Read Sangtam Naga RIWÜRÜ NGUCHI 20 Bible Online

RIWÜRÜ NGUCHI 20 - Sangtam Naga bible

RIWÜRÜ NGUCHI 20

¹Yubejarong tsü zahpü khanglang, Paulnü yudsirüti müjang dsibülungpü athsüchi yu yonü arüh te aza yu yocho. Hütsüpü abinü Macedonia lang wücho.

²Abinü hütsüri lih bongnü nyitsarüti te athsüchi yu yocho. Hütsüpü abi Akaia lang rocho,

³ko hütsüla abi choo asang licho. Abi Syria lang wünung rungnüm yade, Jihudarünü abi nyüm arah külüpcho abinü rangchehcho; achotsü abinü Macedonia khu thalinung dhrongchehcho.

⁴Berea lanü Pyrhus tsurü Sopater, Tesalonika lanü Aristarkas ko Sekundus; Derbe lanü Gaius; Asia lanü Tekikus, Trofimus ko Timoti abi yola wücho.

⁵Arühnü tsehleh wünü Troas la ihrü yingyacho.

⁶Ihrünü Bhüpza müyohba Hümthse Thsüti khanglang Filipi lanü kihtang chahnü wücho, ko nyümong münga khanglang Troas la arüh shirücho ko hütsüla nyükhih-o mungcho.

⁷Honibar anyüzehlang ihrü akehta yangtsu nengdang shibülungcho. Paulnü arüh te yürüptülung yingcheh chodu chocho, tunüo abi nyümong khüu tsü tsinung licho.

⁸Ihrü shibülungba amungthriba chongsah la tsü dsi adrong tru yacho.

⁹Dhrezarü khüdu anengnü Eutykus tsü nyübong trahtri te pümpü Paul yu nyi pümcho. Abi khura nyichinü yüpsehcho ko achangka la kuhchung asanguba lanü alih la thungchocho. Arühnü abi khamüsude abi süpü licho.

¹⁰Ta Paulnü jowü mükhurang wüp-pü yocho, “Tülümxü, abi akang lile!”

¹¹Hütsüpü abinü thali küducho, ko hümthse chenah tsucho. Paulnü nyü chüro yingcheh arüh te anyahli chota pümko khanglang abi tsicho.

¹²Ko arüh dee müsi kyangnü azaba tsü kuh lang akang nowücho.

¹³Ihrünü kihkuh lang tsü tsehleh wünü Paul nükehnung Assos lang rocho. Abinü ihrü te hütsü roh-i nguchinung yocho, tunüo abi hütsülang ajingnü wüchi yacho.

¹⁴Assos la Ihrünü abi shiro abi nükehpü Mitiline lang wücho.

¹⁵Ihrü hütsü lanü kihtang chahnü shemüsu wünü nyümong khüu tsü Kios dükeh chihcho. Nyümong khüdu lipü Samos lang rocho ko nyümong khüu tsü Miletus chihcho.

¹⁶Asia la shikhe müpehnung nengdang, Paulnü Efesia müri tsinung lümchehcho. Tunüo kohkhang dhünyang nyümong tsü iiphü Jerusalem chihnung abinü dhsüthsacho.

¹⁷Paulnü Miletus lanü Efesia lang Lithro azibarüti te ro abi shirüngpü adsinung müthehcho.

¹⁸Khode arüh ro chihcho, abinü arüh te yocho, “Ih Asia lih la akhudi mütrahyohba nyümong lanü, Ih nührü yola lide, bekhyah khüroh-i pehcho nührünü müdhele.

¹⁹Jihudarü rah khu I chah athsangthsi mütohde Ihnü Abüdongba dikehrü roh-i adeng kang nahshükih sho dikehcho.

²⁰Ihnü yangbe te ko nührü kukhiti la thsingyude, tuturü nührü nengdang ajingcho licho, hütsüri Ihnü tusü rang müyohpücho nührünü müdhele.

²¹Jihudarü ko yangpirü atümung te Tsingrangba yang lasih thsamülanung ko Ihsa Abüdongba Jisu chah yudsinung Ihnü yuzi jücho.

²²Ko ade, Anbü Amüsa yochonyi, hütsüla I chah tu tikehnungnang mümüdhepü Ih Jerusalem lang würe.

²³Yangdi mükhu, arangyoh ko athsangthsinü Ih yingyalepü Anbü Amüsanü yocho du Ihnü müdhele.

²⁴Ta Ihnü Ipu akanglü I nengdang tu amii li mükhichire; ta Ihnü khyünyüba tsü, Abüdongba Jisunü I khyang Tsingrangba achomang nengdang Yuse Atsa sobhonung jüba nguchi du tsü thüm nguchinyüre.

²⁵“Ihnü nührü atümung yola Tsingrangba yanglih thsingyu rachiko. Ko adelü nührü sünüsü I romih anyüpiu müngunungepü Ihnü müdhele.

²⁶Hütsünü Ihnü nührü te chünye nyümong yuzi thsare: Nührü yola khürü chahkhang, I bhamüling müthsanung.

²⁷Tunüo Tsingrangba alümcho apüm Ihnü nührü te müthsingyupü müle.

²⁸Hütsüeko nührübürü ko Anbü Amüsanü nührü khyang nyümkehjüba yudsirüti atümung nengdang dhengyehng. Tsingrangba Lithro khüi apu Tsurü sücho khu abi yo kangsohcho, nührü hütsü nyahrü kang.

²⁹Ih tsipü khanglang, santi müditpangpü changjünung rangfü amütsati ronungepü Ihnü müdhele.

³⁰Arahkheh cho yudsirüti nührü yolanü nümülanung nührübürü yolanü chüronung shikhe ronung.

³¹Hütsüeko khengyeng, ko kang asang nührü nyitsarü müipi te ama atsingse nahshükih sho dochoe ko lümchehng.

³²“Ko ade Tsingrangba ko abi achomang yu khüinü nührü dhikehjünung kohro, ko atümung nengdang abi amüwa la nührü nyümkeh yohpüjüre.

³³Ihnü süyo taripi, hon mahkhang jengki mümükhyah.

³⁴I müyangrü ko Ipu thsütah apüm nengdang Ipu kheh hirinü nguchicho nührünü müdhele.

³⁵Hütsüta müküp nguchinü Ihsanü suh müzehrü tronungbae ko Abüdongba Jisu apunü ‘Khyüchocho tenü Jücho alaa amüwanung pü yocho yu lümchehnung nengdang, lüpcho la Ih nü khyang ngusohko.’ ”

³⁶Paulnü chokapü, arüh mükhukeh arüh yola dangkhidangnangcho.

³⁷Arüh atümungnü tranü abi chah khyahri aza bemüthsüpcho.

³⁸Abinü arüh te adelü arühnü abi romih müngunungepü yocho tsünü arüh alaa müsi thsacho. Ko arühnü abi kihkuh chii müyangyohchücho.