Read Sangtam Naga RIWÜRÜ NGUCHI 21 Bible Online

RIWÜRÜ NGUCHI 21 - Sangtam Naga bible

RIWÜRÜ NGUCHI 21

¹Ihrünü arüh te cho-nahee pü zacho. ko müchongkhüti lahsah ihrünü Kos chihcho; nyümong khüu Rhodes chihcho, ko hütsülanü ihrünü Patara lang wücho.

²Hütsüla Foenicia lang wünungba kihkuh khüdu ngu ihrü hütsüla mütrahkeh tsicho.

³Ihrünü Cyprus mütro nguba müdüm chihcho, ko hütsü fülilang pehjüpü Syria lang wücho. Ko Tyre kihbekhüm la zahcho, tunüo hütsüla kihkuh tsü bha zangchonung licho.

⁴Hütsüla yudsirü khürü shiro arüh te nyükhih-o mungcho. Anbünü Paul te Jerusalem lang müwünung yocho.

⁵Ta khode nyümong tsü pisacho arüh pehjüpü ihrü lang la wücho. Arüh atümung khingkurü azarü zeh yangdi khu kihbekhüm chii ihrü müyang rocho; hütsüla ihrü atümungnü mükhukeh dangkhidangnangcho.

⁶Hütsüta arüh te cho-nahee pü yota, arüh thali tside ihrüsü kihkuh chah küducho.

⁷Ihrünü mütozah Tyre lanü Tolemais wücho, ko hütsüla yudsirüti te shirüta nyümong khüdu mungcho.

⁸Nyümong khüu tsü ihrünü shemüsu ro Kaesarea chihcho. Hütsüla thsingyuwürü Filip, sü Jerusalem la dikon dhünyeh yola khüdu licho, ihrü abi kuhla müdongcho.

⁹Abi atsurü khingkurüzarü müyü licho ko arühnü choyohcho.

¹⁰Ihrü hütsüla rüm-o mung yade, Judea lanü azikehrü khüdu anengnü Agabus rocho.

¹¹Abinü ihrü yanglang ro Paul rungrüm khyo apu jingkhehrü rahpü yocho, “Anbü Amüsanü hita yore: Hiba rungrüm abüdongba tsü Jerusalem la Jihudarünü hiroh-i rahnung, ko arühnü abi yangpirü khyang khakhuchüjünung.”

¹²Ihrünü hütsü yuchide, ihrü ko hütsüla lirütinü, Jerusalem lang müwünung Paul te kihchicho.

¹³Ta abinü lalingcho, “Tuepü nührünü hita tranü I lasih thsangnyangsohro? Ih Jerusalem la rahsohnung du mahpü, Abüdongba Jisu khyanglangnü asünung mii rungnüm lile.”

¹⁴Ihrünü abi mükihchochehpü yocho, “Abüdongba lümcho thsasohng!”

¹⁵Azachah hütsüla lipü, ihrünü bha zangpü Jerusalem lang shemüsucho.

¹⁶Kaesarea lanü monotisü khürü ihrü yola rocho ko ihrü müdongnungba nyitsarü Cyprus lanü Mason, sü müngulangnü yudsirü licho abi kuh yang ihrü nowücho.

¹⁷Khode ihrü Jerusalem chihcho, yudsirütinü ihrü künyangseh khyüchocho.

¹⁸Nyümong khüu Paul yola ihrünü Jakob shirünung wücho; ko hütsüla azibarüti atümung shibülung licho.

¹⁹Paulnü arüh te salümpü, abi nguchi khu Tsingrangbanü yangpirüti yola nguchicho lüpcho arüh te yocho.

²⁰Arühnü hütsü yuchinü Tsingrangba secho. Hütsüpü arühnü yocho, “Ajünirü Paul, Jihudarü hajar khüdoi yudsirü kangcho ko arühnü khüta yuzeng müiro hütsü nühnü ngule.

²¹Yangpirü lih la liba Jihudarü atümung te arüh tsurüti mümüjüp-pehnung mahkhang Jihudarü yangthsa mübichinung ko Mosa yuzeng pehjünung nühnü thsingyurepü arüh te yoko.

