü Paul ihrü khanglang iiro züde yocho, “Hiri nyitsarüti Amichahba Tsingrang dikehrü lile! Arühnü nührü te akangcheh lang thsingyure!”

¹⁸Hütsüta abükyünü nyümong adrong nguchichonü Paul müthohpehcho ko abinü ximüla anbü te tsü yocho, “Abükyü chahnü chüronung Ihnü Jisu Khrista nengla yuzeng jüre!” Hütsüde tsünü anbü tsü abükyü chahnü chürocho.

¹⁹Khode abükyü abüdongrünü arüh thsi ngunung lang changkakopü müdhecho, arühnü Paul e Silas nyüh rang yangbe yang arüh tphah nowücho.

²⁰Arühnü Roman yangthsarü yanglang noro yocho, “Hiri Jihudarünü Ihsa yangdi la alongmüzi jüre.

²¹Arühnü Ihsa yuzeng nyüm yangthsa dore; Ihsa Roman shutsakhung ko Ihsanü hiri yangthsa mükhyüchocheh mahkhang mübichicheh.”

²²Ko sühdi tsü Paul e Silas nyüh beti la tsü zehcho. Hütsüde adirüti tsünü Paul e Silas nyüh shü rehnahjücho ko anyüh chah xüpnung yuzeng jücho.

²³Nyi xüpnahpü arangyoh la arüh yohpücho, ko anyahrü aziba te arüh longi khangtipünung yuzeng jücho.

²⁴Hütsüta yuzeng tsü khyüchonü, anyahrü aziba tsünü arüh jingkheh kajüpü ayongkhiba la tsü yohpücho.

²⁵Yürüptülung la Paul e Silas nyühnü Tsingrangba te dangkhidangnang ko khi thsa pümcho, ko aparü arangyohrütinü hütsü nyi pümcho.

²⁶Dhrongyengnü alihyo amülah zingcho, ko arangyoh kuh apüm shühchicho. Khüdupinü kukhang apüm khangthrucho, ko arangyohrü atümung chahnü ixilih longpehcho.

²⁷Hütsüde anyahrü aziba tsü jesucho, ko kukhang apüm khangthru li ngunü, ko arangyohrüti tsikhangkopü lüm, anohsheng tohcheh apu jangjang akyüsehrü yacho.

²⁸Ta Paulnü tasenü züde yocho, “Nüpu jangjang tüthsakeh! Ihrü atümung hila lile!”

²⁹Anyahrü aziba tsünü dsi chingpü tsohyoh züdu Paul e Silas nyüh jingte dhridhri mükhukehcho.

³⁰Hütsüpü abinü arüh nücheh tsingdhengcho, “Adirüti, khümchonung nengdang Ihnü tu nguchinung?”

³¹Arühnü lalingcho, “Abüdongba Jisu chah yudsing, nüh ko nü kukhi khümchonung.”

³²Hütsüpü abi ko kuhla lirüti atümung te Abüdongba yu thsingyucho.

³³Hütsü romang tsünü anyahrü aziba tsünü nowü arüh iha thsüthohjücho; ko hütsüde tsünü abi ko kukhishünü bapticho.

³⁴Hütsüpü abinü Paul e Silas nyüh abi kuh lang no küdu tsuyongnung jücho. Abi ko kukhirü atümung akünyangnü jengcho, tunüo adelü arühnü Tsingrangba chah yudsicho.

³⁵Nyangnyü khüu Roman yangthsarütinü Police azirüti yuzeng hiroh-i hipü müthehcho, “Hütsüri nyitsarüti tsü tsisohng.”

³⁶Hütsünü anyahrü tsünü Paul te yocho, “Yangthsarü chahnü Silas nühjü müthehnung yuva ro lile. Hütsüeko nühjü atbachi la tsieng.”

³⁷Ta Paulnü police azirüti te yocho, “Ihrü Roman shutsakhung lile! Ihrü thsamehcho tu mülang müngu nye arühnü müyurü bete ihrü chah xüpcho; hütsüpü arangyoh la ihrü yohpücho. Ko ade arühnü ihrü rang tsisohnyüre. Khodesü mah! Roman adirüti arühbürü hila ro ihrü nüchehsohng.”

³⁸Police azirütinü yu hütsü Roman yangthsathsarü te müdhesohcho; ko Paul e Silas nyüh Roman shutsakhung pü yuchi arüh alaa drücho.

³⁹Achotsü arühnü wü arüh te mülang chingcho; hütsüpü arühnü arangyoh lanü arüh nüchehcho ko arüh te yangdi lanü tsinung kihchicho.

⁴⁰Paul e Silas nyühnü arangyoh kuh pehjüpü Ledia kuh lang wücho. Hütsüla arühnü yudsirüti te shirüta arüh te rezehnung yu yopü tsicho.