Read Sangtam Naga RIWÜRÜ NGUCHI 18 Bible Online

RIWÜRÜ NGUCHI 18 - Sangtam Naga bible

RIWÜRÜ NGUCHI 18

¹Hütsüpü, Paulnü Athens pehjüpü Korint lang wücho.

²Hütsüla Pontius la surocho Jihudarü khüdu anengnü Aquila shirücho. Yangthsarü Klaudiusnü Jihudarü atümung Rom limih pehjünung yuzeng jücho khu abi ko anitpü Priscila nyüh Italy lanü rocho münyahliecho. Paulnü arüh shirünung wücho,

³ko arüh yola nguchi licho, tunüo arüh roh-i abinü shükuh thsa abi akang licho.

⁴Abinü Sinagog la Sabath nyümong mükhu yulengtanü Jihudarü ko Greekrü anyüding kihchonung müküpcho.

⁵Khode Silas e Timoti nyüh Macedonia lanü ro chihcho, Paulnü Jihudarü te Jisu tsü Mesia epü yuzi jünung nengdang abi bekhyah apüm thsingyuba la pehcho.

⁶Khode arühnü abi nyüm amütsa chocho, abinü arüh te rita abi shü trichi yocho, “Nührü changkhanglü, hütsü mülang tsü nührübürünü hinung! I bha müthsanung. Ade tinü Ih yangpirü yanglang wünung.”

⁷Hütsüta abinü pehjüpü Tsingrangba mübürü yangpirü khüdu anengnü Titius Justus kuhla linung wücho; abi kuh tsü Sinagog te rümta licho.

⁸Ko Sinagog langnürü Krispus, abi ko arüh kukhirü atümungnü Abüdongba chah yudsicho; ko Korint la nyitsarü adrongnü yusi tsü yuchi yudsicho ko bapticho.

⁹Romang khüdu Paul müngucheh la Abüdongbanü abi te yocho, “Tüdrü, chodu choung ko tüpehjü,

¹⁰tunüo Ih nü te lile. Sünüsü nüh müdhsakehjünung, tunüo hiba yangdi la I nyitsarüti adrong lile.”

¹¹Paul hütsüla kang khüdu pü achangsho, nyitsarüti te Tsingrangba yu donü licho.

¹²Khode Akaia la Galio Roman Governor kangcho, Jihudarünü shibülung Paul rangnü yukhaji lang nowücho.

¹³Arühnü yocho, “Nyitsarü hinü yuzeng nyüm Tsingrangba mübünung nyitsarüti kihchonung müküpre!”

¹⁴Paul abe khangthrunung thsade, Galionü Jihudarü te yocho, “Jihudarüti! Hiba khiyu hi lango thsamehcho mahkhang füh-müle mütsacho khüdue relang nührü yu nyinung athsalang.

¹⁵Ta hi yu, aneng ko nührübürü yuzeng nengdang yubejarongeko, nührü jangjangthsa khaang. Ih hitari yukharü mah!”

¹⁶Ko abinü yukhaji lanü arüh iipehcho.

¹⁷Arüh atümungnü Sinagog kuh langnüba Sosthenes rangnü yukhaji kuh bete abi chah lahcho. Ta hütsü Galionü tu hoh müthsa.

¹⁸Paulnü Korint la yudsirüti yola anyahli mungcho, ko arüh pehjüpü Priscila ko Aquila nyüh zeh Syria lang kihtang chahnü tsicho. Ko Cenkrea lanü shemüsude, yuchüm khüdu khu athah hehpehcho.

¹⁹Arüh Efesia chihcho, ko hütsüla Priscila e Aquila nyüh pehjüpü abinü Sinagog lang wünü Jihudarü te yulengta licho.

²⁰Nyitsarütinü abi te khü mungkehnung kihchicho, ta abinü münyengchocho.

²¹Abinü atsilang arüh te yocho, “Tsingrangbanü lümkhang, Ih nührü yang lironung.” Hütsüpü abinü Efesia lanü kihtang chah tsicho.

²²Khode Kaesarea chihcho, abinü Jerusalem lang wünü lithrorü te shirütapü, Antiok lang wücho.

²³Hütsüla azachah lipü abinü Galatia ko Fergia bongnü yudsirüti rezehsoh wücho.

²⁴Hütsü shikhe la Alexandria la surocho Jihudarü khüdu anengnü Apollos Efesia lang rocho. Abi yuthrungrü khüdu ko amüsa yu aranü müdherü khüdu thsacho.

²⁵Abi Abüdongba Lang la thülachehcho, ko longphi amülah la abinü Jisu nengdang atsitsa yuzi ajeng sobhocho. Ta abinü Johan-nü baptijücho du müdhecho.

²⁶Abinü Sinagog la rezeh chonung dikehcho. Khode Priscila ko Aquila nyühnü abi yu chocho yuchicho, arühnü abi arüh yola kuh lang nowünü Abüdongba lang nengdang alaa tsitsa changnah yocho.

²⁷Hütsüta Apollosnü Akaia lang wünung dhrongchehcho, achotsü Efesia la yudsirütinü Akaia la yudsirü yang abi künyang khyüchoungpü thsüchi thrahcho. Khode abi wü chihcho, Tsingrangba achomang khu yudsipü lirüti shulüm atrorü atsa thsacho.

²⁸Tunüo amüsa yunü Jisu tsü Mesia epü yuzi jonü, yang betenü yulengta la abinü Jihudarü kohcho.