Read Sangtam Naga RIWÜRÜ NGUCHI 2 Bible Online

RIWÜRÜ NGUCHI 2 - Sangtam Naga bible

RIWÜRÜ NGUCHI 2

¹Khode dhünyang nyümong thsüti chihcho, yudsirü atümung müdüm khüdu la müjang shibülungcho.

²Dhrongyengnü nyübong amülah ninglangnü fücho yuva khüdu rocho, ko arüh pümba kuh apüm jengcho.

³Hütsüde arühnü mihmüle kyo chüro ngucho ko arüh müipi chah pümcho.

⁴Ko arüh atümung Anbü Amüsanü jengcho ko Anbünü chürosohcho roh-i yu papa chomüsucho.

⁵Liküp yucho apüm lanü rochoba yangthsa müirü Jihudarü Jerusalem la müdong licho.

⁶Arühnü hiba yuva yuchide, sühdi arangcheh shibülungcho. Arüh atümung nyemüyangcho, tunüo yudsirütinü choba tsü arüh müipinü palu yu la nyichehcho.

⁷Nyeka ko nyemüyangseh arühnü yocho, “Yu chorü hiri atümung Galilrü mahrü do!

⁸Khang, khütapü arühnü chocho Ihsa müipinü palu suro yu la nyichehro?

⁹Ihsa Parthia, Media, Elam, Mesopotamia, Judea, Kappadocia, Pontius ko Asia,

¹⁰Fregia, Pamfelia, Ijip ko Cyrene münyeh Libya lih mükang lanü lile. Ihsa khürü Rome lanü,

¹¹Jihudarü ko yangpirü Jihuda yangthsa lang ximülarü, ko Ihsa khürü Krete ko Arabia lanü, ta Tsingrangbanü nguchicho anyemüyangnung nengdang arühnü chocho Ihsa apümnü palu yu la nyichehre!”

¹²Nyeka ko nyemüyangseh arüh khüdunü khüdu te mütozah tsingdhengtarü, “Hi tu adüzüo?”

¹³Ta aparü khürünü yudsirü tsü münyüjo yocho, “Hiri müchako!”

¹⁴Hütsüde Peternü aparü riwürü dhüre-kheh yola yamüsu yuva amülahnü sühdi te tsü chomüsucho: “Judearü ko Jerusalem la lirüti, hi tu adüzünang Ihnü nührü te yonung nyieng.

¹⁵Nührünü lümba roh-i hiri hi mümücha; hi anyangnyü düku bekhyah due.

¹⁶Ta hi azikehrü Joelnü choyohbasüe:

¹⁷“Tsingrangbanü yore, achangka nyümong la Ihnü hita nguchinung; Nyitsarü müipi chah Ihnü I Nbü mükhakehjünung. Nührü tsurü ko tsularütinü choyohnung; Nührü dhrezarütinü müngucheh ngunung, ko nührü ashirütinü melang melangnung.

¹⁸Ho, hütsüri nyümong la I dikehrüti khingkurü ko adhrerü michah, Ihnü I Nbü mükhakehjünung ko arühnü choyohnung.

¹⁹Ihnü amilang ning chah thsayahiya ko apohki alih la anyemüyangnung nguchinung. Hütsüla ashüh, michang ko mikhu acheh linung.

²⁰Abüdongba roba amülah ko ahechi nyümong müchide, nyüh tsü mapehnung ko chonu tsü ashüh kyo amoh kangnung.

²¹Hütsüde, sünü Abüdongba nengla dsinang abi khümchonung.

²²“Israelrü, yu hiri nyieng! Nazaret-rü Jisu tsü nyitsarü khüdu thsacho ko abi amüsa tase tsü nührü te thsayahiya ko anyemüyangnung apüm abi khu Tsingrangbanü nguchicho tsünü tsitsa yuzi jüre. Nührübürünü hi müdhele, tunüo hi nührü yola tikehko.

²³Tsingrangba apunü lümcho roh-i nührü khyang Jisu khakhuchüjünung abinü throchehko hamkehsoh nührünü abi mapsehko.

²⁴Ta Tsingrangbanü abi asüba zii lanü lehcheh kanglisohcho, tunüo asünü abi ranglinung tsü amükohnung thsacho.