²²Nüh hila ro lilepü arühnü yuchiriri. Hütsü khütanung?

²³Ihrünü hiroh-i thsasohnyüre. Hila yuchüm khyücho nyüh müyü lile.

²⁴Arüh yola wüng ko arüh müsachehba la zehng ko arüh thah hehpehnung arüh khyang thsi jüng. Hitakhang arüh te nü nengdang tu yo liro, hütsü arahkheh te nühnüsü Mosa yuzeng tsü bichirepü arüh atümungnü müdhenung.

²⁵Ta yudsipü liba yangpirüti khyanglü, kyothri mübücho tusü mütsunung, ashüh mahkhang axihsehcho kanglungrü tusü mütsunung, ko arüh jangjang nahtrahnaxeng lanü za linung rungnümcho thrahpü mühehko.”

²⁶Achotsü Paulnü arüh nüpü nyümong khüu arüh yola wü müsachehcho. Hütsüpü abinü amübükuh lang wünü müsachehba nyümong müpisade arüh müipi nengdang kangmübü jünung hütsü müdhesohcho.

²⁷Ta nyümong dhünyeh tsü pisanung becho chihde, Asia lanü Jihudarü khürünü Paul amübükuh la ngucho. Arühnü sühdi shünü thsümüsu Paul rangcho.

²⁸Arühnü züdecho, “Israelrü, Troung! Atümunglang wünü, nyitsarü müipi te Israelrü, Mosa yuzeng ko hiba amübükuh nyüm thsingyu rachiba nyitsarü tsü hivie. Ko ade mii abinü yangpirü khürü noro amübükuh la hiba amüsa müdüm münyijüko!”

²⁹(Arühnü hütsüta yoba tsü, Efesiarü Trofimus Paul yola arühnü yangdi la ngucho, ko Paulnü abi yola amübükuh la no züdukopü arühnü lümcho.)

³⁰Yangdi shünü ruhmüsucho, ko nyitsarü atümungnü tsohkhuta wünü Paul rangnü amübükuh lanü tphahchehcho. Hütsüde tsünü amübü kukhang tsü khangticho.

³¹Amülung tsünü Paul mapsehnung yade, Roman rothsarü anüchirü yang Jerusalem apüm khatamünalepü yusi jücho.

³²Hütsüde amichahba anüchibanü anüchirü khürü ko rothsarüti khürü nüpü sühdi yanglang tsü jowüsohcho. Abi yola rothsarü ngude du arühnü Paul lahcho zahcho.

³³Anüchibanü Paul yang wü abi rangcho, ko ixilih anyünü abi rahnung yuzeng jücho. Hütsüpü abinü tsingdhengcho, “Nyitsarü hi süo? Abinü tu nguchicho?”

³⁴Sühdi la tsü khürünü lango, khürünü apa züdecho. Duduyayarachonü, anüchibanü yujeba tsü rangchehnung mükohcho; achotsü abinü abi roshengvi lang nowünung yuzeng jücho.

³⁵Arühnü phaqu chii rokonülü abi dhinungthsa kangcho tunüo sühdi tsü khura mütsacho.

³⁶Arüh atümung abi khanglang rihlong chüro iiwünü yocho, “Abi mapsehng!”

³⁷Rothsarüti tsünü roshengvi lang Paul no züdunung shikhe la, abinü anüchiba te yocho: “Ihnü lango yonung mükoh-o?” Anüchibanü yocho, “Nühnü Greek yu mümüdheo?”

³⁸“Khang atüzitü yanglih nyüm chürosohpü lipilih lang nyüh hajar müyü aführothsarü kangnung no tsiba Ijipbasü nüh mah-o?”

³⁹Paulnü lalingcho, “Ih Cilicia la aying yangdi Tarsus la surocho Jihudarü khüdu. Yanglilüm amülung te tsü I khyang chosohng”

⁴⁰Anüchibanü abi khyang mülacho; achotsü Paulnü phaqu la tsü yapü amülung te yah-adunung akhehnü iichi yocho. Khode arüh yah-aducho, Paulnü arüh te Ibri yunü chocho.