Read Sangtam Naga RIWÜRÜ NGUCHI 17 Bible Online

RIWÜRÜ NGUCHI 17 - Sangtam Naga bible

RIWÜRÜ NGUCHI 17

¹Paul e Silas nyühnü Amfipolis ko Appolonia khu wüpü Sinagog liba Tesalonika la rocho.

²Paulnü, abi nanathsacho roh-i Sinagog lang wücho. Hütsüla nyükhih asang abinü arüh te amüsa yu lanü khyücheh,

³Mesia tsü chongchanung ko asücho lanü kangli ronung athsütah lichoepü changnah yocho. Abinü yocho, “Hiba Jisu sü nengdang Ihnü nührü te yoro abi tsü Mesia lile.”

⁴Arüh khürü yudsinü Paul ko Silas nyüh yola zehcho; hütsüta amüdhelarü adrong ko Greekrü mülung amülahnü Tsingrangba chah yudsicho.

⁵Ta Jihudarünü hütsü nahmohnü ayungsührü yanglong lanü nübülung mülungo kangsohcho. Arühnü yangdi apüm tsü yubejarongsoh, Paul e Silas nyüh rangnü amülung bete nüchehnung nengdang nyitsarü khüdu anengnü Jason kuh becho.

⁶Ta khode arühnü anyüh müngucho, arühnü Jason ko yudsirü khürü yangbe jingte tphahro züdecho, “Nyitsarü hiri sürünü alimih khamülajüro arüh tsü hilasü ro lile,

⁷ko Jason-nü abi kuhla nüyoh kangre. Arühnü yangthsaba yuzeng nyümnü yangthsarü apa khüdu Jisu lilepü yore.”

⁸Yu hiri khu arühnü sühdi ko yangbe tsü yubejarongsohcho.

⁹Yangbenü Jason ko aparü chahnü thsi tsupü arüh müthehcho.

¹⁰Ma rode yudsirütinü Paul e Silas nyüh Berea lang müthehcho. Khode arühnü hütsü chihcho, arühnü Sinagog lang wücho.

¹¹Hütsüla liba nyitsarüti tsü Tesalonikarü tenü asasaba thsacho. Arühnü yu tsü dee longphi nyicho, ko Paulnü yoba tsü yuje a mahnang müdhenung nengdang nyümong müthe arühnü amüsa yu tsü khicho.

¹²Arüh adrongnü yudsicho; Greekrü amüdhelarü ko amüdherü adrongnü yudsicho.

¹³Ta Khode Berea la mii Paulnü Tsingrangba yu tsü thsingyuko pü Tesalonika la Jihudarünü müdhecho, arühnü hütsüla mii ro amülung ruhmüsucho.

¹⁴Hütsüdenü yudsirütinü Paul kihbekhüm lang tsisohcho; ta Silas e Timoti nyühlü Berea la nyehlicho.

¹⁵Paul müyang würütinü Athen chii abi yola wücho ko Silas e Timoti nyüh te akohchonü zah rung cho yusi hipü Berea lang thalicho.

¹⁶Paulnü Athens la Silas e Timoti nyüh ying lide, yangdi tsü kyothrinü jeng licho ngu abi dee mükünyangcho.

¹⁷Hütsünü Sinagog la, Jihudarü te ko yudsirü yangpirüti te abinü yu lengta licho ko yanglong la mii alahkhurü apüm te yulengta licho.

¹⁸Epikurean ko Stoik adorü khürünüsü abi te yulengta licho. Khürünü tsingdhengcho, “Tuyah mümüdhebong hinü tu yonyüro?” Aparünü lalingcho, “Abinü yangpirü tsingrangti nengdang chorü kyole.” Tunüo Paulnü Jisu ko kangli roba nengdang chocho.

¹⁹Achotsü arühnü yangbe Areopagus yang Paul noropü yocho, “Nühnü thsingyuba adoba asi hi tunang ihrünü müdhenyüre.

²⁰Nühnü yocho yu khürü ihrü nengdang asi yuchire, ko hütsüri tukhunang ihrünü müdhenyüre.”

²¹(Tunüo Athen la lirü shutsakhung ko yangpirü atümungnü lango asi nengdanglü mükhyang mii chonyücho ko nyinyücho).

²²Paulnü yangdi ashimükhong bete yapü yocho, “Athenrü, nührü lang atümung la yangthsa la dee thulepü Ihnü dhengchehre.

²³Tunüo nührü yangdi la nührü mübübati chah dheng rachide, Ihnü bholu khüdu chah hita thrah ngucho, ‘Mümüdheba Tsingrang khüdu khyang.’ Nührünü mümüdhepü mübüba nengdang tsü Ihnü nührü te sobhore.

²⁴Tsingrangba sünü limih ko hütsüla liba lüpcho külüpcho, abi tsü ning ko alimih Abüdongba ko abi nyitsarü khehnü thsacho amübükuh la mülire.

²⁵Mahkhang abi nengdang nguchi chixinung tu müdhsüdah, tunüo abinü atümung khyang akang, asah ko lüpcho jüre.

²⁶Nyüh khüdu chahnü abinü amüi tsurü yucho apüm thricho ko limih jeng lisohcho. Apunü amüngunü arüh linung becho ko müdüm kihcheh licho.

²⁷Arühnü abi yangchinungthsa, ko arühnü lümcho roh-i abi ngunung nengdang abinü hi nguchicho. Ta yujenülü Tsingrangba tsü Ihsa süte nüsü ashu za müle;

²⁸Khürünü yocho kyo, “Abi chah Ihsa lire, mühachire ko akang lire! Hi khi tangrü khürünü yocho kyo, ‘Ihsasü abi tsurüti lile.’

²⁹Ihsa Tsingrangba tsurütieko, Ihsanü Tsingrangba tsü hon, taripi mahkhang lung, kyothri kyo, nyitsarü thoh lümlongnü thricho khüdu roh-i mülümbae.

³⁰Nyitsarünü abi mümüdhe shikhe tsü Tsingrangbanü yah pehjüko, ta adelü apümlang nyitsarü atümungnü amünyi lanü ximülanung abinü yuzeng jüre.

³¹Tunüo abinü throchehcho nyüh khüdu khunü yuje la lihküp yukhanung abinü nyümong khüdu throchehko. Ko abinü hütsüba nyitsarü tsü asücho lanü kanglisohnü nyitsarü atümung te yuzi jüko!”

³²Khode asücho lanü kanglicho nengdang Paulnü cho arühnü yuchicho, khürünü abi münyodhengcho, ta khürünü yocho, “Ihrünü adesü hi nengdang nü chahnü khü nyinyüre.”

³³Hütsüpü Paulnü arüh yolanü tsicho.

³⁴Nyitsarü khürünü abi te zehnü yudsicho, arüh yola ashimükhong khiyoh khüdu Dionesius khingkurü mii anengnü Damaris, ko aparü khürü zehcho.