²⁵Tunüo Davidnü abi nengdang yocho: “Abüdongba tsü Ihnü lede I bete ngucho; Abi I shündhün lile, ko Ih müchongchanung.

²⁶Hütsünü Ih künyang licho, ko I yu akünyangnü jeng licho. Ko Ih, asüba thsanye, alongdi la kyahshangnung,

²⁷tunüo asü lih la nühnü Ih müthrüchahchüpehnung; Nü longlangchehba nü dikehrü nühnü kong la müsütpahsohnung.

²⁸Akang langti nühnü I te ngusohko, Ko nü zehchonü Ih akünyangnü jengnung.

²⁹“Jünirüti, anengkhong tpurü David nengdang Ihnü nührü te khohcheh yonung. Abi sücho ko dhrürangcho, ko abi kong chünye yingcheh Ihsa te lile.

³⁰Abi azikehrü khüdu licho, ko abi te Tsingrangbanü nyengchocho abinü müdhe licho: Tsingrangbanü David chahnü David apu kyo yangthsarü khüdu chürosohnungepü yuchümcho.

³¹Tsingrangbanü tu nguchinung licho, hütsü Davidnü müdhenü Mesia kanglironung nengdang abinü yocho: “Abi asü lih la thrüchahchü müpehjü abi fü kong la müsütbah.

³²Hiba Jisu Tsingrangbanü kangchehli rosohko, ko hi nengdang ihrü atümung yuzi lile.

³³Abi Au Tsingrang tsalang thring kangli rosohko, ko abinü nyengchocho kyo abi chahnü Anbü Amüsa khyüchoko. Ade nührünü tu nguro ko yuchiro hütsü abinü ihrü chah mükhakehjüba abi jiyü tsü lile.

³⁴Tunüo ninglang tuwüba tsü David mah; ta apunü yocho: ‘Abüdongbanü I Büdongba te yocho: Ihnü nührü rorüti nührü jingdhrüm mükangsohde,

³⁵I tsalang hila püm’.

³⁶“Hütsüeko Jisu, sü nührünü khala chah hamkehcho, Tsingrangbanü abi Abüdongba ko Mesia kangsohchoepü Israelrü atümungnü müdheing!”

³⁷Khode arühnü hi yuchicho, arüh lasih lehcho, ko Peter ko aparü riwürüti te yocho, “Jünirüti, ihrünü tu nguchinung?”

³⁸Peternü arüh te yocho, “Nührü münyi pehnung nengdang nührü lasih thsamülang, ko nührü nyitsarü müipi Jisu Khrista nengla bapting, ko nührünü Tsingrangba jiyü Anbü Amüsa tsü khyüchonung.

³⁹Tunüo Tsingrangba anyengchoba tsü nührü ko nührü tsuzarüti ko ashula lirü atümung ko Ihsa Tsingrangnü apu yanglang dsirü atümung nengdang lile.”

⁴⁰Peternü yu apa adrongnü arüh te thsüchi yocho, “Hiba akureng shang lanü nührü jangjangthsa khümchoung!”

⁴¹Arüh yola adrongnü abi yu yudsicho ko bapticho, ko hütsü nyümong nyitsarü hajar asango arüh yola khikehcho.

⁴²Arühnü riwürüti chahnü nyichonü akehta la tsü zeh ko akehta tsuyong la changtanü dangkhidangnang la arüh bekhyah pehcho.

⁴³Thsayahiya ko anyemüyangnung adrong riwürüti khu nguchicho, ko atümung adrünü jengcho.

⁴⁴Yudsirü atümung mütozah müi-müthsümta licho ko khüdunü khüdu te arüh licho changtacho.

⁴⁵Arühnü arüh kuthsi ko arüh licho icho, ko thsütahcho aichi arüh atümung yola thsi tsü changtacho.

⁴⁶Nyümong mükhu amübükuh la arühnü amülungthsa shibülungcho, ko lasih alonglümnü künyangtacho.

⁴⁷Tsingrangba nengse ko atümungnü tsacho nengdang künyangta arüh kuhla müjang tsuyongtacho. Ko nyümong mükhu Abüdongbanü akhümchorüti tsü arüh yola khikehjücho.