Read Sangtam Naga RIWÜRÜ NGUCHI 19 Bible Online

RIWÜRÜ NGUCHI 19 - Sangtam Naga bible

RIWÜRÜ NGUCHI 19

¹Apollos Korint la liyade Paulnü athahlang limih apüm bongnü ro Efesia chihcho. Hütsüla mono khürü shiro arüh te tsingdhengcho,

²“Nührünü yudside, Anbü Amüsa mükhyücho-o?” Arühnü lalingcho, “Anbü Amüsa lilepü ihrünü ayuchi mii müyuchi.”

³Paulnü tsingdhengcho, “Khang, nührünü khütari baptiba khyüchocho? Arühnü lalingcho, Johan-nü Baptijüba.”

⁴Paulnü yocho, “Johan-nü baptijüba tsü amünyi lanü lasih thsamülarü nengdang; ko abinü Israelrü te abi khanglang roba Jisu chah yudsinung yocho.”

⁵Khode arühnü hi yuchicho, Arühnü Abüdongba Jisu nengla bapticho.

⁶Paulnü arüh chah akhehnü nyümkehcho ko Anbü Amüsa arüh michah rocho; arühnü yu papa la chocho ko choyohcho.

⁷Arüh atümungnü dhüre-anyüh-o thsacho.

⁸Paulnü Sinagog lang wücho ko Tsingrangba yanglih nengdang yulengta ko kihchonü choo asang arüh te rezeh chocho.

⁹Ta khürünülü hongzinü müyudsicho, ko amülung betenü Abüdongba lang shulüm yu amütsa chocho. Achotsü Paulnü arüh pehjüpü abi yola yudsirüti nüpü nyümong müthe Tyranus skul kuh la yulengta licho.

¹⁰Hütsü roh-i kang anyüh richeh licho, hütsünü Asia la lirü Jihudarü ko Greekrü atümungnü Abüdongba yu yuchicho.

¹¹Tsingrangbanü thsayahiya pathsa Paul khu nguchicho.

¹²Abi khehseh ko anyahnising mii füthsarü yanglang hiwücho ko arüh adhsa-ara iipehcho, ko arüh chahnü amünyi nbü tsipehcho.

¹³Jihudarü khürü sürünü amünyi nbü iipehjo rachicho, arünüsü hütsü roh-i nguchinung Abüdongba Jisu neng bichinyücho. Arühnü amünyi nbüti te yocho, “Ihnü, Paulnü thsingyuba Jisu nengla yuzeng jüre.”

¹⁴Jihudarü Amungthriba Bebürü anengnü Skeva tsurüti arüh jünirü dhünyehnü hütsü roh-i nguchicho.

¹⁵Ta amünyi nbünü arüh te yocho, “Ihnü Jisu müdhele, ko Paul sü müdhele ta nührü sürüo?”

¹⁶Amünyi nbü kehba nyitsarüba tsünü arüh chah tsohkeh arüh atümung kohcho. Hütsüde arühnü hütsüba kuh lanü lerohpehnü arüh shü rehnah tbhüdeng tsicho.

¹⁷Efesia la lirü Jihudarü ko Greekrü atümungnü hi yuchicho; ko arüh atümung adrünü jengcho, ko Abüdongba Jisu neng alaa hechicho.

¹⁸Yudsirü adrongnü misha arühnü nguchicho khohcheh yo rocho.

¹⁹Ko azi-amongrü adrongnü arüh vakhati hironü amülung bete tahpehcho. Arühnü vakha angang tsü khyübülung dhengde, taripi thsi hajar dhünyang chürocho.

²⁰Hiroh-i rezehnü, Abüdongba yu tsü shucho ko zikehcho.

²¹Hütsü roh-i tikehko khanglang, Paulnü Macedonia ko Akaia khu Jerusalem lang wünung dhrongchehcho. Abinü yocho, “Ih hütsüla wüko khanglang, Ihnü Rom langsü wübae.”

²²Hütsünü abi Asia la khü liyade, abi trorü Timoti e Erastus anyüh Macedonia lang müthehcho.

²³Hütsü shikhe la Asia la Abüdongba Jisu khyanglangnü Efesia la mükakehta amülah chürocho.

²⁴Tunüo taripi kengrü nyüh khüdu anengnü Demetriusnü, Artemis tsingrang amübükuh taripinü kyothri külüpcho khu anguchirü khyang ajingcho dee hirojücho.

²⁵Hütsünü abinü hütsütari nguchirü atümung müjang dsibülung arüh te yocho, “Dheng! Hiba nguchi lanü Ihsa kuthsi ngurepü nührünü müdhele.

²⁶Ta ade hiba nyitsarü Paulnü tu nguchirünang nührübürünü ngule ko yuchile. Abinü Efesia la ko Asia apümlang, khehnü külüpcho tsingrangti tsü tsingrang mah pü yonü nyitsarü khütango kihchoko.

²⁷Hütsünü, Ihsa nguchi hi nengchü ngunung dhsürü lile. Hütsü du mah, ta Asia la ko lihküp la mübüba Artemis tsingrang kuh tsü tumah kangnung ko ahechi tsü changpehnung dhsürü lile!”

²⁸Sühdi tsünü yu hiri yuchide, zichüro khongnung dikehcho, “Efesiarü Artemis arangcheh thsaang!”

²⁹Hütsüde yubejarong tsünü Paul yola shitsehrü Macedoaniarü nyüh anyüh Gaius ko Aristarkas rangnü arüh yola shajaji lang nowücho.

³⁰Paul apu mii sühdi yola tsü wünyücho, ta yudsirütinü müwüsohcho.

³¹Abi shangrü adirü khürünüsü shajaji lang tsü müwünung yuva müthehcho.

³²Hütsüde ashibülungrü apüm tsü yubejarong licho: nyitsarü khürünü lango, aparü khürünü apa nengdang züdecho, tunüo arüh adrongnü tu nengdang arüh hütsüla rochonang mii mütsüpcho.

³³Jihudarünü Alexander tsü yuthungchah küdusohchonü hütsü abi bhaepü khürünü yocho. Hütsüde Alexandernü amülung te yuva müchüronung akheh dhimüsu yocho. Ko abinü apu alanglang yu yonung müküpcho.

³⁴Ta khode abi Jihudarüepü arühnü dhengchehcho, arüh atümungnü müjangnü rehtseh anyüh hita züdecho, “Efesiarü Artemis arangcheh thsaang!”

³⁵Achangka la yangdi athrahbanü sühdi tsü tbachi kangsohcho. Abinü yocho, “Efesiarü, Efesia yangdi tsü Artemis tsingrang amübükuh ko ninglangnü longba amüsa lung yohpüjiepü atümungnü müdhele.

³⁶Hi sünüsü mümüricheh. Hütsüeko nührünü yuva tüchüro ko tu amütsa tünguchi.

³⁷Hiri nyitsarünü Ihsa amübükuh mümünyijü mahkhang Ihsa tsingrang nyüm tu müchopü nührünü hila noro lile.

³⁸Hütsünü Demetrius ko abi te nguchirütinü nyitsarü khürü nyüm yu likhang, yukharüti ko nyümong mükhu yukhaji lile; hütsüla chotaang.

³⁹Ta nührünü alaa lango khyünyükhang, hütsülü yang pümji la khanung.

⁴⁰Tunüo chünye yubejarong hi akhanglang ihrü mülangjünung dhsürü lile. Hiba yubejarong nengdang mülang pehba müle, ko hütsü nengdang ihrünü yuzi atsa müjüchehnung.”

⁴¹Hütsüta yopü abinü ashibülung tsü shishosohcho.